جاڭا حابارلار

«ۇيشە اۆتوموبيلىمەن شينجياڭعا ساياحاتتاۋ» اتىنداعى ءبىر مىڭ ۇيشە اۆتوموبيلدىڭ جىبەك جولىنداعى ساياحات قيمىلى ۇرىمجىدە باستالدى

    كەلۋ قاينارى: شينجياڭ حالىق راديو ىستانسياسى    2018-06-23 08:38:31  

ستانسيامىزدىڭ ءتىلشىسى جين لەي مەن پراكتيكانت لو يۋانميڭنىڭ حابارى: «ۇيشە اۆتوموبيلىمەن شينجياڭعا ساياحاتتاۋ » اتىنداعى ءبىر مىڭ ۇيشە اۆتوموبيلدىڭ جىبەك جولىنداعى ساياحات قيمىلى 6-ايدىڭ 22-كۇنى شينجياڭ حالىقارالىق ۇلكەن بازاردا باستالدى.
ۇيشە اۆتوموبيلمەن ساياحاتتاۋ سوڭعى جىلداردان بەرى جاڭادان كوركەيگەن ساياحات بەينەسى بولىپ، بارعان سايىن كوپتەگەن ادام ۇيشە اۆتوموبيلىن جۇرگىزىپ، قيىرعا ساياحاتتاۋدى ۇناتاتىن بولدى. شينجياڭنىڭ جەرى كەڭ، كورىنىسى كوركەم، ۇيشە اۆتوموبيلمەن ساياحاتتاعىسى كەلەتىندەردىڭ اڭساعان جەرى. وسى رەتكى قيمىلعا قاتىناسقان تۇڭعىش توپتاعى ۇيشە ساياحات اۆتوموبيلى 25، سىچۋان، انحۇي، شاندۇڭ سياقتى ەلىمىزدەگى 12 ولكە، قالادان كەلگەن 100 گە جۋىق ۇيشە اۆتوموبيلمەن ساياحاتتاۋشىلار 6-ايدىڭ 15-كۇنى قۇمىلدان اتتانىپ، جول بويى اراتۇرىك توراڭعى ورمانى، باركول جايلاۋى، جانبۇلاق، بوعدا كولى سياقتى كوپتەگەن كورىنىس رايوندارىن باسىپ ءوتىپ، ۇرىمجىگە جەتتى، باستالۋ سالتىنان كەيىن، ولار وڭتۇستىك شينجياڭدا جالعاستى ساپاردا بولادى. سىچۋاننان كەلگەن ساياحاتشى چىن لان: «ۇيشە اۆتوموبيل بىزگە ۇيدە وتىرىپ سەيىلدەپ جۇرگەندەي اسەر بەرەدى، جانبۇلاق پەن توراڭعى ورمانى سىندى ەكى كورىنىس رايونى راسىندا كەرەمەت ەكەن»،-دەدى.
اۆتونوميالى رايوندىق ساياحات ىستەرىن دامىتۋ كوميتەتىنىڭ ورىنباسار مەڭگەرۋشىسى گۇلي ابىلەم تىلشىگە، ۇيشە اۆتوموبيلمەن شينجياڭعا ساياحاتتاۋ اتىنداعى ءبىر مىڭ ۇيشە اۆتوموبيلدىڭ جىبەك جولىنداعى ساياحات قيمىلى 6-ايدان 10-ايعا دەيىن جالعاسادى، وسى مەزگىلدە ەلىمىزدىڭ جەر-جەرىنەن ءبىر مىڭنان استام ۇيشە اۆتوموبيل شينجياڭعا كەلەتىندىگى مەجەلەنىپ وتىر دەي كەلىپ: «ەلىمىزدىڭ جەر-جەرىنەن تاعى ىركەس-تىركەس ءبىر مىڭ ۇيشە اۆتوموبيل كەلگەننەن كەيىن، ءبىر قىدىرۋ قيمىلدار وتكىزەمىز، مىسالى، جەر-جەردە وتكىزىلەتىن ساياحات مەرەكەسىن قۇتتىقتاۋ قيمىلدارى، پويەزگە وتىرىپ، شينجياڭدى ساياحاتتاۋ قيمىلى، سونداي-اق، شينجياڭدا ساياحاتتايتىن ساياحات ارناۋلى ايروپلانى، ارناۋلى پويەزى سياقتى قيمىلدار ورىستەتىلىپ، ساياحاتشىلار كوركەم شينجياڭنان اناعۇرلىم ءلاززاتتانادى»،-دەدى.


بەرىپ كەت ورامالىڭدى

دوستار

الىستاعى اق ەركە