جاڭا حابارلار

جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار باس قوسۋى سالتاناتپەن اشىلدى شي جينپيڭ اشىلۋ سالتىنا قاتىناستى ءارى ارقاۋ ءسوز سويلەدى

    كەلۋ قاينارى: شينجياڭ گازەتى    2018-09-05 13:20:46  

شي جينپيڭ اشىلۋ سالتىنا قاتىناستى ءارى ارقاۋ ءسوز سويلەدى

جاڭا داۋىردەگى اناعۇرلىم نىعايعان جۇڭگو-افريكا تاعدىرلاس ورتاق تۇلعاسىن قول ۇستاسا سومداپ، شارۋاشىلىقتى جەبەۋ، قۇرىلعىلاردى تۇتاستىرۋ، ساۋدانى قولايلىلاستىرۋ، جاسىل دامۋ، قابىلەت قۇرىلىسى، سالاماتتىق جانە دەنساۋلىق ساقتاۋ، گۋمانيتارلىق اۋىس-كۇيىس، بەيبىتشىلىك پەن حاۋىپسىزدىك سىندى «سەگىز ءىرى ارەكەتتى» ءتۇيىندى تۇردە ويداعىداي اتقارۋدى باسا دارىپتەدى

9 - ايدىڭ 3 - كۇنى جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار باس قوسۋى حالىق سارايىندا سالتاناتپەن اشىلدى. جۇڭگونىڭ مەملەكەت ءتوراعاسى شي جينپيڭ اشىلۋ سالتىنا قاتىناستى ءارى «قول ۇستاسا تاعدىرلاس بولىپ، ءبىر نيەتپەن دامۋدى جەبەيىك» دەگەن تاقىرىپتا ارقاۋ ءسوز سويلەدى.
سۋرەتتى شينحۋا اگەنتتىگىنىڭ ءتىلشىسى ليۋ ۋيدۇڭ تۇسىرگەن

 شينحۋا اگەنتتىگىنىڭ 9 - ايدىڭ 3 - كۇنى بەيجيڭنەن بەرگەن حابارى (تىلشىلەر باي جيە، جۋ چاۋ، ديڭ شياۋشي). 9 - ايدىڭ 3 - كۇنى جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار باس قوسۋى حالىق سارايىندا سالتاناتپەن اشىلدى. جۇڭگونىڭ مەملەكەت ءتوراعاسى شي جينپيڭ اشىلۋ سالتىنا قاتىناستى ءارى ارقاۋ ءسوز سويلەپ، جۇڭگو مەن افريكانىڭ قول ۇستاسىپ، جاۋاپكەرشىلىكتى تەڭ ارقالايتىن، سەلبەسە تەڭ يگىلىكتەنەتىن، باقىتقا بىرگە كەنەلەتىن، مادەنيەتتى بىرگە گۇلدەندىرەتىن، حاۋىپسىزدىكتى تەڭ قالىپتاستىراتىن، جاراسىمدى قاتار ءومىر سۇرەتىن جۇڭگو - افريكا تاعدىرلاس ورتاق تۇلعاسىن جۇمىلا سومداپ، شارۋاشىلىقتى جەبەۋ، قۇرىلعىلاردى تۇتاستىرۋ، ساۋدانى قولايلىلاستىرۋ، جاسىل دامۋ، قابىلەت قۇرىلىسى، سالاماتتىق جانە دەنساۋلىق ساقتاۋ، گۋمانيتارلىق اۋىس - كۇيىس، بەيبىتشىلىك پەن حاۋىپسىزدىك سىندى «سەگىز ءىرى ارەكەتتى» ءتۇيىندى تۇردە ويداعىداي اتقارۋدى باسا دارىپتەدى.
  كۇز باسىنداعى بەيجيڭ، تيان - انمىن الاڭى مەن چاڭ - ان كوشەسىنىڭ ەكى جاعاسىندا گۇلدەر قۇلپىرا اشىلىپ، جۇڭگو - افريكا سەلبەستىك تالقى مىنبەرىنە مۇشە ەلدەردىڭ مەملەكەت تۋلارى، افريكا وداعىنىڭ تۋى جانە جۇڭگو - افريكا سەلبەستىك تالقى مىنبەرىنىڭ بەلگىسى باسىلعان تۋلار جەلبىرەپ تۇر. حالىق سارايىنىڭ سولتۇستىك قاقپاسىنىڭ سىرتىندا، قۇرمەت قاراۋىلى قىزىل كىلەمنىڭ ەكى جانىنا قاتار تۇزەگەن. ساعات 16 مولشەرىندە، تالقى مىنبەرىنىڭ باسشىلار باس قوسۋىنا قاتىناساتىن شەت جاقتىڭ باسشىلارى ىركەس - تىركەس كەلىپ جەتتى. شي جينپيڭ سولتۇستىك زالدا ىستىق ىقىلاسپەن قارسى الىپ، ولارمەن شىنايى بەينەدە ءبىر - بىرلەپ قول الىسىپ، امانداستى. سونان كەيىن، جۇڭگولىق جانە شەتەلدىك باسشىلار ەستەلىك سۋرەتكە ءتۇستى.
  زالدا شام جارىعى سامالاداي جارقىراپ، گۇل شوقتارى كوزدىڭ جاۋىن الىپ، جۇڭگو - افريكا سەرىكتەستەرى ءبىر اراعا باس قوستى. ءتوراعالار مىنبەسىندە، جۇڭگو - افريكا سەلبەستىك تالقى مىنبەرىنىڭ بەلگىسى كوزگە شوقتاي باسىلادى، جۇڭگو مەن 53 افريكا ەلىنىڭ مەملەكەت تۋلارى مەن افريكا وداعىنىڭ تۋى حانزۋ، اعىلشىن، فرانسۋز تىلدەرىندە «2018 - جىلعى جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار باس قوسۋى» دەپ جازىلعان ءىرى كولەمدى كوك ءتۇستى ارتقى كورىنىس تاقتاسىنىڭ الدىنا رەتتى تۇردە قاتار تىزىلگەن. ساعات 16دان 40 مينۋتتاي وتكەندە، اسكەري وركەستر دۋماندى دا سالتاناتتى قارسى الۋ مارشىن ورىندادى، شي جينپيڭ مەن شەت جاقتىڭ باسشىلارى جينالىس زالىنا بىرگە كىردى، بۇكىل زالداعىلار ورىندارىنان تۇرىپ، شاتىرلاتا شاپالاق سوقتى.
  شاپالاق ءۇنى ىشىندە، شي جينپيڭ «قول ۇستاسا تاعدىرلاس بولىپ، ءبىر نيەتپەن دامۋدى جەبەيىك» دەگەن تاقىرىپپەن ارقاۋ ءسوز سويلەدى.
  شي جينپيڭ تالقى مىنبەرى باسشىلار باس قوسۋىنا قاتىناسقان گامبيا، سان - تومە جانە پرينسيپي، بۋركينا فاسو سياقتى تالقى مىنبەرىنىڭ جاڭا 3 مۇشەسىنىڭ باسشىلارىن قامتىعان شەت جاقتىڭ باسشىلارىن قىزۋ قارسى الدى.
  شي جينپيڭ مىنالاردى اتاپ كورسەتتى: جۇڭگو مەن افريكا ەكى جاق قارايلاس كەشۋلەر مەن ورتاق بورىشقا نەگىزدەلىپ، وتكەن ۋاقىت ىشىندە ءبىر نيەت، ءبىر تىلەكتە بولىپ، ءوزارا قارايلاسىپ، ەرەكشەلىگى ايقىن سەلبەسە تەڭ يگىلىكتەنۋ جولىن اشتى. وسى جولدا، جۇڭگو ءارقاشان شىنايى، ادال بولۋ ۇستانىمى مەن دۇرىس ادىلەت - مۇددە كوزقاراسىن ۇستانىپ، افريكا ەلدەرىمەن ءبىر نيەتپەن ىنتىماقتاسىپ، تار جول، تايعاق كەشۋدەن بىرگە ءوتىپ، قول ۇستاسا العا باستى. جۇڭگو سەلبەستىك بارىسىندا شىنايى دوس بولۋعا، تەڭ قاراۋعا تاباندى بولدى، ادىلەت پەن مۇددەنى بىرىكتىرۋگە، ادىلەتتى العا شىعارۋعا تاباندى بولدى، حالىق ءۇشىن دامۋعا، شىنشىل، جوعارى ءونىمدى بولۋعا تاباندى بولدى، اشىق، سيىسىمدى بولۋعا، ءبارىن بىردەي قامتۋعا تاباندى بولدى. جۇڭگو «بەستى ىستەمەۋگە»، اتاپ ايتقاندا، افريكا ەلدەرىنىڭ ءوز مەملەكەتىنىڭ جاعدايىنا ۇيلەسەتىن دامۋ جولىن قاراستىرۋىنا كيلىكپەۋگە، افريكانىڭ ىشكى ىستەرىنە كيلىكپەۋگە، ءوز ەركىن باسقالارعا زورلاپ تاڭباۋعا، افريكاعا كومەكتەسۋگە ەشقانداي ساياسي شارت ۇستەمەۋگە، افريكاعا قارجى قوسۋ، قارجى قۇراۋ بارىسىندا ساياسي پايدانى كوزدەمەۋگە تاباندى بولدى. جۇڭگو ءار ەلدىڭ افريكا ىستەرىن ءبىر جاقتى ەتكەندە وسى «بەستى ىستەمەۋدى» ورىنداۋىن ءۇمىت ەتەدى.
  شي جينپيڭ مىنالاردى باسا دارىپتەدى: افريكانىڭ دامۋ مۇمكىندىگى شەكسىز، افريكانىڭ بولاشاعى ۇمىتكە تولى، جۇڭگو - افريكا دوستىعى مەن سەلبەستىگىنىڭ بولاشاعى كەڭ، جۇڭگو - افريكا جاپپاي ستراتەگيالىق سەلبەستىك سەرىكتەستىك قاتىناسىنىڭ دامۋىنان زور ناتيجە كۇتۋگە بولادى. جۇڭگو ماڭگى افريكانىڭ جاقسى دوسى، جاقسى سەرىگى، جاقسى اعايىنى. جۇڭگو - افريكا سەلبەستىگى جاقسى ما - ەمەس پە، بۇل تۋراسىندا تەك جۇڭگو - افريكا حالىقتارى عانا ءسوز قوزعاۋعا حاقىلى. ەشكىم دە جۇڭگو - افريكا حالىقتارىنىڭ ۇلى ىنتىماعىن بۇلدىرە المايدى، ەشكىم دە جۇڭگو - افريكا حالىقتارىنىڭ كوركەيۋ قادامىنا ورالعى بولا المايدى، ەشكىم دە جۇڭگو - افريكا سەلبەستىگىنىڭ كورنەكتى ناتيجەسىن قيالمەن نەمەسە ويجوتا جورامالمەن تەرىسكە شىعارا المايدى، ەشكىم دە حالىقارالىق قوعامنىڭ افريكانىڭ دامۋىنا قولداۋ كورسەتۋ جولىنداعى بەلسەندى ارەكەتىنە توسقاۋىل قويىپ، كەدەرگى كەلتىرە المايدى.
  شي جينپيڭ مىنالاردى اتاپ كورسەتتى: بەيبىتشىلىك پەن دامۋ − قازىرگى ءداۋىردىڭ نەگىزگى تاقىرىبى، سونداي - اق ءداۋىردىڭ پايىمداماسى دا. ءداۋىردىڭ پايىمداماسىنا سايكەس، جۇڭگو الەم ەلدەرىمەن ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى؛ حالىقارالىق سەلبەستىك سەرىكتەستەرىمەن «ءبىر بەلدەۋ، ءبىر جولدى» بىرگە قۇرىپ، «ءبىر بەلدەۋ، ءبىر جولدى» بەيبىتشىلىك جولى، گۇلدەنۋ جولى، ەسىك اشۋ جولى، جاسىل جول، جاڭالىق اشۋ جولى، وركەنيەت جولى ەتىپ قۇرىپ شىعۋدى قالايدى؛ الەمدىك باسقارۋ جۇيەسىنە بەلسەندى تۇردە ات سالىسىپ، الەمدىك باسقارۋ جۇيەسىنىڭ باسىم كوپ ساندى مەملەكەتتەردىڭ، اسىرەسە، وركەندەپ كەلە جاتقان ەلدەردىڭ تىلەگى مەن مۇددەسىن اناعۇرلىم تەڭگەرىمدى بەينەلەۋىن ىلگەرىلەتەدى؛ سىرتقا ەسىك اشۋعا بۇلجىماستان قولداۋ كورسەتىپ، اشىق الەمدىك ەكونوميكا مەن كوپ جاقتى ساۋدا ءتۇزىلىسىن تاباندى تۇردە قورعايدى.
  شي جينپيڭ مىنالاردى باسا دارىپتەدى: جۇڭگو − دۇنيە جۇزىندەگى ەڭ ءىرى وركەندەپ كەلە جاتقان ەل، افريكا − وركەندەپ كەلە جاتقان ەلدەر ەڭ شوعىرلانعان قۇرلىق، جۇڭگو - افريكا الدەقاشان قۋانىش - قايعىسى ورتاق تاعدىرلاس ورتاق تۇلعاعا اينالدى. ءبىز افريكا حالقىمەن بىرگە اناعۇرلىم نىعايعان جۇڭگو - افريكا تاعدىرلاس ورتاق تۇلعاسىن قۇرىپ، ادامزاتتىڭ تاعدىرلاس ورتاق تۇلعاسىنىڭ قۇرىلۋىنا ۇلگى كورسەتۋدى قالايمىز.
  ءبىرىنشى، جاۋاپكەرشىلىكتى تەڭ ارقالايتىن جۇڭگو - افريكا تاعدىرلاس ورتاق تۇلعاسىن قول ۇستاسا سومداۋ. ءبىز ءبىر - ءبىرىمىزدىڭ وزەكتى مۇددەمىز بەن نازار اۋدارىپ وتىرعان ماڭىزدى تۇيىندەرگە ساياتىن ماسەلەلەردە ءوزارا تۇسىنىستىكپەن قاراپ جانە قولداۋ كورسەتىپ، ماڭىزدى حالىقارالىق جانە وڭىرلىك ماسەلەلەردەگى سەلبەسۋ مەن سايكەسۋدى نىعايتىپ، جۇڭگو - افريكا مەن قالىڭ وركەندەپ كەلە جاتقان ەلدەردىڭ ورتاق مۇددەسىن قورعاۋىمىز كەرەك.
  ەكىنشى، سەلبەسە تەڭ يگىلىكتەنەتىن جۇڭگو - افريكا تاعدىرلاس ورتاق تۇلعاسىن قول ۇستاسا سومداۋ. ءبىز «ءبىر بەلدەۋ، ءبىر جولدى» تەڭ قۇرۋ الا كەلگەن ماڭىزدى ورايدان ويداعىداي پايدالانىپ، «ءبىر بەلدەۋ، ءبىر جول» قۇرىلىسىن افريكا وداعىنىڭ «2063 - جىل كۇن تارتىبىمەن» جانە ب م ۇ - نىڭ 2030 - جىلعا دەيىنگى باياندى دامۋ كۇن تارتىبىمەن جانە افريكا ەلدەرىنىڭ دامۋ ستراتەگيالارىمەن ءوزارا ۇشتاستىرىپ، جاڭا سەلبەستىك كەڭىستىگىن كەڭەيتىپ، جاڭا سەلبەستىك كومەسكى قۋاتىن اشۋىمىز كەرەك.
  ءۇشىنشى، باقىتقا بىرگە كەنەلەتىن جۇڭگو - افريكا تاعدىرلاس ورتاق تۇلعاسىن قول ۇستاسا سومداۋ. ءبىز حالىق تۇرمىسىنىڭ يگىلىگىن نىعايتۋدى جۇڭگو - افريكا قارىم - قاتىناسىن دامىتۋدىڭ شىعار ءتۇيىنى مەن تابان تىرەر تياناعى ەتۋىمىز كەرەك.
  ءتورتىنشى، مادەنيەتتى بىرگە گۇلدەندىرەتىن جۇڭگو - افريكا تاعدىرلاس ورتاق تۇلعاسىن قول ۇستاسا سومداۋ. ءبىز جۇڭگو - افريكا وركەنيەتتەرىنىڭ اۋىس - كۇيىسى مەن ءوزارا ۇلگى الۋىن، توعىسىپ قاتار ءومىر ءسۇرۋىن جەبەپ، جۇڭگو - افريكا حالىقتارىنىڭ سەزىمدىك دانەكەرىن جاقىنداتۋىمىز كەرەك.
  بەسىنشى، حاۋىپسىزدىكتى تەڭ قالىپتاستىراتىن جۇڭگو - افريكا تاعدىرلاس ورتاق تۇلعاسىن قول ۇستاسا سومداۋ. جۇڭگو افريكا ەلدەرى مەن افريكا وداعى سياقتى وڭىرلىك ۇيىمداردىڭ افريكا ماسەلەسىن افريكانىڭ تاسىلىمەن شەشۋىنە تاباندى تۇردە قولداۋ كورسەتەدى، افريكا ەلدەرىنىڭ دەربەس ورنىقتىلىقتى قورعاۋ، بەيبىتشىلىكتى ساقتاۋ قابىلەتىن جوعارىلاتۋىنا قولداۋ كورسەتەدى.

9 - ايدىڭ 3 - كۇنى جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار باس قوسۋى حالىق سارايىندا سالتاناتپەن اشىلدى. جۇڭگونىڭ مەملەكەت ءتوراعاسى شي جينپيڭ اشىلۋ سالتىنا قاتىناستى ءارى «قول ۇستاسا تاعدىرلاس بولىپ، ءبىر نيەتپەن دامۋدى جەبەيىك» دەگەن تاقىرىپتا ارقاۋ ءسوز سويلەدى. اشىلۋ سالتىنان بۇرىن، شي جينپيڭ تالقى مىنبەرىنىڭ باسشىلار باس قوسۋىنا قاتىناسقان شەتەل باسشىلارىمەن توپتىق سۋرەتكە ءتۇستى.
سۋرەتتى شينحۋا اگەنتتىگىنىڭ ءتىلشىسى جاڭ لين تۇسىرگەن

 التىنشى، جاراسىمدى قاتار ءومىر سۇرەتىن جۇڭگو - افريكا تاعدىرلاس ورتاق تۇلعاسىن قول ۇستاسا سومداۋ. جۇڭگو افريكامەن بىرگە، جاسىل، تومەن كومىرتەكتى، اينالمالى، باياندى دامۋ ءتاسىلىن دارىپتەپ، ەكولوگيا جانە قورشاعان ورتانى قورعاۋ سالاسىنداعى اۋىس - كۇيىس پەن سەلبەستىكتى كۇشەيتۋدى قالايدى.
  شي جينپيڭ مىنانى جاريالادى: جۇڭگو جاڭا داۋىردەگى اناعۇرلىم تىعىز جۇڭگو - افريكا تاعدىرلاس ورتاق تۇلعاسىن قالىپتاستىرۋدى جەتەكشى ەتىپ، يوحاننەسبۋرگتەگى باسشىلار باس قوسۋىندا بەلگىلەنگەن جۇڭگو - افريكا «ون ءىرى سەلبەستىك جوسپارى» نەگىزىندە، افريكا ەلدەرىمەن تىعىز سايكەسۋدى، الداعى 3 جىلدا جانە بۇدان كەيىنگى ءبىر مەزگىلدە «سەگىز ءىرى ارەكەتتى» ءتۇيىندى تۇردە اتقارۋدى قالايدى.
  ءبىرىنشى، شارۋاشىلىقتى جەبەۋ ارەكەتىن اتقارادى. جۇڭگو جۇڭگودا جۇڭگو - افريكا ەكونوميكا - ساۋدا كورمەسىن اشۋدى ۇيعاردى، جۇڭگو كاسىپورىندارىن افريكاعا قارجى سالۋدى كەڭەيتۋگە ىنتالاندىرادى، افريكانىڭ 2030 - جىلدان بۇرىن استىق حاۋىپسىزدىگىن نەگىزىنەن جۇزەگە اسىرۋىنا قولداۋ كورسەتەدى، جۇڭگونىڭ افريكاداعى كاسىپورىندارىنىڭ قوعامدىق جاۋاپكەرلىك وداعىن قۇرۋىنا قولداۋ كورسەتەدى.
  ەكىنشى، قۇرىلعىلاردى تۇتاستىرۋ ارەكەتىن اتقارادى. جۇڭگو افريكا وداعىمەن بىرگە «جۇڭگو - افريكا نەگىزدىك قۇرىلعى سەلبەستىگى جوسپارىن» جاساۋدى باستاۋدى ۇيعاردى، افريكا جاقپەن بىرگە افريكانىڭ ءبىر توپ نەگىزدىك قۇرىلعى، ءوزارا بايلانىس ءتۇيىندى نىساندارىن اتقارادى، افريكانىڭ كىلەڭ اۆياتسيالىق تاسىمال بازارى قۇرىلىسىنا قولداۋ كورسەتەدى، افريكا ەلدەرىنىڭ ازيا نەگىزدىك قۇرىلعىلارعا قارجى قوسۋ بانكەسى، جاڭا اشۋ بانكەسى، جىبەك جولى قورى سياقتى بايلىقتاردان اناعۇرلىم ۇتىمدى پايدالانۋىنا قولداۋ كورسەتەدى.
  ءۇشىنشى، ساۋدانى قولايلىلاستىرۋ ارەكەتىن اتقارادى. جۇڭگو افريكا تاۋارلارىنىڭ، اسىرەسە، بايلىق تۇرىنە جاتپايتىن ونىمدەرىنىڭ يمپورتىن كەڭەيتۋدى ۇيعاردى، افريكا قۇرلىعى ەركىن ساۋدا رايونى قۇرىلىسىنا قولداۋ كورسەتەدى، جۇڭگو - افريكا ەلەكتروندىق ساۋدا سەلبەستىگىن ىلگەرىلەتەدى.
  ءتورتىنشى، جاسىل دامۋ ارەكەتىن اتقارادى. جۇڭگو افريكامەن كليمات وزگەرىسىنە توتەپ بەرۋ، تەڭىز - مۇحيت سەلبەستىگى، قۇمايتتانۋدان ساقتانۋ جانە ونى جونگە سالۋ، جابايى حايۋاناتتار مەن وسىمدىكتەردى قورعاۋ سياقتى جاقتارداعى اۋىس - كۇيىس پەن سەلبەستىكتى ءتۇيىندى تۇردە كۇشەيتۋدى ۇيعاردى.
  بەسىنشى، قابىلەت قۇرىلىسى ارەكەتىن اتقارادى. جۇڭگو افريكامەن دامۋ تاجىريبەلەرى جونىندەگى اۋىس - كۇيىستى كۇشەيتۋدى ۇيعاردى، افريكاعا ادام كۇشى بايلىعى بويىنشا تاربيەلەۋ كۋرستارىن ۇسىنادى، جاستاردىڭ جاڭالىق اشۋ، شارۋاشىلىق قۇرۋ سەلبەستىگىن ىلگەرىلەتۋدى ماقسات ەتكەن جۇڭگو - افريكا جاڭالىق اشۋ سەلبەستىگى ورتالىعىن قۇرۋعا قولداۋ كورسەتەدى.
  التىنشى، سالاماتتىق، دەنساۋلىق ساقتاۋ ارەكەتىن اتقارادى. جۇڭگو ەمدەۋ - دەنساۋلىق ساقتاۋدان افريكاعا كومەك بەرۋ بويىنشا 50 نىساندى ساپالىلاندىرىپ، جاڭارتىپ، افريكا ءۇشىن اناعۇرلىم كوپ ارناۋلى شيپاگەر تاربيەلەپ، افريكاعا كومەك بەرەتىن ەمدەۋ اترەتىن ۇزدىكسىز جىبەرىپ جانە ساپالىلاندىرىپ، «نۇرلى ساپار»، «مەيىر ساپارى»، «كۇلىمسىرۋ ساپارى» سياقتى ارالاپ ەمدەۋ - دياگنوز قويۋ قيمىلدارىن ورىستەتىپ، ءالسىز توپتارعا باعىتتاپ ايەلدەر مەن بالالارعا ارنالعان جۇرەك توعىستىرۋ ينجەنەرياسىن اتقارادى.
  جەتىنشى، گۋمانيتارلىق اۋىس - كۇيىس ارەكەتىن اتقارادى. جۇڭگو جۇڭگو - افريكا زەرتتەۋ مەكەمەسىن قۇرۋدى ۇيعاردى، افريكا ەلدەرىنىڭ جىبەك جولى حالىقارالىق تەاترلار، مۇراجايلار، كوركەمونەر فەستيۆالدارى سياقتى وداقتارعا قاتىناسۋىنا قولداۋ كورسەتەدى، جۇڭگو - افريكا اقپارات قۇرالدارى سەلبەستىك تورىن قالىپتاستىرادى، جۇڭگو مەن افريكانىڭ ءوزارا مادەنيەت ورتالىقتارىن قۇرۋىن ۇزدىكسىز ىلگەرىلەتەدى، افريكا وقۋ - اعارتۋ قۇرىلىمدارىنىڭ كۇڭزى شۋەيۋانىن اشۋعا ءوتىنىش بەرۋىنە قولداۋ كورسەتەدى، اناعۇرلىم كوپ افريكا ەلدەرىنىڭ جۇڭگو ازاماتتارىنىڭ توپتاسىپ شەتەلگە ساياحاتتايتىن نىسانالى جەرلەرىنە اينالۋىنا قولداۋ كورسەتەدى.
  سەگىزىنشى، بەيبىتشىلىك پەن حاۋىپسىزدىك ارەكەتىن اتقارادى. جۇڭگو جۇڭگو - افريكا بەيبىتشىلىك پەن حاۋىپسىزدىك سەلبەستىك قورىن قۇرۋدى ۇيعاردى، جۇڭگو مەن افريكانىڭ بەيبىتشىلىك - حاۋىپسىزدىك جانە بەيبىتشىلىكتى قورعاۋ، حاۋىپسىزدىكتى قورعاۋ سەلبەستىگىن ورىستەتۋىنە قولداۋ كورسەتەدى، افريكا ەلدەرىنىڭ ءوڭىردىڭ حاۋىپسىزدىگىن قورعاۋ جانە لاڭكەستىككە قارسى تۇرۋ قۇلشىنىسىنا قولداۋ كورسەتەدى، جۇڭگو - افريكا بەيبىتشىلىك پەن حاۋىپسىزدىك تالقى مىنبەرىن قۇرادى.
  شي جينپيڭ مىنالاردى اتاپ كورسەتتى: «سەگىز ءىرى ارەكەتتىڭ» ءساتتى اتقارىلۋىن ىلگەرىلەتۋ ءۇشىن، جۇڭگو ۇكىمەتتىك كومەك، فينانس قۇرىلىمدارى مەن كاسىپورىنداردىڭ قارجى سالۋ، قارجى قۇراۋى سياقتى كوپ ءتۇرلى تاسىلمەن افريكاعا 60 ميلليارد دوللارلىق قولداۋ ۇسىنادى.
  شي جينپيڭ سوڭىندا مىنالاردى باسا دارىپتەدى: جاستار − جۇڭگو - افريكا قارىم - قاتىناسىنىڭ ءۇمىتى. جۇڭگو - افريكا «سەگىز ءىرى ارەكەت» باستاماسىنداعى كوپتەگەن شارالاردا جاستار، جاستاردى تاربيەلەۋ، جاستاردى سۇيەمەلدەۋ كوزدەلگەن. مەن جۇڭگو - افريكا دوستىعىنىڭ ۇتىلامالى تاياقشاسى جاس بۋىننىڭ قولىندا ۇزدىكسىز جالعاستىرىلسا، جۇڭگو - افريكا تاعدىرلاس ورتاق تۇلعاسى، ءسوز جوق، اناعۇرلىم جالىندى ومىرشەڭدىككە يە بولاتىنىنا، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانى مەن افريكا حالقىنىڭ ىنتىماقتاسىپ افريكانى كوركەيتۋ ارمانى، ءسوز جوق، ەرتەرەك جۇزەگە اساتىنىنا سەنەمىن.
  شي جينپيڭنىڭ ءسوزى زالداعى افريكا ەلدەرى باسشىلارىنىڭ جانە كەلگەن قوناقتاردىڭ كۇشتى اڭىسىن قوزعادى. زالدان كوپ رەت قىزۋ قول شاپالاق ءۇنى كوتەرىلدى.
  جۇڭگو - افريكا سەلبەستىك تالقى مىنبەرىنىڭ ورتاق ءتوراعا ەلى وڭتۇستىك افريكانىڭ زۇڭتۇڭى راموپوسا، افريكا وداعىنىڭ كەزەكتى ءتوراعاسى، رۋاندانىڭ زۇڭتۇڭى كاگامي، باسشىلار باس قوسۋىنىڭ ارنايى شاقىرىلعان سيلى قوناعى، ب م ۇ - نىڭ باس حاتشىسى گۋتەررەس، افريكا وداعى كوميسسياسىنىڭ ءتوراعاسى فاكي ىلگەرىندى - كەيىندى ارناۋ ءسوز سويلەدى.
  ولار مىنالاردى ءبىلدىردى: افريكا مەن جۇڭگونىڭ ءداستۇرلى دوستىعى تەرەڭ، دوستىق سەلبەستىك جەمىستەرى مول. ۇزاق ۋاقىتتان بەرى، افريكا مەن جۇڭگو تەرەزەسى تەڭ تۇرۋ، ءوزارا قۇرمەتتەۋ، ءوزارا پايدا جەتكىزىپ، تەڭ يگىلىكتەنۋ نەگىزىندە سىندارلى سەلبەستىك ورىستەتتى. جۇڭگو افريكانىڭ ەكونوميكالىق، قوعامدىق دامۋى ءۇشىن زور قولداۋ ۇسىندى، افريكانىڭ ىشكى ىستەرىنە ارالاسپادى، افريكامەن سەلبەستىككە ەشقانداي ساياسي شارت ۇستەمەدى. افريكا ەلدەرى افريكا مەن جۇڭگو سەلبەستىگىن كورگىسى كەلمەيتىندەر قولدان جاساعان «جاڭا وتارشىلدىق» ساندىراعىنا قارسى تۇرادى. افريكا جاق «ءبىر بەلدەۋ، ءبىر جولدى» بىرگە قۇرۋ باستاماسى سىندى ۇلى جاڭالىعىن جوعارى باعالايدى، افريكا ەلدەرى قاتىستى سەلبەستىكتەرگە بەلسەنە قاتىناسۋدى، ءوزىنىڭ دامۋ ستراتەگيالارىن «ءبىر بەلدەۋ، ءبىر جول» قۇرىلىسىمەن تولىق ءتۇيىستىرۋدى، ءوزارا پايدا جەتكىزىپ، تەڭ يگىلىكتەنۋدى جۇزەگە اسىرۋدى قالايدى.
  ولار مىنالاردى ءبىلدىردى: جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار باس قوسۋى اناعۇرلىم تىعىز جۇڭگو - افريكا تاعدىرلاس ورتاق تۇلعاسىن قۇرۋعا، افريكا - جۇڭگو قارىم - قاتىناسى دامۋىنىڭ جاڭا كەلەشەگىن بىرگە جوسپارلاۋعا كۇش سالادى. ءتوراعا شي جينپيڭ ورتاعا قويعان «سەگىز ءىرى ارەكەت» جۇرتتى ايرىقشا شابىتتاندىردى، ول افريكا قۇرلىعىنىڭ بەيبىت دامۋىنا ماڭىزدى، بەلسەندى ىقپال جاسايدى. افريكا جاق جۇڭگومەن تىعىز سەلبەسىپ، افريكا مەن جۇڭگونىڭ جاپپاي ستراتەگيالىق سەلبەستىك سەرىكتەستىك قارىم - قاتىناسىنىڭ ىشكەرىلەي دامۋىن ىلگەرىلەتۋدى، افريكا مەن جۇڭگونىڭ اناعۇرلىم جوعارى دەڭگەيدە سەلبەسىپ تەڭ يگىلىكتەنۋدى، بىرگە دامۋدى جۇزەگە اسىرۋدى جەبەۋدى، اناعۇرلىم تىعىز جۇڭگو - افريكا تاعدىرلاس ورتاق تۇلعاسىن قۇرىپ، ادامزاتتىڭ تاعدىرلاس ورتاق تۇلعاسىن قالىپتاستىرۋدى قالايدى.
  جۇڭگو - افريكا سەلبەستىك تالقى مىنبەرىنە افريكا جاقتان مۇشە ەلدەردىڭ مەملەكەت باسشىلارى، ۇكىمەت باسشىلارى، ۋاكىلدەر ۇيىرمەلەرىنىڭ باستىقتارى، سونداي - اق حالىقارالىق جانە وڭىرلىك ۇيىمداردىڭ جاۋاپتىلارى، ت.ب جۇڭگو مەن افريكانىڭ ءار سالا قايراتكەرلەرىنەن 3200گە جۋىق ادام اشىلۋ سالتىنا قاتىناستى.
  ديڭ شۋەشياڭ، ۋاڭ چىن، ليۋ حى، سۇن چۇنلان، ياڭ جيەچى، حۋ چۇنحۋا، حۋاڭ كۇنميڭ، ساي چي، جاۋ كىجى، حى ليفىڭ قاتارلىلار اتالعان قيمىلعا قاتىناستى.
  ۋاڭ ي اشىلۋ سالتىن باسقاردى.
  جۇڭگو - افريكا سەلبەستىك تالقى مىنبەرىندە قازىر جۇڭگو، جۇڭگومەن ديپلوماتيالىق قارىم - قاتىناس ورناتقان 53 افريكا مەملەكەتى جانە افريكا وداعى كوميتەتى سىندى جيىنى 55 مۇشە بار. جۇڭگو مەن افريكا 2 جاق 2006 - جىلى، 2015 - جىلى، 2018 - جىلى 3 رەت باسشىلار باس قوسۋىن وتكىزدى. بۇل رەتكى باسشىلار باس قوسۋىنىڭ تاقىرىبى: «سەلبەسە تەڭ يگىلىكتەنىپ، قول ۇستاسىپ، اناعۇرلىم تىعىز جۇڭگو - افريكا تاعدىرلاس ورتاق تۇلعاسىن قۇرايىق»، وندا جۇڭگو مەن افريكانىڭ «ءبىر بەلدەۋ، ءبىر جولدى» بىرگە قۇرۋى، ب م ۇ - نىڭ 2030 - جىلعا دەيىنگى باياندى دامۋ كۇن ءتارتىبى، افريكا وداعىنىڭ «2063 - جىل كۇن ءتارتىبى» سياقتى سالالارداعى سەلبەستىكتەردى كۇشەيتۋ جونىندە ءتۇيىندى تۇردە تالقى جۇرگىزىلەدى.


بەرىپ كەت ورامالىڭدى

دوستار

الىستاعى اق ەركە