جاڭا حابارلار

رايونىمىز كەدەيلەردى سۇيەمەلدەۋ سالاسىندا ءىرىپ - ءشىرۋ جانە ستيل ماسەلەسىنە ساياتىن 9 تيپتىك دەلونى حابارلاندىردى

    كەلۋ قاينارى: شينجياڭ حالىق راديو ىستانسياسى    2018-10-20 20:51:12  

 ءوز حابارىمىز. جاقىندا اۆتونوميالى رايوندىق ءتارتىپ تەكسەرۋ كوميتەتى، باقىلاۋ - تەكسەرۋ كوميتەتى كەدەيلەردى سۇيەمەلدەۋ سالاسىندا ءىرىپ - ءشىرۋ جانە ستيل ماسەلەسىنە ساياتىن 9 تيپتىك دەلونى اشىق جاريالادى. بۇل 9 تيپتىك دەلو مىنالار:  1. اراتۇرىك اۋدانى تۋحۋلۋ اۋىلىنىڭ كادرى قيۇم ابلىزدىڭ كەدەيلەردى سۇيەمەلدەۋ، ءوزارا كومەك كورسەتۋ قارجىسىن يەمدەنىپ الۋ ماسەلەسى. 2017 - جىلى 3 - ايدان 2018 - جىلى 4 - ايعا دەيىن، قيۇم ابلىز ورگاي قىستاعى پارتيا ياچەيكاسىنىڭ شۋجيى مىندەتىن وتەگەن مەزگىلدە، ورگاي قىستاعىنىڭ تۇرعىندارى قايتارعان ءوزارا كومەك كورسەتۋ قارجىسىنان 172 مىڭ 100 يۋاندى دەر كەزىندە جوعارىعا تولىق تاپسىرماي، ونىڭ 83 مىڭ 200 يۋانىن لاتاري بەلەتىن ساتىپ الۋ سياقتى جەكە تۇتىنۋلارىنا جۇمساعان. 2018 - جىلى 7 - ايدا قيۇم ابلىزگە پارتيادان ايداۋ، ۇكىمەت قىزمەتىنەن ايداۋ جازاسى بەرىلدى، ونىڭ قىلمىسقا ساياتىن ماسەلەسى جانە دەرەكتەرى ءادىليا ورگانىنىڭ زاڭ بويىنشا ءبىر جايلى ەتۋىنە تاپسىرىلدى.   2. شاۋەشەك قالاسى قاراقاباق اۋىلدىق ۇكىمەتىنىڭ بۇرىنعى ورىنباسار مەڭگەرۋشى قىزمەتكەرى سەرىكباي ءىسلامباي ۇلىنىڭ حالىققا تيىمدىلىك جاساۋ نىسانى قارجىسىن جالعان مالىمدەۋ، زاڭسىز ايىرباستاۋ ماسەلەسى. 2013 - جىلدان 2016 - جىلعا دەيىن، سەرىكباي ءىسلامباي ۇلى قاراقاباق اۋىلى فەرما قىستاعىنىڭ قىزمەتىن تاپسىرۋ مەن باسقارعان مەزگىلدە، وسى قىستاق پارتيا ياچەيكاسىنىڭ بۇرىنعى شۋجيى نۇرⅩ پەن (باسقا دەلو تۇرعىزىلىپ ءبىر جايلى ەتىلدى) استاسىپ، قىستاق تۇرعىنى اتىمەن باعىمشىلىق جىلى قوراسىنان ەكىنى جالعان مالىمدەپ، كەدەيلەردى سۇيەمەلدەۋ نىسانى قارجىسىنان 40 مىڭ يۋاندى زاڭسىز ايىرباستاپ، مۇنىڭ 20 مىڭ يۋانىن ءوزى قىمقىرىپ العان. بۇدان سىرت، سەرىكباي ءىسلامباي ۇلىنىڭ تارتىپكە اۋىر دارەجەدە قايشىلىق جاساعان باسقا دا ماسەلەلەرى بار. 2018 - جىلى 9 - ايدا سەرىكباي ءىسلامباي ۇلىنا پارتيادان ايداۋ، اكىمشىلىك مىندەتىنەن قالدىرۋ جازاسى بەرىلدى.  3. تۇرپان قالاسى گاۋچاڭ رايونى چيچۋانحۋ قالاشىعى حالىق ىستەرى كەڭسەسىنىڭ بۇرىنعى مەڭگەرۋشىسى پارۇقجان عىنيدىڭ حالىق ىستەرى قۇتقارۋ قاراجاتىنا قيانات جاساۋ، ونى باسقاعا پايدالانۋ ماسەلەسى. 2016 - جىلى 7 - ايدان 2018 - جىلى 2 - ايعا دەيىن، پارۇقجان عىني قىزمەت قولايلىلىعىنان پايدالانىپ، حالىق ىستەرى قارجىسىنان 49 مىڭ 500 يۋاندى باسقالارعا قارىزعا بەرگەن، حالىق ىستەرىنىڭ ۋاقىتشا قۇتقارۋ قاراجاتىنان، ەمدەۋ - قۇتقارۋ قاراجاتىنان جيىنى 11 مىڭ 700 يۋانعا قيانات جاساعان. 2018 - جىلى 8 - ايدا پارۇقجان عىنيعا پارتيادان ايداۋ، اكىمشىلىك مىندەتىنەن قالدىرۋ جازاسى بەرىلدى.  4. قاعىلىق اۋدانى تەتىر اۋىلى 4 - قىستاق پارتيا ياچەيكاسىنىڭ بۇرىنعى شۋجيى مىجيت مامەتتىڭ سىرىڭكەلىك سۇراۋ، مىندەتىن ويداعىداي وتەمەۋ سياقتى ماسەلەلەرى. 2013 - جىلدان 2016 - جىلعا دەيىن، مىجيت مامەت قىزمەت قولايلىلىعىنان پايدالانىپ، قىستاق تۇرعىندارىنىڭ بەيقۇت ءۇي الۋىنا كومەكتەسۋ، سىرتقا شىعىپ جۇمىس ىستەۋىنە قولايلىلىق جاساۋ سىلتاۋىمەن 3 بۇقارادان 18 مىڭ يۋان سىرىڭكەلىك سۇراعان؛ ەڭبەكاقى، حالىق جاساعى اقىسى سياقتىلاردان ەرەجەگە قايشىلىق جاساپ، 8000 يۋان العان ءارى مۇنى ءوزى قىمقىرىپ قالعان؛ وسى قىستاقتىڭ 2 مۋ كوللەكتيۆ جەرىن زورلىقپەن ەگىپ، 2900 يۋان كوتەرمەگە الۋ اقىسىن تاپسىرماعان؛ قىزمەت ىستەمەۋ، جاۋاپكەرشىلىگىن اتقارماۋ سەبەپتى، 6 بۇقارا ەرەجەگە قايشىلىق جاساپ، 129 مىڭ يۋاندىق بەيقۇت ءۇي كومەك قاراجاتىنان يگىلىكتەنگەن. بۇدان سىرت، مىجيت مامەتتىڭ تارتىپكە اۋىر دارەجەدە قايشىلىق جاساعان باسقا دا ماسەلەلەرى بار. 2018 - جىلى 8 - ايدا مىجيت مامەتكە پارتيادان ايداۋ جازاسى بەرىلدى.  5. ۇلۇقشات اۋدانى قىزىلوي اۋىلى كولارىق قىستاعى پارتيا ياچەيكاسىنىڭ بۇرىنعى شۋجيى، قىستاق تۇرعىندار كوميتەتىنىڭ مەڭگەرۋشىسى جۇماش اقجولدىڭ ەرەجەگە قايشىلىق جاساپ، كەدەيلەردى سۇيەمەلدەۋ ساياساتىنان يگىلىكتەنۋ ماسەلەسى. 2013 - جىلى 3 - ايدا جۇماش اقجول قىزمەت قولايلىلىعىنان پايدالانىپ، ەرەجەگە قايشىلىق جاساپ، تۋىسى اتىنان بەيقۇت ءۇي جانە قورا - قالتقى كومەك قاراجاتىنان 100 مىڭ 800 يۋان يگىلىكتەنگەن؛ 2014 - جىلدىڭ باسىندا شارتقا ۇيلەسپەيتىن 2 تۋىسىن ارحيۆ تۇرعىزىلىپ، كارتچكا بەرىلگەن كەدەي وتباسى قاتارىنا كىرگىزىپ، 2018 - جىلى 5 - ايعا دەيىن ەرەجەگە قايشىلىق جاساپ، كەدەيلەردى سۇيەمەلدەۋ قاراجاتى، زاتتارى، اۋىل - قىستاقتاعى ەڭ تومەنگى تۇرمىستى قامتاماسىز ەتۋ قاراجاتى سياقتىلاردان جيىنى 28 مىڭ 900 يۋان العان. 2018 - جىلى 9 - ايدا جۇماش اقجولعا پارتيادا 2 جىل قالدىرىپ بايقاپ كورۋ جازاسى بەرىلدى.  6. قاراقاش اۋدانى جاھانباق اۋىلدىق پارتكومنىڭ بۇرىنعى مۇشەسى، حالىق قۇرىلتايىنىڭ بۇرىنعى ءتوراعاسى الىمجان احمەتجاننىڭ ەرەجەگە قايشىلىق جاساپ، كەدەيلەردى سۇيەمەلدەۋ نىسانى كومەك قاراجاتىنان يگىلىكتەنۋ، ەڭ تومەنگى تۇرمىستى قامتاماسىز ەتۋدى ەرەجەگە قايشىلىق جاساپ ءبىتىرۋ سياقتى ماسەلەلەرى. 2011 - جىلى 3 - ايدا الىمجان احمەتجان قىزمەت قولايلىلىعىنان پايدالانىپ، ەرەجەگە قايشىلىق جاساپ، تۋىسى اتىنان بەيقۇت ءۇي كومەك قاراجاتىنان 24 مىڭ يۋان، اۋلا شارۋاشىلىعى نىسانى كومەك قاراجاتىنان 5000 يۋان، جيىنى 29 مىڭ يۋان يگىلىكتەنگەن؛ 2012 - جىلى 12 - ايدا شارتقا ۇيلەسپەيتىن 3 تۋىسىنا اۋىل - قىستاقتاعى ەڭ تومەنگى تۇرمىستى قامتاماسىز ەتۋدى ءبىتىرىپ بەرىپ، ەرەجەگە قايشىلىق جاساپ، ەڭ تومەنگى تۇرمىستى قامتاماسىز ەتۋ قاراجاتىنان 23 مىڭ 500 يۋان العان. بۇدان سىرت، الىمجان احمەتجاننىڭ تارتىپكە اۋىر دارەجەدە قايشىلىق جاساعان باسقا دا ماسەلەلەرى بار. 2018 - جىلى 7 - ايدا الىمجان احمەتجانعا پارتيادا ءبىر جىل قالدىرىپ بايقاپ كورۋ، اكىمشىلىك مىندەتىنەن قالدىرۋ جازاسى بەرىلدى.   7. اراسان اۋدانى شاعانتۇڭگە اۋىلى سۇمۇنحوتحۇر قىستاعى پارتيا ياچەيكاسىنىڭ بۇرىنعى شۋجيى ما دىلياننىڭ ەرەجەگە قايشىلىق جاساپ، بەيقۇت ۇيگە بەرىلگەن قوسىمشا قاراجاتىنان يگىلىكتەنۋ ماسەلەسى. 2016 - جىلى سۇمۇنحوتحۇر قىستاعىنىڭ پارتيا ياچەيكا شۋجيى مىندەتىندەگى ما دىليان قىزمەت قولايلىلىعىنان پايدالانىپ، قىستاقتاعى كەدەي وتباسى سۇن x تىڭ اتىندا ءبىر بەيقۇت ءۇي سالىپ، بەلگىلەمەگە قايشىلىق جاساپ، 48 مىڭ 500 يۋان تولىقتاما قاراجاتتان يگىلىكتەنگەن. 2018 - جىلى 8 - ايدا ما دىليانعا پارتيادا ءبىر جىل قالدىرىپ بايقاپ كورۋ جازاسى بەرىلدى.  8. موري قازاق اۆتونوميالى اۋدانى تەرەكتى اۋىلدىق مادەنيەت پۋنكتىنىڭ باستىعى احمەتجان قازىناباي ۇلىنىڭ ەرەجەگە قايشىلىق جاساپ، كەدەيلەردى سۇيەمەلدەۋ نىسانىنان يگىلىكتەنۋ ماسەلەسى. 2015 - جىلى 9 - ايدا احىمەتجان قازىناباي ۇلى وسى اۋىلدىڭ شيچۋان قىستاعىنداعى كەدەي وتباسى شيا x تىڭ اتىندا سۇرلەم ۇراسىن سالىپ، بەلگىلەمەگە قايشىلىق جاساپ، نىسانعا بەرىلگەن تولىقتاما قاراجاتتان 3000 يۋان يگىلىكتەنگەن. 2018 - جىلى 9 - ايدا احىمەتجان قازىناباي ۇلىنا پارتيا ىشىندە ەسكەرتۋ جازاسى بەرىلدى.  9. التاي قالاسى ازاتتىق سولتۇستىك جولى الەۋمەتتىك اۋماعىنىڭ بۇرىنعى مەڭگەرۋشىسى ياڭ جۋاڭسىنىڭ تۋىس - تۋعان، دوس - جاراندارىنا تيىمدىلىك جاساۋ ماسەلەسى. 2013 - جىلى 9 - ايدا ياڭ جۋاڭسى التاي قالاسى ازاتتىق سولتۇستىك جولى الەۋمەتتىك اۋماعىنىڭ مەڭگەرۋشىسى بولىپ تۇرعان كەزىندە، ازاتتىق سولتۇستىك جولىنىڭ قاراستىلىعىنا جاتپايتىن تۋىستارىن «التىن كۇز وقۋعا كومەك بەرۋ» تولىقتاما قاراجاتىنان يگىلىكتەنەتىندەر تىزىمدىگىنە ەنگىزىپ، ەرەجەگە قايشىلىق جاساپ، «التىن كۇز وقۋعا كومەك بەرۋ» قيمىلىنىڭ 2000 يۋان تولىقتاما قاراجاتىن العان؛ 2016 - جىلى 12 - ايدا تۋىسىن ەڭ تومەنگى تۇرمىسى قامتاماسىز ەتىلەتىن ەرەكشە قيىنشىلىعى بارلاردىڭ جىلۋ تولىقتاما قاراجاتىنان يگىلىكتەنەتىندەر تىزىمدىگىنە ەنگىزىپ، ەرەجەگە قايشىلىق جاساپ، 1500 يۋان جىلۋ تولىقتاما قاراجاتىن العان. 2018 - جىلى 9 - ايدا ياڭ جۋاڭسىعا پارتيا ىشىندە ەسكەرتۋ جازاسى بەرىلدى.  اشكەرەلەنگەن 9 تيپتىك دەلوعا قاراعاندا، دەلوعا قاتىستى ادامدار شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ كەدەيلىكتەن قۇتىلدىرۋدان قامال الۋ قىزمەتىنىڭ تالاپتارىن ەلەڭ قۇرلى كورمەگەن، زاڭنان، تارتىپتەن تيتتەي دە يمەنبەگەن، كەدەيلىكتەن قۇتىلدىرۋدان، كەدەيلەردى سۇيەمەلدەۋدەن پايدالانىپ جۇگەنسىزدىكپەن پايدا قۋعان، كەيبىرەۋلەرى الداپ الۋعا بار نيەتىن سالسا، كەيبىرەۋلەرى كوپە - كورنەۋ الدامكوستىك ىستەگەن، كەيبىرەۋلەرى ۇكىمەت اقشاسىن تالاي رەت باسقاعا جۇمساعان، يەمدەنىپ العان، كەيبىرەۋلەرىندە فورماشىلدىق، تورەشىلدىك اۋىر بولىپ، قىزمەت مىندەتىن وتەمەگەن، جاۋاپكەرشىلىگىن ارقالاماعان. وسى ماسەلەلەر كەدەي بۇقارانىڭ ءتول مۇددەسىنە اۋىر زيان جەتكىزىپ، حالىق بۇقاراسىنىڭ كوڭىلىنە قاياۋ سالىپ، كەدەيلىكتەن قۇتىلدىرۋدان قامال الۋ قىزمەت ونىمدىلىگىنە تىكە ىقپال جاساپ، پارتيا ورتالىق كوميتەتىنىڭ حالىقتى وزەك ەتۋ سىندى نەگىزگى تالابىنا قايشى كەلىپ، پارتيا مەن ۇكىمەتتىڭ وبرازىنا نۇقسان جەتكىزدى، ءسوز جوق، ءتارتىپ بويىنشا، زاڭ بويىنشا باتىل جازالاۋ كەرەك.  تۇتاس رايونىمىزداعى ءار دارەجەلى پارتيا ۇيىمدارى «ءتورت تانىمدى» بەرىك ورناتىپ، «ەكىنى قورعاۋدى» امالياتتا ايگىلەۋ تۇرعىسىنان كوز جىبەرىپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ كەدەيلىكتەن قۇتىلدىرۋدان قامال الۋ قىزمەت تالابىن قاتاڭ تياناقتاندىرىپ، اۆتونوميالى رايوندىق پارتكومنىڭ كەدەيلىكتەن قۇتىلدىرۋدان قامال الۋ جونىندەگى ورنالاستىرۋىنا ساي، ءوز جەرىندەگى، ءوز تاراۋىنداعى كەدەيلەردى سۇيەمەلدەۋ سالاسىندا ساقتالعان ءىرىپ - ءشىرۋ ماسەلەسىن جانە ستيل ماسەلەسىن جاپپاي ءبىر - بىرلەپ تەكسەرىپ، سالالاپ، نەندەي ماسەلە بولسا، سول ماسەلەنى شەشىپ، قاي ماسەلە كورنەكتى بولسا، سول ماسەلەنى رەتتەپ، جونگە سالىپ، ساياساتتىڭ تياناقتانىپ، ءونىم بەرىپ، كەدەي بۇقارانىڭ تيىمدىلىككە كەنەلۋىنە مۇمكىندىك جاساپ، ءىس جۇزىندىك ارەكەتتەرىمەن كەدەيلىكتەن قۇتىلدىرۋدان قامال الۋ شايقاسىن باتىلدىقپەن ويداعىداي جۇرگىزىپ، جەڭىسكە قول جەتكىزۋ كەرەك.  ءار دارەجەلى ءتارتىپ تەكسەرۋ، باقىلاۋ - تەكسەرۋ ورگاندارى ورتالىق ءتارتىپ تەكسەرۋ كوميتەتىنىڭ كەدەيلەردى سۇيەمەلدەۋ سالاسىنداعى ءىرىپ - ءشىرۋ ماسەلەسىن جانە ستيل ماسەلەسىن ارناۋلى جونگە سالۋ قىزمەتىن تەرەڭدەتۋدى ىلگەرىلەتۋ ءماجىلىسىنىڭ رۋحىن مۇقيات دايەكتىلەندىرىپ، باقىلاۋ، ءتارتىپ اتقارۋ، جاۋاپقا تارتۋ تەبىنىن بارىنشا ارتتىرىپ، كەدەيلەردى سۇيەمەلدەۋ سالاسىنداعى ءىرىپ - ءشىرۋ ماسەلەسى جانە ستيل ماسەلەسى وڭاي تۋىلاتىن، ءجيى تۋىلاتىن ءتۇيىندى سالالار مەن شەشۋشى بۋىندارعا قاداعالاي نازار اۋدارىپ، قيانات جاساۋ، باسقاعا پايدالانۋ، ۇستاپ قالۋ، بولىسكە سالۋ، بىرەۋدىڭ اتىنان الۋ، جەۋ، الۋ، القىمداۋ، سۇراۋ، تۋىس - تۋعان، دوس - جاراندارىنا تيىمدىلىك جاساۋ سياقتى ماسەلەلەردى باتىل تەكسەرىپ ءبىر جاقتى ەتۋ؛ فورماشىلدىقتى، تورەشىلدىكتى رەتتەۋ - جونگە سالۋدى كورنەكتى ورىنعا قويىپ، نەگىزگى ساتىداعى فورماشىلدىقتى، تورەشىلدىكتى قاتاڭ تەكسەرىپ ءبىر جاقتى ەتۋمەن بىرگە، ءار دارەجەلى پارتيا، ۇكىمەت ورگاندارىنىڭ ستيل ماسەلەسىنىڭ ءتۇپ تامىرىن تەرەڭ قازىپ، باقىلاۋ، ءتارتىپ اتقارۋ، جاۋاپقا تارتۋدىڭ ءىس جۇزىندىك ناتيجەسى ارقىلى كەدەيلىكتەن قۇتىلدىرۋدان قامال الۋ شايقاسىن ويداعىداي جۇرگىزىپ، جەڭىسكە قول جەتكىزۋىن ءتارتىپ جاعىنان پارمەندى قامتاماسىزداندىرۋ كەرەك.


بەرىپ كەت ورامالىڭدى

دوستار

الىستاعى اق ەركە