جاڭا حابارلار

جۇڭحۋا حالىق رەسپۋبليكاسىنىڭ «دوستىق وردەنىن» تابىستاۋ ءراسىمى بەيجيڭدە سالتاناتپەن وتكىزىلدى

    كەلۋ قاينارى: شينجياڭ گازەتى    2018-06-11 13:13:48  

شي جينپيڭ رەسەي زۇڭتۇڭى پۋتينگە تۇڭعىش «دوستىق وردەنىن» تابىستادى

 شينحۋا اگەنتتىگىنىڭ 6 - ايدىڭ 8 - كۇنى بەيجيڭنەن بەرگەن حابارى (تىلشىلەر لي جۇڭفا، ۋ جيالين). بەيبىتشىلىك دابىلى شىعىستا قاعىلىپ، دوستىق باياندى جالعاستى. جۇڭحۋا حالىق رەسپۋبليكاسىنىڭ «دوستىق وردەنىن» تابىستاۋ ءراسىمى 6 - ايدىڭ 8 - كۇنى تۇستەن كەيىن حالىق سارايىنىڭ التىن زالىندا سالتاناتپەن وتكىزىلدى. مەملەكەت ءتوراعاسى شي جينپيڭ رەسەي زۇڭتۇڭى پۋتينگە تۇڭعىش «دوستىق وردەنىن» تابىستادى.
  ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق شۋجيچۋدىڭ شۋجيى، پارتيا مەن مەملەكەتتىڭ ەڭبەك ءسىڭىرۋ - داڭق - ماراپاتتاۋ قىزمەتى كوميتەتىنىڭ مەڭگەرۋشىسى ۋاڭ حۋنيڭ، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى حان جىڭ وردەن تابىستاۋ راسىمىنە قاتىناستى.
  حالىق سارايىنىڭ التىن زالى اسەم نۇرعا مالىنىپ، مەرەيلى، سالتاناتتى لەپكە بولەندى. قىزىل ءتۇستى ۇلكەن ارتقى تاقتادا التىن ءتۇستى «دوستىق وردەنىنىڭ» ورنەگى جانە حانزۋ، ورىس تىلدەرىندە جازىلعان «جۇڭحۋا حالىق رەسپۋبليكاسىنىڭ دوستىق وردەنىن تابىستاۋ ءراسىمى» دەگەن جازۋ ەرەكشە كوز تارتتى. ارتقى تاقتا الدىنا جۇڭگو مەن رەسەيدىڭ مەملەكەت تۋى قاتار ءتىزىلدى.
  ساعات 17دەن 55 مينۋت وتكەندە، قۇرلىق، تەڭىز، اۋە ارميالارىنىڭ ايبىندى 18 قۇرمەت قاراۋىلى نىق تا پارمەندى قاداممەن زالعا كىرىپ، مىنبەردىڭ ەكى جاعىنا كەلىپ تۇردى. وردەن تابىستاۋ ءراسىمى رەسمي باستالدى.
  سالتاناتتى قۇرمەت مۋزيكاسى ورىندالىپ، شي جينپيڭ مەن پۋتين قاتارلاسىپ التىن زالعا كىردى. زالداعىلار تۇگەل ورىندارىنان تۇرىپ، ولارعا ىززەتپەن قىزۋ قول شاپالاق سوقتى.
  ەكى ەلدىڭ مەملەكەت باسشىلارى وردەن تابىستاۋ مىنبەرىنە شىقتى، زالداعىلار تۇگەل قۇرمەتپەن تىك تۇردى، جۇڭحۋا حالىق رەسپۋبليكاسىنىڭ مەملەكەت گيمنى ورىندالدى، شىرقالدى.
  قىزۋ قول شاپالاق ءۇنى ىشىندە، شي جينپيڭ ءسوز سويلەدى.
  شي جينپيڭ مىنالاردى اتاپ كورسەتتى: جۇڭحۋا حالىق رەسپۋبليكاسىنىڭ «دوستىق وردەنى» جۇڭگو مەملەكەتىنىڭ شەتەلدىكتەرگە بەرەتىن ەڭ جوعارى داڭق وردەنى، ول جۇڭگونىڭ وسىزامانداندىرۋ قۇرىلىسىنا قولداۋ كورسەتۋدە، جۇڭگو مەن شەتەلدىڭ اۋىس - كۇيىسىن، ىنتىماقتاستىعىن جەبەۋدە، الەمنىڭ بەيبىتشىلىگىن قورعاۋدا ەرەن ۇلەس قوسقان شەتەلدىك دوستارعا بەرىلەدى. پۋتين زۇڭتۇڭ الەمدىك ىقپالعا يە ءىرى ەلدىڭ كوسەمى ءارى جۇڭگو حالقىنىڭ كونە دوسى، جاقسى دوسى. پۋتين زۇڭتۇڭنىڭ كوپ جىلدان بەرى ايرىقشا ءمان بەرۋىنىڭ جانە ءوز قولىمەن ىلگەرىلەتۋىنىڭ ارقاسىندا، جۇڭگو - رەسەي قارىم - قاتىناسى حالىقارالىق جاعدايدىڭ الماعايىپ وزگەرىسىنىڭ سىناعىنان ءوتىپ، ساياسي جانە ستراتەگيالىق ءوزارا سەنىمدىلىك ۇزدىكسىز تەرەڭدەپ، ءار سالاداعى سىندارلى ىنتىماقتاستىق قارىشتاي دامىپ، ەكى ەل حالقىنىڭ دوستىعى ۇزدىكسىز تەرەڭدەدى. جوعارى دەڭگەيدەگى جۇڭگو - رەسەي قارىم - قاتىناسى ەكى ەل حالقىن باقىتقا كەنەلتىپ، الەمدەگى ءىرى ەلدەردىڭ، كورشى ەلدەردىڭ جاراسىمدى تاتۋلىعىنىڭ ۇلگىسى رەتىندە اتالىپ، جاڭاشا حالىقارالىق قارىم - قاتىناس ورناتۋ، ادامزاتتىڭ تاعدىرلاس ورتاق تۇلعاسىن ورناتۋ ءۇشىن ماڭىزدى ۇلەس قوستى.
  شي جينپيڭ مىنالاردى باسا دارىپتەدى: بۇل سالماقتى «دوستىق وردەنى» جۇڭگو حالقىنىڭ پۋتين زۇڭتۇڭعا دەگەن اسقاق قۇرمەتىنىڭ ۋاكىلى، ونان دا ماڭىزدىسى، ول جۇڭگو مەن رەسەي سىندى ەكى ۇلى ۇلتتىڭ تەرەڭ دوستىعىنىڭ ايگىلەنۋى. جاڭا باستامادا تۇرىپ، مەن پۋتين زۇڭتۇڭمەن بىرگە تاتۋ كورشىلىك دوستىق، ستراتەگيالىق سەلبەستىك، ىنتىماقتاسىپ تەڭ ۇتۋ رۋحىن ۇستانىپ، جۇڭگو مەن رەسەي قارىم - قاتىناسىنىڭ اناعۇرلىم جارقىن بولاشاققا بىرگە جەتەكتەۋدى قالايمىن.
  وسىدان سوڭ، ۋاڭ حۋنيڭ «مەملەكەت ءتوراعاسىنىڭ وردەن تابىستاۋ بۇيرىعىن» وقىدى: «جۇڭحۋا حالىق رەسپۋبليكاسىنىڭ مەملەكەتتىك وردەندەر جانە مەملەكەتتىك اتاق - داڭقتار تۋرالى زاڭى» بويىنشا، جۇڭحۋا حالىق رەسپۋبليكاسىنىڭ «دوستىق وردەنى» رەسەي فەدەراتسياسىنىڭ زۇڭتۇڭى ۆلاديمير ۆلاديميروۆيچ پۋتينگە ارنايى تابىستالىپ، پۋتين زۇڭتۇڭنىڭ ۇزاق ۋاقىتتان بەرى جۇڭگو مەن رەسەيدىڭ تاتۋ كورشىلىك دوستىعىن جانە جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ دامۋىن ىلگەرىلەتكەن قۇلشىنىسى جانە سول ءۇشىن قوسقان ماڭىزدى ۇلەسى ماراپاتتالسىن!».
  مەملەكەت تۋىن ۇستاعان ەكى قاراۋىلدىڭ قورعاۋىندا، قۇرمەت قاراۋىلى قولىنا جۇڭحۋا حالىق رەسپۋبليكاسىنىڭ «دوستىق وردەنى» سالىنعان تاباقتى ۇستاپ، مىنبەرگە كەلدى. التىن ءتۇستى وردەن جارقىراپ، شۇعىلا شاشىپ تۇردى.
  ءراسىم كەرنايى التىن زالدى جاڭعىرتىپ، شي جينپيڭ وردەندى سالتاناتتى تۇردە پۋتيننىڭ كەۋدەسىنە ءىلدى. ەكى ەل مەملەكەت باسشىلارى ىقىلاسپەن قول الىستى. زالدى تاعى ءبىر مارتە شاتىرلاعان دۋ قول شاپالاق ءۇنى كەرنەدى.
  اسكەري وركەستر رەسەي فەدەراتسياسىنىڭ مەملەكەت گيمنىن ورىندادى.
  پۋتين العىس ءسوز سويلەدى. پۋتين بىلاي دەدى: ءتوراعا شي جينپيڭنىڭ جۇڭحۋا حالىق رەسپۋبليكاسىنىڭ تۇڭعىش «دوستىق وردەنىن» ماعان تابىستاعانىنا ايرىقشا العىس ايتامىن. مەن بۇنى زور داڭق دەپ سەزىنەمىن. بۇل تەك جەكە ماعان عانا بەرىلگەن ەڭ جوعارى داڭق ەمەس، ونان دا ماڭىزدىسى، ول رەسەي - جۇڭگو جان - جاقتى ستراتەگيالىق قارىم - قاتىناسىنىڭ جوعارى دەڭگەيىن جانە جۇڭگو حالقىنىڭ رەسەي حالقىنا دەگەن تەرەڭ سۇيىسپەنشىلىگى مەن مىعىم دوستىعىن ايگىلەدى. ءبىز رەسەي - جۇڭگو جان - جاقتى ستراتەگيالىق سەلبەستىك سەرىكتەستىك قارىم - قاتىناسىن قادىرلەيمىز. ەكى ەلدىڭ ستراتەگيالىق ىنتىماقتاستىعىنىڭ مىعىم نەگىزى − ەكى ەل مەملەكەت باسشىلارى اراسىنداعى دوستىق جانە ەكى ەل حالقى اراسىنداعى سۇيىسپەنشىلىك. مەن بۇل ايرىقشا ءماندى وردەندى قاستەرلەپ ساقتايمىن، سونداي - اق ءتوراعا شي جينپيڭمەن قول ۇستاسا قۇلشىنىپ، رەسەي مەن جۇڭگونىڭ گۇلدەنىپ - كوركەيۋى ءۇشىن بىرگە كۇش سالۋدى قالايمىن.
  وردەن تابىستاۋ راسىمىنە تاعى ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق شۋجيچۋدىڭ شۋجيى، ورتالىق كوميتەت كەڭسەسىنىڭ مەڭگەرۋشىسى ديڭ شۋەشياڭ، ج ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىعى ۋاڭ چىن، ج ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى سۇن چۇنلان، ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق سىرتقى ىستەر قىزمەتى كوميتەتى كەڭسەسىنىڭ مەڭگەرۋشىسى ياڭ جيەچى، ج ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى حۋ چۇنحۋا، مەملەكەتتىك كەڭەس مۇشەسى، قوسىمشا سىرتقى ىستەر مينيسترى ۋاڭ ي، مەملەكەتتىك كەڭەس مۇشەسى، قوسىمشا مەملەكەتتىك كەڭەستىڭ باس حاتشىسى شياۋ جيە، مەملەكەتتىك ساياسي كەڭەستىڭ ورىنباسار ءتوراعالارى جاڭ چيڭلي، باتىر، حى ليفىڭ قاتىناستى. جۇڭگو - رەسەي قارىم - قاتىناسى ءۇشىن ۇلەس قوسقان جۇڭگو مەن رەسەيدىڭ ءار سالاسىنداعى دوس قايراتكەرلەر، فاشيزمگە قارسى سوعىس ارداگەرلەرىنىڭ ۋاكىلدەرى نەمەسە ولاردىڭ ۇرپاقتارى، جۇڭگو مەن رەسەي جاستارىنىڭ ۋاكىلدەرى، رەسەيدىڭ جۇڭگودا تۇراتىن ەلشىلىگىندەگى ديپلوماتتار سياقتى 700دەن استام ادام وردەن تابىستاۋ راسىمىنە قاتىناستى.


بەرىپ كەت ورامالىڭدى

دوستار

الىستاعى اق ەركە