جاڭا حابارلار

تۇڭعىش كەزەكتى تاڭبالى جايلاۋى مۋزيكا مەرەكەسى جايلاۋ ساياحاتىنىڭ مازمۇنىن بايىتتى

    كەلۋ قاينارى: شينجياڭ حالىق راديو ىستانسياسى    2018-07-12 11:52:09  

ىلە راديو ستانسياسىنىڭ ءتىلشىسى لي ياننىڭ حابارى: 7-ايدا تاڭبالى جايلاۋى جاسىل جەلەك جامىلدى، جايلاۋداعى تابىن-تابىن سيىر، قورا-قورا قوي مەن وزەن اڭعارىنداعى قۇلپىرا اشىلعان قىشى گۇلى ساحاراعا ءسان قوسىپ، ءجۇز شاقىرىمدىق جاسىل ءدالىز قالىپتاستىردى. وعان تۇڭعىش كەزەكتى تاڭبالى جايلاۋى مۋزيكا مەرەكەسى قوسىلىپ جايلاۋ ساياحاتىنىڭ مازمۇنىن بايىتىپ، جەر-جەردەگى ساياحاتشىلاردى باۋرادى.
جازدا تاڭبالى جايلاۋى كەڭ جايىلعان ماساتى كىلەم ىسپەتتى، قاتپار-قاتپار جون-جوتالار مەن يرەلەڭدەگەن وزەن بويلارىنان تابىن-تابىن سيىرلار مەن قورا-قورا قويلاردى كورۋگە بولادى، نىلقى اۋدانىنىڭ ىلاستاي اۋىلىنداعى نەشە 10 مىڭ مۋلىق قىشى گۇلى دە قۇلپىرا شەشەك اتتى، الىستان كوز سالساڭىز نەشە 10 شاقىرىمدىق القاپ بەينە سارى التىنداي جارقىراپ، تيانشان بوكتەرىن قۇلپىرعان گۇلگە ورادى. وسىنداي اسەم كورنىس ەلىمىزدىڭ جەر-جەرىندەگى ساياحاتشىلاردى ەرىكسىز باۋرايدى. كورىنىس تاماشالاۋ تەكشەسىندە كوپشىلىك اپپاراتتارىن قولدارىنا الىپ وسى ءبىر ساليحالى ءساتتى كەسكىنگە ءتۇسىردى. شاندۇڭدىق ساياحاتشى سۇن حانىم وسى كوكوراي شالعىنعا ورانعان تابيعاتتى قيىپ كەتە الماي ۇزاق تۇردى. ول: «بۇل جەرگە تۇڭعىش كەلۋىم، راسىندا وتە كوركەم ەكەن، ناعىز ۇلى تابيعاتتىڭ قويناۋىنا ورالعانداي بولدىم، بەينە سىزعان سۋرەت ءتارىزدى، بوسقا كەلمەگەن ەكەنمىن، وسى جولعى ساياحاتىم وتە ماعىنالى بولدى»،-دەدى.
باتار كۇننىڭ شۇعىلاسىنا مالىنعان تاڭبالى جايلاۋىنان اسەم مۋزيكانىڭ داۋىسى كوتەرىلەدى، قوبىز ءۇنى قۇيقىلجىپ، سىرناي ءۇنى تامىلجىپ، ساحارا مۋزيكا مەرەكەسى قىزۋ ورلەۋگە كوتەرىلدى. الىستان كەلگەن ساياحاتشىلار جايلاۋدا باس قوسىپ مۋزيكاعا ىلەسە بۇرالا بيگە باستى، ءبىر جاعىنان تاڭبالى جايلاۋىنداعى باتار كۇننىڭ كوركەم كورىنىسىن تاماشالاسا، ءبىر جاعىنان ساحارانىڭ ءدامدى تاعامدارىنان اۋىز ءتيىپ، جەرگىلىكتى ورىنداعى حالىقتىڭ ۇلتتىق عۇرىپ-ادەت، سالت-ساناسىنا كۋا بولدى. جياڭسۋلىق ساياحاتشى ماۋ فاڭفاڭ: «بۇل ارانىڭ كوركەم كورىنىسى مەنى بىردەن باۋرادى، ساياحاتتاۋعا اپتەن تايتىن جەر ەكەن، بۇگىن وسى دۋماندى مۋزيكا مەرەكەسىنە قاتىناسقانىما ايىرىقشا قۋانامىن»،-دەدى.
ۇعىسۋعا قاراعاندا، وسى رەتكى مۋزيكا مەرەكەسى ءبىر ايعا جالعاسادى، مەرەكە كەزىندە ساياحاتشىلار باي مازمۇندى ساحارا مۋزيكاسىنان ءلازاتتانادى ەكەن. نىلقى اۋداندىق ساياحات جانە ساۋداگەر شاقىرۋ مەكەمەسى باستىىعنىڭ كومەكشىسى حۋ حۋاجيڭ بىلاي دەدى: «تاڭبالى جايلاۋىن ۇگىتتەپ، نىلقىنى تانىستىرىپ، سىرتتان كەلەتىن ساياحاتشىلار مەن وسى جەردەگى بۇقارانى جايلاۋداعى ساحارا مادەنيەتى مۋزيكاسى قيمىلدارىمەن سۋسىنداتىپ، جازداعى اسەم مۋزيكا مادەنيەتى ارقىلى ۇلگى كورسەتەمىز».


بەرىپ كەت ورامالىڭدى

دوستار

الىستاعى اق ەركە