جاڭا حابارلار

14-كەزەكتى جۇڭگو-شىنجىن حالىقارالىق مادەنيەت كاسىبى كورمەسى اشىلىپ، رايونىمىزدان 37 مادەنيەت ورنى مەن كاسىپورىن كورمەگە قاتىناستى

    كەلۋ قاينارى: شينجياڭ حالىق راديو ىستانسياسى    2018-05-11 13:00:11  

ستانسيامىز ءتىلشىسى دۇڭ جىيۇڭنىڭ حابارى: 14-كەزەكتى جۇڭگو-شىنجىن حالىقارالىق مادەنيەت كاسىبى كورمەسى 5-ايدىڭ 10-كۇنى اشىلدى، شينجياڭ «جاڭا ءداۋىر. جاڭا شينجياڭ» تاقىرىبىندا ۇيىرمە ۇيىمداستىرىپ، كورمەگە قاتىناستى.
شىنجىن كورمە ورتالىعىنىڭ 1-ءنومىرلى سارايىنداعى شينجياڭ كورمە ورنىندا شينجياڭنىڭ از ۇلت ءان-ءبي ويىندارى، اتلاس كويلەك مودەلى، گۋمانيتارلىق كورىنىس ۇگىتى سياقتى قيمىلدار وتكىزىلدى..... كورمە رايونىندا جالپىلىق كورىنىس ۇلگىسىمەن شينجياڭنىڭ تاريح، مادەنيەت، ساياحات، كوركەمونەر، ساۋدا-ساتتىق، دەنەتاربيە سياقتى جاقتارى ءار قىرىنان بەينەلەنىپ، شينجياڭنىڭ كوپ نەگىزدى مادەنيەتىنىڭ جۇڭحۋا وركەنيەتىنىڭ قۇنارلى توپىراعىنا تەرەڭ تامىر تارتىپ، ۇزاق ۋاقىتتىق اۋىس-كۇيىس جاساۋ، توعىسۋ بارىسىندا جارىققا شىققان وزىنە ءتان ەرەكشە كەلبەتى ايگىلەنىپ، كورەرمەندەردى ءتانتى ەتتى. گۋاڭدۇڭدىق كورەرمەن لي حانىم: «وتە تارتىمدى ەكەن. مادەنيەت پەن ۇلتتىق سالت-سانا، ساياحات كورىنىس تۇيىندەرى ۇشتاستىرىلعان، ول ادامدى وزىنە ەرىكسىز باۋرايدى ەكەن، وراي بولسا، شينجياڭعا بارامىن»،-دەدى.
«شىنجىن مادەنيەت كورمەسى» مەملەكەت دارەجەلى، حالىقارالانعان، امبەباپ مادەنيەت كاسىبى كورمەسى ەسەپتەلەدى. بيىل رايونىمىز وسى كورمەگە 12-رەت قاتىناسىپ وتىر، بۇل جولعى كورمەدە شينجياڭ كورمە سارايىنىڭ يەلەگەن جەر اۋدانى 240 شارشى مەتر، ول مادەنيەتتى شينجياڭ، جاڭالىقشىل شينجياڭ، توعىسپالى شينجياڭ، ۋادەلى شينجياڭ، دامىعان شينجياڭ سياقتى 5 ۇلكەن بولەكتەن قۇرام تاپقان. ول شينجياڭداعى 37 مادەنيەت كاسىپورنى نەمەسە قاتىستى قۇرىلىمداردى كورمەگە قاتىناسۋعا باۋراعان، شىنجىن مادەنيەت كورمەسىنە تۇڭعىش قاتىناسقان شينجياڭ التاي ساياحات كاسىبىن دامىتۋ توبى شەكتى سەرىكتەستىگىنىڭ كورمەگە قاتىناسۋشى ورنىنىڭ جاۋاپتىسى چىن جۇڭباۋ: «وسى تەكشە ارقىلى كوپ جاقتان ۇيرەنۋ جانە تاجىريبە اۋىستىرۋ ورايىنا يە بولدىق. التايدىڭ ساياحات كاسىبىن مادەنيەتپەن توعىستىرىپ اناعۇرلىم ويداعىداي دامىتىپ، بۇكىل ەلىمىزدىڭ، ءتىپتى دۇنيە ءجۇزىنىڭ ساياحاتشىلارىن التايعا كەلىپ ساياحاتتاۋعا باۋراۋىمىز ءتيىس»،-دەدى.
وسى كۇنى تۇستەن كەيىن، ولكە-قالالاردىڭ ءتۇيىندى مادەنيەت كاسىبى نىساندارىنا توقتامداسۋ سالتىندا، رايونىمىزداعى كوپتەگەن مادەنيەت كاسىپورىندارى مەن ورىندار ەلىمىزدەگى توقتامداسۋ ويى بار كوپتەگەن مادەنيەت كاسىپورىندارىمەن جانە ورىندارىمەن توقتامداسىپ، توقتامداسۋ نىساندارىنىڭ قارجىسى 3 ميلليارد يۋاننان استى. شينجياڭ چيمىڭ حۋاگۋاڭ مادەنيەت اقپارات قۇرالدارى شەكتى سەرىكتەستىگى بەيجيڭ شيڭگۋاڭ توبىمەن قارجىسى 160 ميلليون يۋاندىق نىسان توقتامىن جاساستى. سەرىكتەستىكتىڭ باس جوراسى جيا جىجيە تىلشىگە، وسى نىساننىڭ ءداستۇرلى مادەنيەتتى دامىتۋ، جاسامپازدىق جاراتۋ، جاڭالىق اشۋ، كورمەگە قويۋ اۋىس-كۇيىسىن جاساۋ، دارىندىلاردى جەتىلدىرۋ، زەرتتەپ كەمەلدەندىرۋ سياقتى يقۋاتتاردى ءبىر تۇلعالاندىرىپ، شينجياڭداعى ورەندەر مەن بالالار مادەنيەت كوركەمونەر اۋىس-كۇيىسىنە ارناۋلى تەكشە قۇراتىندىعىن ايتىپ: «ءبىز وسىدان اناعۇرلىم كوپ ابزالدىلىققا يە وقىتۋشى قاينارى كۇشىنە يە بولدىق، ونان سوڭ وسى تەكشە ارقىلى بۇرىنعىدان دا كوپ ءارى جاقسى اقپارات قۇرالى تەكشەسىمەن تانىسامىز، بۇل ءارى بالالارىمىزعا اناعۇرلىم كوپ ءوزىن ايگىلەۋ ورتاسىن جاراتادى»،-دەدى.
اۆتونوميالى رايوندىق مادەنيەت مەڭگەرمەسىنىڭ باستىعى ءيۇيسۇپجان مامەت بىلاي دەدى: «وسى رەتكى مادەنيەت كورمەسىنە قاتىناسۋ ارقىلى مادەنيەت كاسىبىن دامىتۋ تانىمىمىزدى جوعارىلاتۋىمىزعا مۇمكىندىك تۋدى. شينجياڭنىڭ مول مادەنيەت بايلىعىن جوعارى عىلىم-تەحنيكا فورماسىمەن جانە ينتەرنەت تاسىلىمەن بۇكىل ەلىمىزدەگى دوستارعا تانىستىرىپ، وسى ارقىلى شينجياڭنىڭ مادەنيەت كاسىبىنىڭ دامۋىن جەبەۋىمىز كەرەك».


بەرىپ كەت ورامالىڭدى

دوستار

الىستاعى اق ەركە