جاڭا حابارلار

سوتسياليزمنىڭ قۇرىلىسشىلارى مەن ءىزباسارلارىن تاربيەلەۋدەي ءتۇبىرلى مىندەتتى مىقتى يگەرىپ، دۇنيە جۇزىندەگى ماڭداي الدى جۇڭگوشا ۋنيۆەرسيتەت قۇرۋعا قۇلشىنۋدى باسا دارىپتەدى

    كەلۋ قاينارى: شينجياڭ گازەتى    2018-05-04 17:42:38  

شي جينپيڭ بەيجيڭ ۋنيۆەرسيتەتىندە قىزمەت تەكسەردى

ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 5-ايدىڭ 2-كۇنى بەيجيڭ ۋنيۆەرسيتەتىندە قىزمەت تەكسەردى. سۋرەتتە: شي جينپيڭ بەيجيڭ ۋنيۆەرسيتەتىنىڭ ماركسيزم ينستيتۋتىندا «جاڭا داۋىرگە تۇسىنىك» دەگەن تاقىرىپ اياسىندا اڭگىمە ءماجىلىس وتكىزىپ جاتقان جۇڭگولىق، شەتەلدىك وقۋشىلارمەن ىقىلاستى اڭگىمەدە.

سۋرەتتى شينحۋا اگەنتتىگىنىڭ ءتىلشىسى لي تاۋ تۇسىرگەن

شينحۋا اگەنتتىگىنىڭ 5-ايدىڭ 2-كۇنى بەيجيڭنەن بەرگەن حابارى: 5-ايدىڭ 4-كۇنى جاستار مەرەكەسىنىڭ جانە بەيجيڭ ۋنيۆەرسيتەتى قۇرىلعاندىعىنىڭ 120 جىلدىق مەرەيتويى قارساڭىندا، ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭ ۋنيۆەرسيتەتىندە قىزمەت تەكسەردى. شي جينپيڭ پارتيا ورتالىق كوميتەتى اتىنان بەيجيڭ ۋنيۆەرسيتەتىندەگى بارلىق وقىتۋشى-وقۋشىلارعا، جۇمىسشى-قىزمەتكەرلەرگە جانە ەلدىڭ ءىشى-سىرتىنداعى مەكتەپتەستەرگە، بۇكىل ەلدەگى ءار ۇلت جاستارىنا، بۇكىل ەلدەگى جاستار قىزمەتىمەن شۇعىلدانۋشىلارعا مەرەكەلىك سالەم جولدادى. ول مىنالاردى باسا دارىپتەدى: جۇڭگوشا سوتسياليزمگە ويداعىداي تاباندى بولىپ جانە ونى ويداعىداي دامىتىپ، ەلىمىزدى سوتسياليستىك وسىزاماندانعان قۇدىرەتتى ەل ەتىپ قۇرىپ شىعۋ − ۇزاق مەرزىمدى مىندەت، ول ۇرپاقتار بويى تالماي كۇرەس جۇرگىزۋدى تالاپ ەتەدى. قالىڭ جاستار جۇڭحۋا ۇلتىنىڭ ۇلى گۇلدەنۋىن ىسكە اسىرۋدىڭ جالىندى كۇشى بولىپ، مەملەكەت پەن ۇلتتىڭ ءۇمىتىن ارقالاۋى كەرەك. جوعارى مەكتەپتەر سوتسياليزمنىڭ قۇرىلىسشىلارى مەن ءىزباسارلارىن تاربيەلەۋدەي ءتۇبىرلى مىندەتتى مىقتى يگەرىپ، مەكتەپ باسقارۋدىڭ دۇرىس ساياسي بەتالىسىنان جازباي، جوعارى ساپالى وقىتۋشىلار قوسىنىن قۇرىپ، جوعارى دەڭگەيلى دارىندىلار تاربيەلەۋ جۇيەسىن قالىپتاستىرىپ، دۇنيە جۇزىندەگى ماڭداي الدى جۇڭگوشا ۋنيۆەرسيتەت قۇرۋعا قۇلشىنۋى كەرەك.
كوكتەم ماۋسىمىندا، بەيجيڭ ۋنيۆەرسيتەتى گۇلمەن كومكەرىلىپ، جاسىل جەلەك جامىلىپ، جالىندى تىرشىلىك تىنىسى ەسەدى. تۇستەن بۇرىن ساعات 9 مولشەرىندە شي جينپيڭ ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ۋاڭ حۋنيڭ، بەيجيڭ ۋنيۆەرسيتەتى پارتكومىنىڭ شۋجيى حاۋ پيڭ، مەكتەپ باستىعى لين جيانحۋالاردىڭ سەرىك بولۋىمەن الدىمەن لينحۋشۋانعا كەلىپ، «جاڭا ءداۋىر − بەيجيڭ ۋنيۆەرسيتەتىنىڭ وتكەن 5 جىلداعى جەتىستىكتەرى كورمەسىن» تاماشالادى. كونەنىڭ كوزىندەي لينحۋشۋاندا كورمە تاقتايلارى جازۋ-سۋرەتتەرىمەن كوز تارتىپ، ساناق دەرەكتەرى انىق، ءدال سىر شەرتەدى. شي جينپيڭ جاعدايدان تانىستىرۋدى مۇقيات تىڭداپ، بەيجيڭ ۋنيۆەرسيتەتىنىڭ گۋمانيتارلىق جانە جاراتىلىستىق عىلىمدارداعى جەتىستىكتەرى، دارىندى تاربيەلەۋ، قوسىن قۇرىلىسى، حالىقارالىق بايلانىس، الەۋمەتتىك قىزمەت كورسەتۋ سياقتى جاقتارداعى ماڭىزدى تابىستارى تۋرالى كورمەنى دەن قويا قاراپ، بەيجيڭ ۋنيۆەرسيتەتىنىڭ ناتيجەلەرىن تولىق تۇراقتاندىردى. ول مىنالاردى ءبىلدىردى: پارتيانىڭ 18-قۇرىلتايىنان بەرى، بەيجيڭ ۋنيۆەرسيتەتى داڭقتى داستۇرگە مۇراگەرلىك ەتىپ، سوتسياليستىك مەكتەپ باسقارۋ باعىتىنا تاباندى بولدى، ءمورالدى ادام تاربيەلەۋ جاعىنداعى جەتىستىكتەرى قوماقتى، قوس ماڭداي الدى ۋنيۆەرسيتەت قۇرۋداعى تابىستارى كورنەكتى، ەكونوميكالىق، قوعامدىق دامۋعا قىزمەت كورسەتۋدەگى ناتيجەسى ەلەۋلى، مەكتەپتىڭ دامۋ وي جۇلگەسى انىق بولدى، مەكتەپ باسقارۋ قۋاتى مەن ىقپال كۇشى ايتارلىقتاي نىعايدى، بۇل ادامدى قۋانتادى. ول مىنالاردى باسا دارىپتەدى: مەملەكەتتىڭ دامۋى مەن ۋنيۆەرسيتەتتىڭ دامۋى ءبىرىن-ءبىرى سۇيەنىش ەتەدى جانە تولىقتىرادى. ءبىز مەملەكەتتىڭ دامۋ ۇدەرىسىندە جوعارى وقۋ-اعارتۋدى جاقسى باسقارىپ، دۇنيە جۇزىندەگى ماڭداي الدى ۋنيۆەرسيتەت قۇرۋ ءۇشىن، ەڭ اۋەلى، جۇڭگوشا ەرەكشەلىكتى ايگىلەۋگە كۇش سالۋىمىز قاجەت.
لينحۋشۋاننىڭ سولتۇستىگىندەگى شاعىن اۋلانىڭ ىرگەسى ۋيميڭحۋعا ءتيىپ تۇر، كوركى كوز سۇرىندىرەدى. شي جينپيڭ اۋلاعا بارىپ، ءبىر ءبولىم ساقا پروفەسسورلار مەن ورتا جاس، جاس وقىتۋشىلاردىڭ ۋاكىلدەرىنە امانداستى ءارى ولارمەن شۇيىركەلەسە اڭگىمەلەستى. ولاردىڭ اراسىندا دىڭ شياۋنان، ۋاڭ جيسى، لين يفۋ، چيان چىڭدان، شىن دان، دۋ ۋيميڭ، ان لىجى سياقتى ساقا پروفەسسورلار دا، پىڭ فىڭ، چۇي جيڭدۇڭ، يۇي مياۋجيە، جياڭ لاڭلاڭ سياقتى ۇزدىك ورتا جاس، جاس وقىتۋشىلار دا بار. شي جينپيڭ ولارعا بىلاي دەدى: سىزدەردىڭ دەندەرىڭىز ساۋ، رۋحتارىڭىزدىڭ كوتەرىڭكى ەكەنىن كورىپ وتە قۋاندىم، سىزدەر ونداعان جىلداردى ءبىر كۇنگىدەي وتكىزىپ، قولدارىڭىزدان قالام تاستاماي، ۇقىپتىلىقپەن ادام تاربيەلەپ، پارتيا مەن حالىق قاجەت ەتكەن ۇزدىك دارىندىلار تاربيەلەۋگە بەلسەندى ۇلەس قوستىڭىزدار، سىزدەرگە قۇرمەت بىلدىرەمىن. ا ق ش ازاماتى، سينولوگ-ۇستاز ان لىجى مىرزا «كۇڭزى عاقىليالارى»، «سۇنزىنىڭ اسكەري ايلاسى» سياقتى جۇڭگونىڭ ءداستۇرلى كلاسسيكالىق شىعارمالارىن اۋدارعان، 2013-جىلى 6-كەزەكتى دۇنيە جۇزىلىك رۋشۋە قۇرىلتايى تاعايىنداعان «كۇڭزى مادەنيەت سيلىعىنىڭ» يەگەرى. شي جينپيڭ ونىڭ قايسى ۋنيۆەرسيتەتتەن كەلگەنىن، جۇڭگوعا كەلگەنىنە قانشا ۋاقىت بولعانىن، وسى جەردىڭ تۇرمىسىنا كوندىككەن-كوندىكپەگەنىن تاپتىشتەپ سۇرادى ءارى ونىڭ شەتەلگە جۇڭگونىڭ تاڭداۋلى ءداستۇرلى مادەنيەتىن كوبىرەك تانىستىرۋىن ءۇمىت ەتتى. باس شۋجي ورتا، جاس بۋىن وقىتۋشىلاردى اعا بۋىن مامان-وقىمىستىلاردان ۇيرەنىپ، وقىتۋ مەن عىلمي زەرتتەۋ ىستەرىندە قۇنتتاپ ەڭبەك ەتە بەرۋگە ىنتالاندىردى.
سوڭعى جىلدارى، بەيجيڭ ۋنيۆەرسيتەتى دۇنيە جۇزىندەگى وزىق دەڭگەيلى عالىمدار مەن عىلىم-تەحنيكا كوشباسشىلارىن جانە جاڭاشىل توپتاردى تاربيەلەپ جانە جيناپ، عىلمي زەرتتەۋ جالپىلىق قۋاتى مەن ءتول جاسامپازدىق قابىلەتى ايتارلىقتاي نىعايدى. جينگۋاڭ تىرشىلىك عىلىمى عيماراتىنىڭ ءبىرىنشى قاباتىنداعى زالدا، سوڭعى جىلدارى بەيجيڭ ۋنيۆەرسيتەتىنىڭ جاراتىلىستىق عىلىمدار، تەحنولوگيالىق عىلىمدار جانە مەديتسينا عىلىمدارى سياقتى سالالارداعى جەتىستىكتەرى كورمەگە قويىلىپتى. شي جينپيڭ مەكتەپتىڭ ءپان قۇرىلىسى، دارىندىلار قوسىنى قۇرىلىسى، عىلمي زەرتتەۋ، جاڭالىق اشۋ قابىلەتىن جوعارىلاتۋ سياقتى جاعدايلاردان تانىستىرۋدى مۇقيات تىڭدادى جانە جاڭا بۋىن باعانالىق كلەتكا تەحنيكاسى، كومىرتەك چيپى تەحنيكاسى، ميكرو قوس فوتوندى ميكروسكوپتىق كەسكىندەۋ جۇيەسى سياقتى عىلمي زەرتتەۋ قوندىرعىلارى مەن ناقتى مودەلدەردى مۇقيات كورىپ شىقتى. شي جينپيڭ كوپشىلىككە بىلاي دەدى: سىزدەردىڭ جەتىستىكتەرىڭىز تۋرالى كورمەنى كورگەننەن كەيىن، مەن سىزدەر ءۇشىن ماقتانىش سەزىندىم. جاڭالىق اشۋ − دامۋعا جەتەكشىلىك ەتەتىن ءبىرىنشى قوزعاۋشى كۇش، مەملەكەتتىڭ جالپىلىق قۋاتى مەن وزەكتى باسەكەلىك قۋاتىنداعى ەڭ شەشۋشى فاكتور. ماڭىزدى عىلىم-تەحنيكالىق جاڭالىق اشۋ جەتىستىكتەرى − مەملەكەتتىڭ اۋىر قارۋى، وتكىر قارۋى، ءسوز جوق، ءوز قولىمىزدا مىقتاپ ۇستاۋىمىز، ءسوز جوق، ءوز كۇشىمىزگە سۇيەنىپ، دەربەس جاڭالىق جاراتۋىمىز كەرەك. بۇل ماسەلەدە ءبىز، ءسوز جوق، سەرگەك بولۋىمىز قاجەت. عىلىم-تەحنيكا ءتۇزىلىسى رەفورماسىن ۇزدىكسىز تەرەڭدەتىپ، ادام، قازىنا، ماتەريالدى عىلىم-تەحنيكادا جاڭالىق اشۋدىڭ ءبىرىنشى شەبىنە كوبىرەك بەيىمدەپ، شەشۋشى جالپىلامالىق تەحنيكالار، الدىڭعى قاتارلى جەتەكشى تەحنيكالار، وسى زامانعى تەحنولوگيالار، توڭكەرىستىك تەحنيكالاردان جاڭالىق اشۋدا ءتىپتى زور جەتىستىكتەرگە جەتىپ، عىلىم-تەحنيكادا جاڭالىق اشۋ تۇعىرىن يەلەۋگە ۇمتىلۋ كەرەك. جوعارى مەكتەپتەر − عىلىم-تەحنيكادا جاڭالىق اشۋ جۇيەسىنىڭ ماڭىزدى قۇرامداس بولىگى، جوعارى مەكتەپتەردىڭ عىلمي زەرتتەۋ قىزمەتكەرلەرى − ەلىمىزدىڭ عىلىم-تەحنيكادا جاڭالىق اشۋداعى ماڭىزدى قوسىنى. پاندەر اراسىندا سەلبەسە جاڭالىق اشۋدى كۇشەيتىپ، ءپانارالىق عىلىمدار توبى مەن عىلىم-تەحنيكادان قامال الۋ توپتارىنا قولداۋدى كۇشەيتىپ، ءتىپتى كوپ حالىقارالىق دەڭگەيدەگى عىلىم-تەحنيكا دارىندىلارى مەن جاڭالىق اشۋ توپتارىن تاربيەلەۋ، دايىنداۋ كەرەك.
بەيجيڭ ۋنيۆەرسيتەتى − ماركسيزمنىڭ جۇڭگوعا تارالۋىنىڭ قاينار كوزى، سوڭعى جىلدارى ەلىمىز بويىنشا ءبىرىنشى بولىپ ماركسيزم ينستيتۋتىن قۇردى ءارى بيىل 1-ايدا شي جينپيڭنىڭ جاڭا ءداۋىر جۇڭگوشا سوتسياليزم يدەياسىن زەرتتەۋ ينستيتۋتىن اشتى. شي جينپيڭ وسى جەردە «بەيجيڭ ۋنيۆەرسيتەتى مەن ماركسيزم نەگىزگى تاقىرىپتىق كورمەسىن» تاماشالادى. شي جينپيڭ كورمەنى مۇقيات قاراپ، مەكتەپتىڭ ماركسيزم مەن جاڭا ءداۋىر جۇڭگوشا سوتسياليزم يدەياسىن وقىتۋ، زەرتتەۋ جاعدايىن ىشكەرىلەي ۇعىستى. ول مىنالاردى باسا دارىپتەدى: جوعارى مەكتەپتەردىڭ ماركسيزم ينستيتۋتتارى «ماركسيزم ينستيتۋتىنىڭ سيپاتى ماركسيزم، ماركسيزم ينستيتۋتىندا ماركسيزمنىڭ ءسوزىن سويلەۋ كەرەك» دەگەن ايقىن بەتالىس پەن مەكتەپ باسقارۋ پرينسيبىنە تاباندى بولىپ، ماركسيزمنىڭ يدەولوگيا سالاسىنداعى جەتەكشى ورنىن بەكەمدەۋدە، ماركسيزمنىڭ مەكتەپكە، ساباقحاناعا، وقۋشىلاردىڭ ساناسىنا ەنۋىن ىلگەرىلەتۋدە ءتيىستى رول اتقارۋى كەرەك.
ىلە-شالا شي جينپيڭ حالىقارالىق ماركستىك حۇجاتتار ورتالىعىنا بارىپ، مۇراعا ساقتالعان ماركستىك كلاسسيكالىق شىعارمالاردى كورىپ، «ماركسيزم قازىناسى ينجەنەرياسىنىڭ» اتقارىلۋ جاعدايىن ۇعىسىپ، ولاردىڭ قىزمەتىنىڭ توتەنشە ءماندى ەكەنىن القادى. كىتاپ وقۋ ۇيىندە جۇڭگولىق-شەتەلدىك وقۋشىلار «جاڭا داۋىرگە تۇسىنىك» تاقىرىبى بويىنشا اڭگىمە وتكىزىپ، پىكىر اۋىسىپ وتىر ەكەن. شي جينپيڭ ولاردىڭ ورتاسىنا بارىپ، تالقىنى مۇقيات تىڭدادى ءارى ولارمەن ءوزارا پىكىر اۋىستىردى. باس شۋجي ولاردان ماركسيزم ماماندىعىن نە ءۇشىن تاڭداعانىن، وسى ماماندىقتى ۇيرەنۋدەن قانداي اسەر العانىن سۇرادى، ساباقتاستار كوڭىلدەنە بىردەن-بىردەن جاۋاپ بەردى. ساباقتاستار باس شۋجيدەن «ءسىز تاباندى ماركسيزمشىلسىز، ءسىزدىڭ ماركسيزمدى ۇيرەنۋدە قانداي جاقسى ادىستەرىڭىز بار» دەپ سۇرادى، باس شۋجي ولارمەن ءوزىنىڭ ۇيرەنۋ تاجىريبەسىن ىقىلاستانا ءبولىستى. ول سوندا وتىرعان شەتەلدىك وقۋشىلارعا: جۇڭگونى ءتۇسىنۋ ءۇشىن، جۇڭگونىڭ تاريحىن، مادەنيەتىن، گۋمانيتارلىق ويلارى مەن دامۋ كەزەڭدەرىن، اسىرەسە، قازىرگى جۇڭگونىڭ ماركسيزمىن ءبىلۋ كەرەك،-دەدى. شي جينپيڭ مىنالاردى باسا دارىپتەدى: بەيجيڭ ۋنيۆەرسيتەتى − جۇڭگودا ەڭ العاش ماركسيزمدى تاراتقان جانە زەرتتەگەن ورىن، ماركسيزمنىڭ جۇڭگودا تارالۋى مەن جۇڭگو كوممۋنيستىك پارتياسىنىڭ قۇرىلۋىنا ماڭىزدى ۇلەس قوسقان. بيىل ماركستىڭ دۇنيەگە كەلگەنىنە 200 جىل، «كوممۋنيستىك پارتيا جارناماسىنىڭ» جارىق كورگەنىنە 170 جىل تولادى. پارتيا 19-قۇرىلتايىنىڭ رۋحى مەن جاڭا ءداۋىر جۇڭگوشا سوتسياليزم يدەياسى سىندى وسى ءبىر قازىرگى جۇڭگونىڭ ماركسيزمىن ويداعىداي زەرتتەۋ، ويداعىداي ۇگىتتەۋ، ويداعىداي دايەكتىلەندىرۋ − ماركسيزم مەن «كوممۋنيستىك پارتيا جارناماسىن» ەڭ تاماشا ەسكە الۋ بولماق. ول كوپشىلىكتى دۇنيە ءجۇزىنىڭ، مەملەكەتتىڭ، پارتيانىڭ جاعدايىنداعى وزگەرىستەرگە تىعىز ۇشتاستىرىپ، جاڭا ءداۋىر جۇڭگوشا سوتسياليزم يدەياسىن زەرتتەۋدى مۇقيات ورىستەتىپ، ءتىپتى كوپ، ءتىپتى سالماقتى، ءتىپتى يلانىمدى زەرتتەۋ جەتىستىكتەرىن الىپ شىعۋعا ىنتالاندىردى.
ساعات 11 مولشەرىندە شي جينپيڭ بەيجيڭ ۋنيۆەرسيتەتى يىڭجيە اۋىس-كۇيىس ورتالىعىنا بارىپ، وقىتۋشى-وقۋشىلارمەن اڭگىمەدە بولدى. بەيجيڭ ۋنيۆەرسيتەتى پارتكومىنىڭ شۋجيى حاۋ پيڭ، فيلوسوفيا فاكۋلتەتىنىڭ پروفەسسورى ۋاڭ بو، پسيحولوگيا جانە تانىم عىلىمدارى ينستيتۋتىنىڭ تولىق كۋرس 4-جىلدىق وقۋشىسى سۇڭ شي جەكە-جەكە لەبىز ءبىلدىردى. شي جينپيڭ ولاردىڭ لەبىزىن مۇقيات تىڭداپ، ءالسىن-ءالى ءسوز قوسىپ وتىردى، اڭگىمە وتە دۋماندى، قىزعىندى بولدى.
سوڭىندا شي جينپيڭ ماڭىزدى ءسوز سويلەدى. ول بىلاي دەپ اتاپ كورسەتتى: قالىڭ جاستار جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ داۋىرىنە ءدوپ كەلىپ وتىر، ولاردىڭ ارقاسىندا اۋىر مىندەت بار. قالىڭ جاستار ارمانعا قانات قاعۋشىلار ءارى ارماندى ورىنداۋشىلار. ارمانعا قانات قاعۋ ءۇشىن ىنتا مەن مۇرات قاجەت، ارماندى ورىنداۋ ءۇشىن كۇرەس پەن ۇلەس قاجەت. قالىڭ جاستار كۇرەس بارىسىندا جاستىق ىنتانى جالىنداتىپ، جاستىق مۇراتقا تالپىنىپ، كۇرەسكە تولى جاستىق ورالمەن ۇلتتىڭ گۇلدەنۋىنە جول اشىپ، وتان قۇرىلىسىنا كەرپىش بولىپ قالانۋى كەرەك.
شي جينپيڭ مىنالاردى باسا دارىپتەدى: جۇڭگوشا سوتسياليزمگە ويداعىداي تاباندى بولىپ، ويداعىداي دامىتىپ، ەلىمىزدى سوتسياليستىك وسىزاماندانعان قۇدىرەتتى مەملەكەت ەتىپ قۇرىپ شىعۋ − ۇزاق ۋاقىتتىق مىندەت، نەشە بۋىن ادامداردىڭ توقتاۋسىز كۇرەس جۇرگىزۋىن قاجەت ەتەدى. وقۋ-اعارتۋ كوركەيسە، مەملەكەت كوركەيەدى، وقۋ-اعارتۋ قۇدىرەتتەنسە، مەملەكەت قۇدىرەتتەنەدى. بۇگىنگى كۇندە پارتيا مەن مەملەكەت ىستەرىنىڭ دامۋى جوعارى وقۋ-اعارتۋدىڭ دامۋىنا، عىلمي بىلىمدەر مەن تاڭداۋلى دارىندىلارعا بۇرىنعى ءارقانداي كەزدەگىدەن دە ەرەكشە ءزارۋ بولىپ وتىر. سوتسياليزمنىڭ قۇرىلىسشىلارى مەن ءىزباسارلارىن تاربيەلەۋ − پارتيامىزدىڭ وقۋ-اعارتۋ باعىتى، ەلىمىزدەگى ءار دارەجەلى ءار ءتۇرلى مەكتەپتەردىڭ ورتاق بورىشى. جوعارى مەكتەپتەر سوتسياليزمنىڭ قۇرىلىسشىلارى مەن ءىزباسارلارىن تاربيەلەۋ سىندى ءتۇبىرلى مىندەتتى يگەرگەندە عانا، دۇنيە جۇزىندەگى ماڭداي الدى جۇڭگوشا ۋنيۆەرسيتەتتى قۇرا الادى. شي جينپيڭ دۇنيە جۇزىندەگى ماڭداي الدى جۇڭگوشا ۋنيۆەرسيتەت قۇرىپ، سوتسياليزمنىڭ تاڭداۋلى قۇرىلىسشىلارى مەن ءىزباسارلارىن تاربيەلەۋ ءۇشىن، 3 ءتۇرلى نەگىزدىك قىزمەتتى ويداعىداي يگەرۋ كەرەكتىگىن العا قويدى.
ءبىرىنشى، ءبىلىم بەرۋدىڭ دۇرىس ساياسي بەتالىسىنا تاباندى بولۋ كەرەك. ەلىمىزدىڭ سوتسياليستىك وقۋ-اعارتۋىنىڭ ماقساتى − سوتسياليزم قۇرىلىسشىلارى مەن ءىزباسارلارىن تاربيەلەۋ. ماركسيزم − پارتيامىزدىڭ پارتيا قۇرۋىنىڭ، مەملەكەت قۇرۋىنىڭ ءتۇبىرلى جەتەكشى يدەياسى ءارى ەلىمىز ۋنيۆەرسيتەتتەرىنىڭ ەڭ ايقىن قاسيەتى. ماركسيزم نازارياسى تاربيەسىن ويداعىداي يگەرىپ، وقۋشىلاردىڭ ماركسيزمنىڭ تاريحي سوزسىزدىگى مەن عىلمي اقيقاتتىعى، نازاريالىق ماڭىزى مەن رەال ماڭىزى جونىندەگى تانىمىن تەرەڭدەتىپ، ولاردى ماركستىك تۇرعىنى، كوزقاراستى، ءادىستى قولدانا وتىرىپ دۇنيەنى باقىلاپ، دۇنيەگە تالداۋ جاساپ، ءدوپ كەلگەن داۋىرلىك تاقىرىپتاردى شىن مانىندە ءتۇسىنىپ، دۇنيەنىڭ دامۋ بەتالىسىن تەرەڭ يگەرىپ، جۇڭگو مەن دۇنيەنىڭ دامۋ اۋقىمىن جىعا تانۋعا تاربيەلەپ، وقۋشىلارعا ماركسيزم اقيقاتىنىڭ كۇشىن تەرەڭ سەزىندىرىپ، وقۋشىلاردىڭ جارامدى ادام بولىپ ەسەيۋىنە عىلمي يدەيالىق نەگىز قالاۋ كەرەك. سوتسياليستىك وزەكتى قۇن كوزقاراسىن تاباندىلىقپەن جەتىلدىرىپ جانە ساۋلەلەندىرىپ، قالىڭ وقىتۋشى-وقۋشىلاردى سوتسياليستىك وزەكتى قۇن كوزقاراسىنىڭ باتىل سەنۋشىلەرى، بەلسەندى تاراتۋشىلارى، ۇلگىلى اتقارۋشىلارى بولۋعا جەتەكتەۋ كەرەك. جۇڭگوشا سوتسياليزم جولى سەنىمىن، نازارياسى سەنىمىن، ءتۇزىمى سەنىمىن، مادەنيەت سەنىمىن دۇنيە جۇزىندەگى ماڭداي الدى جۇڭگوشا ۋنيۆەرسيتەت قۇرۋ سەنىمىنە اينالدىرۋ كەرەك.
ەكىنشى، جوعارى ساپالى وقىتۋشىلار قوسىنىن قۇرۋ كەرەك. ساياسي ساپاسى جوعارى، كاسىپتىك قابىلەتى مىعىم، ادام تاربيەلەۋ ورەسى بيىك جوعارى ساپالى وقىتۋشىلار قوسىنىن قۇرۋ − ۋنيۆەرسيتەت قۇرىلىسىنىڭ نەگىزدىك قىزمەتى. سوتسياليزمنىڭ قۇرىلىسشىلارى مەن ءىزباسارلارىن تاربيەلەۋ تۇرعىسىنان، ۋنيۆەرسيتەت وقىتۋشىلار قوسىنىنىڭ ساپالى تالابى، قىزمەتكەر قۇرىلىمى، تاربيەلەۋ جۇيەسى سياقتىلاردى ەسكەرۋ كەرەك. تاربيەلەۋشىلەردىڭ الدىمەن تاربيەلەنۋىنە تاباندى بولىپ، وقىتۋشىلاردىڭ وقۋشىلاردىڭ اقاۋسىز ەسەيۋىنىڭ جەتەكشىسى جانە جول نۇسقاۋشىسى بولۋ جاۋاپكەرلىگىن ءتىپتى ويداعىداي ۇستىنە الۋىنا مۇمكىندىك جاساۋ كەرەك. ۇستازدىق ءمورال، ۇستازدىق ستيل قۇرىلىسىن ويداعىداي يگەرىپ، وقىتۋشىلاردى ءبىلىم بەرىپ ادام تاربيەلەۋ مەن ءوزىن تاربيەلەۋدى ۇشتاستىرىپ، ءمورال ارقىلى ءوزىن تۇلعالاۋعا، ءمورال ارقىلى ءبىلىمىن جەتىلدىرۋگە، ءمورال ارقىلى وقىتۋ جۇرگىزۋگە جەتەكتەۋ كەرەك.
ءۇشىنشى، جوعارى دەڭگەيلى دارىندىلاردى تاربيەلەۋ جۇيەسىن قالىپتاستىرۋ كەرەك. دارىندىلاردى باۋلىپ جەتىلدىرۋ جۇيەسى پاندەر جۇيەسى، وقىتۋ جۇيەسى، وقۋلىق جۇيەسى، باسقارۋ جۇيەسى سياقتىلارعا سايادى، ال مۇنىڭ ارقاۋى − يدەيالىق-ساياسي قىزمەت جۇيەسى. پارتيانىڭ باسشىلىعى مەن پارتيا قۇرىلىسىن كۇشەيتۋ، يدەيالىق-ساياسي قىزمەت جۇيەسى قۇرىلىسىن كۇشەيتۋ − جوعارى دەڭگەيلى دارىندىلاردى تاربيەلەۋ جۇيەسىنىڭ ماڭىزدى مازمۇنى. پارتيانىڭ جوعارى مەكتەپتەرگە باسشىلىعىنا، ءبىلىم بەرۋدىڭ سوتسياليستىك باعىتىنا تاباندى بولىپ، ەرەكشەلىگىمىز بەن باسىمدىعىمىزدى سوتسياليزم قۇرىلىسشىلارى مەن ءىزباسارلارىن تاربيەلەۋ قابىلەتىنە ءونىمدى تۇردە اينالدىرۋىمىز كەرەك. ارالاسپالى پاندەر توبىن جانە عىلىم-تەحنيكادان قامال الاتىن پارمەندى ۇجىمدى كۇش سالا قۇرىپ، پاندەر اراسىنداعى سەلبەسە جاڭالىق اشۋدى كۇشەيتۋ، ءتول جاسامپازدىق، جۇيەلىلىك، جەتەكشىلىك زەرتتەۋلەرگە قولداۋدى كۇشەيتۋ كەرەك. حالىقارالىق دەڭگەيدەگى ستراتەگيالىق عىلىم-تەحنيكا دارىندىلارىنىڭ، عىلىم-تەحنيكالىق كوشباسشى دارىندىلاردىڭ، جاس عىلىم-تەحنيكا دارىندىلارىنىڭ جانە جوعارى دەڭگەيلى جاسامپاز ۇجىمداردىڭ مول شوعىرىن باۋلىپ جەتىلدىرىپ، بولاشاقتىق نەگىزدىك زەرتتەۋ، جەتەكشىلىك سيپاتتى ءتول جاسامپازدىق تابىستار جاراتۋ جاعىندا كەلەلى قامال الۋعا كۇش سالۋ كەرەك.
شي جينپيڭ مىنالاردى باسا دارىپتەدى: بۇگىنگى تاڭداعى جاستار − جاڭا داۋىرمەن بىرگە العا ىلگەرىلەيتىن بۋىن. قالىڭ جاستاردىڭ كەڭ دامۋ ءورىسى بار، سونداي-اق ولار ۇلى ءداۋىردىڭ بورىشىن ارقالاپ وتىر. ءاربىر جاس سوتسياليزمنىڭ قۇرىلىسشىسى مەن ءىزباسارى بولۋى، ءداۋىردىڭ بورىشىن اقتاپ، حالىق تىلەگىنەن شىعۋى كەرەك. قالىڭ جاستار وتانعا، حالىققا ادال بولىپ، جۇڭحۋا ۇلتىنىڭ تاريحىن ءبىلىپ، جۇڭحۋا مادەنيەتىنىڭ گەنىن جالعاۋى، ۇلتتىق ماقتانىش سەزىمى مەن مادەنيەت سەنىمى بولۋى، ءوزىنىڭ مۇراتىن وتاننىڭ بولاشاعىمەن، ءومىرىن ۇلتتىڭ تاعدىرىمەن تىعىز بايلانىستىرىپ، حالىق اراسىنا تەرەڭ تامىر تارتىپ، مەملەكەتكە ۇلەس قوسۋى كەرەك. ۇلى مۇرات ورناتىپ، كۇرەسكەر بولىپ، كۇرەس رۋحىن جەتىلدىرىپ، مۇراتتان جازباي، سەنىمنەن اينىماي، قيىنشىلىقتان قورىقپاي، ەرلىكپەن ءورىس اشۋ، مويىماي كۇرەسۋ، ماڭگى جاسىماۋ كەرەك. شىنايى بىلىمگە ۇمتىلىپ، شىنايى قابىلەتتى شىڭاپ، ءبىلىم ۇيرەنۋ ارقىلى زاتتاردىڭ دامۋ زاڭدىلىعىن يگەرىپ، دۇنيەنىڭ ءجون-جوسىعىن ءبىلىپ، ءبىلىمدى مولايتىپ، كوزايانى كەڭەيتىپ، وتانعا ءتىپتى جاقسى داڭق اپەرۋ، حالىققا باقىت جەتكىزۋ كەرەك. ءبىلۋ مەن ارەكەتتى بىرلىككە كەلتىرىپ، ىسكەر بولىپ، ءىس جۇزىندىكتى بەتكە الىپ، امالياتقا ارالاسىپ، ىجداعاتتى بولىپ، شوگەلدىكپەن، شىنايى ىستەپ، جاڭا داۋىردە ىستەن ناتيجە شىعارۋ كەرەك. سوتسياليزم قۇرىلىسشىلارى مەن ءىزباسارلارىنا ءتان بورىشتى ارقالاپ، جاپپاي دوڭگەلەك داۋلەتتى قوعام ورناتۋ، جاپپاي سوتسياليستىك وسىزاماندانعان قۇدىرەتتى مەملەكەت قۇرۋ جولىندا قۇلشىنا كۇرەس جۇرگىزىپ، جۇڭحۋا ۇلتىنىڭ ۇلى گۇلدەنۋىن كۇرەس ارقىلى رەالدىققا اينالدىرۋ كەرەك.
شي جينپيڭ مەكتەپتەن اتتاناردا وقىتۋشىلار مەن وقۋشىلار جولدىڭ ەكى جاعىنا ءتىزىلىپ، باس شۋجيگە تۇس-تۇستان سالەم بەرىپ، باس شۋجيدىڭ قولىن تالاسا-تارماسا ۇستاپ، «ىنتىماقتاسىپ، جۇڭحۋانى گۇلدەندىرەيىك» دەپ ۇرانداتىپ، «وتاندى جىرلايمىز» ءانىن اسقاقتاتا شىرقادى. شي جينپيڭ اسا تەرەڭ سۇيىسپەنشىلىكپەن قول بۇلعاپ كوپشىلىكپەن قوشتاستى، شاپالاق ءۇنى، سالەمدەسكەن ۇندەر، ءان داۋىسى، ۇران ءۇنى مەكتەپ اۋلاسىن جاڭعىرتتى.
ديڭ شۋەشياڭ، سۇن چۇنلان، ساي چي، حى ليفىڭ، سونداي-اق ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار قاتىستى قيمىلدارعا قاتىناستى.


بەرىپ كەت ورامالىڭدى

دوستار

الىستاعى اق ەركە