جاڭا حابارلار

تەڭىزشىدەن جۇمىسشىلار قوزعالىسىنىڭ ۇزدىك كوسەمىنە اينالعان ـــ سۋ جاۋجىڭ

    كەلۋ قاينارى: شينجياڭ حالىق راديو ىستانسياسى    2018-06-09 23:36:22  
سۋ جاۋجىڭ گۋاڭدۇڭ ولكەسى جۋحاي قالاسى تاڭجياۋان قالاشىعى چي-اۋ قىستاعىنىڭ ادامى، 1885-جىلى كەدەي ديحان وتباسىندا دۇنيەگە كەلگەن. 1903-جىلى 18 جاستاعى سۋ جاۋجىڭ كۇن كورىس ءۇشىن، شياڭگاڭعا بارىپ، شەتەل پاراحوتىنا شىعىپ قارا جۇمىس ىستەيدى، ءارى وسى بارىستا توڭكەرىس ىسىمەن جارعاق قۇلاعى جاستىققا تيمەي جۇرگەن سۇن جۇڭشانمەن تانىسادى. سۇن جۇڭشانىڭ كومەگىندە جانە ونىڭ شابىتتاندىرۋىمەن، سۋ جاۋجىڭ 1908-جىلى وداققا مۇشە بولىپ، چيڭ ۇكىمەتىنىڭ فەودالدىق دارا بيلىك ۇستەمدىگىن اۋدارۋدى ماقسات ەتكەن توڭكەرىستىك قيمىلىنا بەلسەنە قاتىناسادى. سۇن جۇڭشاندار قۋعىنداۋعا ۇشىراعاندا، سۋ جاۋجىڭ ورايىن تاۋىپ ولاردىڭ قاتەردەن قۇتىلۋىنا قول ۇشىن بەرەدى.
1921-جىلى 3-ايدا، سۋ جاۋجىڭ جانە لين ۋيمينداردىڭ دارىپتەۋىمەن، شياڭگاڭدا جۇڭحۋا تەڭىزشى جۇمىسشىلار ۇيىمىنىڭ بىرىككەن باس ۇيىمى قۇرىلدى. 1922-جىلى 1-ايدا 12-كۇنى، شياڭگاڭدا تەڭىزشىلەردىڭ كولەمدى جۇمىس تاستاۋ قيمىلىندا، سۋ جاۋجىڭ جۇمىس تاستاۋ ءىس باسقارماسى باس ءبولىمنىڭ مەڭگەرۋشىسى جانە كەلىسسوز ۋاكىلىنىڭ ءبىرى بولىپ سايلانادى.
1925-جىلى كوكتەمدە، سۋ جاۋجىڭ جۇڭگو كوممۋنيستىك پارتياسىنا مۇشە بولادى. پارتياعا كىرگەننەن كەيىن، سۋ جاۋجىڭ ىلگەرىندى-كەيىندى مەملەكەتتىك باس جۇمىسشى ۇيىمى دايىندىق كوميتەتىنىڭ مۇشەسى، جۇڭحۋا تەڭىزشى جۇمىسشىلار بىرلەستىگى باس ۇيىمىنىڭ باستىعى، مەملەكەتتىك باس جۇمىسشى ۇيىمى اتقارۋ كوميتەتىنىڭ باستىعى، جۇڭگو جۇمىسشىلار قوزعالىسىنىڭ ايگىلى كوسەمى بولدى. جۇڭگو كوممۋنيستىك پارتياسىنىڭ 5-قۇرىلتايىندا، سۋ جاۋجىڭ جۇڭگو كوممۋنيستىك پارتياسى ورتالىق كوميتەتىنىڭ مۇشەسى، ساياسي بيۋرونىڭ كانديدات مۇشەسى؛ پارتيا 7-تامىز ءماجىلىسى مەن جۇڭگو كوممۋنيستىك پارتياسىنىڭ 6-قۇرىلتايىندا، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، تۇراقتى مۇشەسى مىندەتىنە تاعايىندالادى.
جاپالى كۇرەس ورتاسىندا، ۇزاق ۋاقىت بەرىلە قىزمەت ىستەگەندىكتەن، سۋ جاۋجىڭ ناۋقاسقا شالدىعىپ، 1929-جىلى 2-ايدىڭ 25-كۇنى قايتىس بولدى. ءومىرىنىڭ سوڭىنا دەيىن، سۋ جاۋجىڭ بۇقارانى كۇرەس جاساۋعا ۇيىمداستىرۋ ءىسىن ەسىنەن شىعارماي، وزىنە امانداسا بارعان جۋ ىنلاي سياقتى كىسىلەرگە: «حالىق بۇقاراسى تۇرمىس كەشىرۋگە شاراسىز قالدى، توڭكەرىس جاساۋى قاجەت، ولار ءبىزدىڭ ۇيىمداستىرۋىمىزدى كۇتىپ تۇر. كوپشىلىك تىزە قوسا وتىرىپ، بىرلىكتە سەلبەسىپ، توڭكەرىستىڭ سوڭعى جەڭىسىنە قول جەتكىزۋى كەرەك»،-دەدى.
1929-جىلى 2-ايدىڭ 26-كۇنى جۇڭگو كوممۋنيستىك پارتياسى ورتالىق كوميتەتىنىڭ ساياسي بيۋروسى بۇكىل پارتياداعىلارعا سۋ جاۋجىڭ جولداستىڭ قازاسىنا ازا ءبىلدىرۋ جونىندەگى 32-ءنومىرلى ۇقتىردى شىعاردى. ۇقتىرۋدا: «سۋ جاۋجىڭ جولداس قىزمەت بارىسىندا، پرولەتارياتتىڭ قاجىرلىلىقپەن كۇرەس جاساۋ رۋحى مەن باتىل ساياسي تانىمىن ايگىلەدى، ونىڭ توڭكەرىستىك رۋحى بۇكىل پارتيامىزداعىلاردىڭ ۇلگىسى»،-دەپ اتاپ كورسەتىلگەن. ۇقتىرۋدا تاعى بۇكىل پارتياداعىلاردىڭ سۋ جاۋجىڭنىڭ توڭكەرىستىك رۋحىنان ۇيرەنىپ، ۇزدىكسىز العا باسىپ، كۇرەس جاساۋى تالاپ ەتىلدى. جەر-جەردەگى پارتيا ۇيىمى ءتۇرلى فورمادا ازا ءبىلدىرۋ قيمىلىن وتكىزىپ، جۇڭگو كوممۋنيستىك پارتياسىنىڭ تاڭداۋلى مۇشەسى جانە جۇمىسشىلار قوزعالىسىنىڭ ۇزدىك باسشىسىن ەسكە الدى.

بەرىپ كەت ورامالىڭدى

دوستار

الىستاعى اق ەركە