جاڭا حابارلار

شي جينپيڭ ا ق ش - تىڭ قورعانىس مينيسترى ماتيسپەن كەزدەستى

    كەلۋ قاينارى: شينجياڭ گازەتى    2018-06-29 17:56:05  
 شينحۋا اگەنتتىگىنىڭ 6 - ايدىڭ 27 - كۇنى بەيجيڭنەن بەرگەن حابارى (ءتىلشى مەي شىشيۇڭ). مەملەكەت ءتوراعاسى شي جينپيڭ 6 - ايدىڭ 27 - كۇنى حالىق سارايىندا ساپارلاي كەلگەن ا ق ش - تىڭ قورعانىس مينيسترى ماتيسپەن كەزدەستى.
  شي جينپيڭ بىلاي دەدى: بۇگىنگى تاڭداعى دۇنيە ءجۇزى قاۋىرت دامۋ، زور وزگەرىس، ۇلكەن رەتتەلۋ مەزگىلىندە تۇر، دۇنيە ءجۇزىنىڭ كوپ ۇيەكتەنۋى، ەكونوميكانىڭ جاھاندانۋى تەرەڭدەي دامۋدا، مەملەكەت پەن مەملەكەتتەردىڭ ءوزارا ءبىر - بىرىنە ىقپالى اناعۇرلىم كۇشەيۋدە. جۇڭگو حالقى سوتسياليستىك وسىزاماندانعان قۇدىرەتتى ەل قۇرادى، ايتسەدە، ءبىز بەيبىت دامۋ جولىنان جازبايمىز، ىرگە كەڭەيتۋ جانە وتارشىلدىق جولىمەن جۇرمەيمىز، ونان دا ماڭىزدىسى، دۇنيە جۇزىنە بىلىقپالىق تۋدىرمايمىز. جۇڭگو - ا ق ش قاتىناسى دۇنيە جۇزىندەگى ەڭ ماڭىزدى ەكى جاقتى قاتىناستاردىڭ ءبىرى. جۇڭگو مەن ا ق ش ديپلوماتيالىق قاتىناس ورناتقان 40 جىلعا تاياۋ تاريح جانە رەالدىق جۇڭگو - ا ق ش قاتىناسىنىڭ دامۋى جاقسى بولسا، ەكى ەل حالقىن جانە ءار ەل حالقىن باقىتقا كەنەلتەتىندىگىن، دۇنيە ءجۇزىنىڭ جانە ءوڭىردىڭ بەيبىتشىلىگىنە، ورنىقتىلىعىنا، گۇلدەنۋىنە ءتيىمدى بولاتىندىعىن اڭعارتتى. جۇڭگو - ا ق ش كەڭ كولەمدى سالادا ورتاق مۇددەگە يە، ەكى جاقتىڭ ورتاق تۇيىندەرى الاۋىزدىقتان الدەقايدا جوعارى تۇرادى. ۇلان - قايىر تىنىق مۇحيت جۇڭگو مەن ا ق ش - تى جانە باسقا دا ەلدەردى سيدىرا الادى. جۇڭگو - ا ق ش ءوزارا قۇرمەت ەتۋ، ىنتىماقتاسىپ تەڭ يگىلىككە كەنەلۋ پرينسيبىن ارقاۋ ەتىپ، ەكى ەل قاتىناسىنىڭ دامۋىن ىلگەرىلەتۋى كەرەك. جۇڭگو - ا ق ش ەلدەرىندە ورىن تەپكەن ورتاق مۇددەنى كورە بىلۋمەن بىرگە، ءبىز دە ەكى جاق اراسىندا ورىن تەپكەن الاۋىزدىقتان جالتارمايمىز. جۇڭگونىڭ يەلىك ۇقىعىنا جانە تەرريتوريا تۇتاستىعىنا ساياتىن ماسەلەدە ءبىزدىڭ پوزيتسيامىز بەرىك ءارى ايقىن، اتا - بابالارىمىز قالدىرىپ كەتكەن تەرريتوريانىڭ سۇيەمدەي جەرىنەن دە ايرىلمايمىز، ءبىز باسقالاردىڭ زارەدەي نارسەسىن دە المايمىز.
  شي جينپيڭ بىلاي دەدى: ەكى ەل ارمياسىنىڭ قاتىناسى ەكى ەل قاتىناسىنىڭ ماڭىزدى قۇرامداس بولەگى. تاياۋ جىلداردان بەرى، ەكى ەل ارمياسىنىڭ قاتىناسى تاماشا دامۋ جاعدايىن ساقتادى. ەجەلدەن قازىرگە دەيىن، اسكەردى ناعىز شەبەرلىكپەن پايدالاناتىندار سوعىس قۇمار بولعان ەمەس، ەكى ەل ارمياسىنىڭ ءتۇرلى جىكتەگىلەرىنىڭ بارىس - كەلىسىن جانە مەحانيزم قۇرىلىسىن كۇشەيتۋ كۇدىك - كۇماننان ارىلۋعا، اعات تۇسىنىكتەن، اعات تۇجىرىمنان جانە كۇتپەگەن ۋاقيعالاردان ساقتانۋعا پايدالى. ەكى ەل ارمياسىنىڭ تىلدەسۋدى كۇشەيتىپ، ءوزارا سەنىمدىلىكتى ارتتىرىپ، ىنتىماقتاستىقتى تەرەڭدەتىپ، حاۋىپ - قاتەردى مەڭگەرىپ، ەكى ەل ارمياسى قاتىناسىنىڭ ەكى ەل قاتىناسىنىڭ ورنىقتىرعىشىنا اينالۋىن ءۇمىت ەتەمىن.
  ماتيس شي جينپيڭنىڭ كەزدەسكەنىنە العىس ايتا كەلىپ، بىلاي دەدى: ا ق ش ەكى ەلدىڭ، ەكى ەل ارمياسىنىڭ قاتىناسىنا وسكەلەڭ ءمان بەرەدى، ەكى ەل ارمياسى قاتىناسىنىڭ ەكى ەل قاتىناسىنداعى مارتەبە رولى ايرىقشا ماڭىزدى. ا ق ش ا ق ش - جۇڭگو باسشىلارىنىڭ ماڭىزدى ورتاق تانىمىن جەتەكشى ەتىپ، ستراتەگيالىق تىلدەسۋدى كۇشەيتىپ، ءوزارا تيىمدىلىك جەتكىزۋ ىنتىماقتاستىعىن كەڭەيتىپ، الاۋىزدىقتى، حاۋىپ - قاتەردى مەڭگەرىپ، قاقتىعىستان، قارسىلاسۋدان ساقتانىپ، ەكى ەل ارمياسى قاتىناسىن ەكى ەل قاتىناسىنىڭ دامۋىن ىلگەرىلەتەتىن سىندارلى فاكتورعا اينالدىرۋدى قالايدى.
  ماتيس ترامپ زۇڭتۇڭنىڭ ءتوراعا شي جينپيڭگە دەگەن سالەمىن جەتكىزدى. شي جينپيڭ ماتيسقا ترامپ زۇڭتۇڭعا دەگەن سالەمىن جەتكىزۋدى ايتتى.
  مەملەكەتتىك كەڭەستىڭ مۇشەسى، قوسىمشا قورعانىس مينيسترى ۋي فىڭحى قاتارلىلار كەزدەسۋدە بىرگە بولدى.

بەرىپ كەت ورامالىڭدى

دوستار

الىستاعى اق ەركە