جاڭا حابارلار

جاڭا دامۋ ۇستانىمىنا تاباندى بولىپ، «3 ۇلكەن قامال الۋ شايقاسىن» ويداعىداي جۇرگىزىپ، جاڭا داۋىردەگى حۋبەيدى دامىتۋدىڭ تىڭ پاراعىن قۇلشىنا جازۋ باسا دارىپتەلدى

    كەلۋ قاينارى: شينجياڭ گازەتى    2018-04-30 21:19:11  

شي جينپيڭ حۋبەيدە قىزمەت تەكسەردى

4 - ايدىڭ 24 - كۇنىنەن 28 - كۇنىنە دەيىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ حۋبەيدە قىزمەت تەكسەردى. سۋرەتتە: 4 - ايدىڭ 24 - كۇنى تۇستەن كەيىن شي جينپيڭ يچاڭ قالاسى شۇيجياچۇڭ قىستاعىندا قىزمەت تەكسەرگەن كەزدە، حالىققا قولايلى كىر جۋۋ كولشىگىنىڭ شەتىندە قىستاق تۇرعىندارىمەن ىقىلاستى تۇردە اڭگىمەلەسۋدە.

سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

شينحۋا اگەنتتىگىنىڭ 4 - ايدىڭ 28 - كۇنى ۋحاننان بەرگەن حابارى.ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ حۋبەيدە قىزمەت تەكسەرگەن كەزدە مىنالاردى باسا دارىپتەدى: پارتيا 19 - قۇرىلتايىنىڭ رۋحىن جاپپاي دايەكتىلەندىرىپ، جاڭا داۋىردەگى جۇڭگوشا سوتسياليزم يدەياسىن جەتەكشى ەتىپ، جاڭا دامۋ ۇستانىمىنا تاباندى بولىپ، ورنىقتىلىق بارىسىندا ىلگەرىلەۋ سىندى قىزمەتتىڭ نەگىزگى اۋەنىنەن جازباي، «3 ۇلكەن قامال الۋ شايقاسىن» ويداعىداي جۇرگىزۋگە كۇش سالىپ، دامۋدىڭ بىركەلكى، تولىق بولماۋى ماسەلەسىن تىڭعىلىقتى تۇردە شەشىپ، جاڭا داۋىردەگى حۋبەيدى دامىتۋدىڭ تىڭ پاراعىن قۇلشىنا جازۋ كەرەك.
  4 - ايداعى حۋبەي دالاسى كوكتەم شۋاعىنا شومىپ، جالىندى لەپكە وراندى. 4 - ايدىڭ 24 - كۇنىنەن 28 - كۇنىنە دەيىن شي جينپيڭ حۋبەي ولكەلىك پارتكومنىڭ شۋجيى جياڭ چاۋلياڭنىڭ، ولكە باستىعى ۋاڭ شياۋدۇڭنىڭ سەرىك بولۋىندا، ىلگەرىندى - كەيىندى يچاڭ، جيڭجوۋ، ۋحان سياقتى جەرلەرگە بارىپ، اۋىل - قىستاق، كاسىپورىن، الەۋمەتتىك اۋماقتاردى ارالاپ، چاڭجياڭ ەكونوميكالىق بەلدەۋىنىڭ دامۋى جانە ەكونوميكانىڭ اينالىمى جاعدايىن تەكسەردى.
  4 - ايدىڭ 24 - كۇنى تۇستەن كەيىن شي جينپيڭ يچاڭ قالاسى يليڭ رايونى تايپيڭشي قالاشىعى شۇيجياچۇڭ قىستاعىنا كەلىپ، ءۇش قىساڭنان كوشىرىلگەندەردىڭ جاڭا قىستاعى قۇرىلىسىن جانە ءوندىرىس، تۇرمىس جاعدايىن كوزدەن كەشىردى. اتالعان قىستاق ءۇش قىساڭ توسپاسىنىڭ جانىنا ورنالاسقان، كوشىپ كەلگەندەر قىستاق حالقىنىڭ %90تەن استامىن قۇرايدى، ول حۋبەي ولكەسىنىڭ وزگە جەرگە كوشىرۋدەن، ورنىقتىرۋدان، بايىتۋدان ۇلگى كورسەتەتىن قىستاعى سانالادى. تاۋدىڭ ورتان بەلىنە ورنالاسىپ، چاڭجياڭ وزەنىنىڭ ۇستىنەن ءتونىپ تۇراتىن قىستاقتىڭ كورىنىسى كوز سۇرىندىرەدى. شي جينپيڭ كەڭ جولمەن قىستاققا كەلىپ، تايپيڭشي قالاشىعىنىڭ لاس سۋدى ءبىر جايلى ەتۋ زاۆودىنا كىدىرىپ، چاڭجياڭ وزەنى بويىنداعى اۋىل - قىستاقتاردىڭ تۇرمىستىق لاس سۋلاردى ءبىر جايلى ەتۋ جاعدايىمەن تانىستى. ونان سوڭ قىستاق كوميتەتىنىڭ الاڭىنا كەلىپ، كورمە تاقتالارمەن بىرلەستىرىپ، حۋبەي ولكەسىنىڭ جانە يچاڭ قالاسىنىڭ ءۇش قىساڭداعى كوشى - قون جاعدايى جانە شۇيجياچۇڭ قىستاعىنىڭ دامۋ جاعدايى جونىندەگى تانىستىرۋىن تىڭدادى. الاڭ جانىندا حالىققا قولايلى ەتىلىپ، كىر جۋاتىن كولشىك سالىنىپتى، قىستاق تۇرعىندارىنىڭ كەيبىرى وندا كىر جۋىپ جاتىر ەكەن. شي جينپيڭ ولاردىڭ جانىنا بارىپ، ولارمەن شىن ىقىلاسپەن اڭگىمەلەستى، سونداي - اق قىزۋ ىنتامەن قولىنا تاياق الىپ ۇرعىلاپ، كىر جۋىستى. قىستاق تۇرعىندارى باس شۋجيگە: بۇرىن كىردى وزەن جاعاسىندا جۋاتىنبىز، قازىر قىستاعىمىزدا كىر جۋۋ كولشىگى سالىنىپ، قۇبىر سۋى تارتىلدى، لاس سۋ دا جيىپ الىنىپ ءبىر جاقتى ەتىلەدى، تۇرمىس ادەتىمىزبەن ساناسقان بۇل امالدار قورشاعان ورتانى قورعاۋعا دا پايدالى بولدى، - دەستى. باس شۋجي قىستاق تۇرعىندارىنىڭ تۇرمىستارىنىڭ قانداي ەكەنىن، جاڭا تۇرمىس ورتاسىنا ۇيلەسە العان - الماعاندارىن ىقىلاسپەن سۇراستىردى ءارى تەرەڭ سۇيىسپەنشىلىكپەن بىلاي دەدى: ءۇش قىساڭ ينجەنەرياسىنىڭ قۇرىلىسى ءۇشىن تالاي ادام اتا - باباسىنان بەرى تۇرىپ كەلە جاتقان جەرلەرىنەن كوشىپ، جاڭا قونىسقا كەلدى، بۇل دا مەملەكەتتىڭ كەلەلى ينجەنەريالىق قۇرىلىسى ءۇشىن ۇلەس قوسقاندىق. قىستاق كوللەكتيۆى بارشاعا ورتاق شاڭىراق، جەرگىلىكتى ادامدار دا، باسقا جەردەن كەلگەندەر دە وسى شاڭىراقتىڭ ءبىر مۇشەسى. بار ادام ءبىر نيەتپەن ىنتىماقتاسىپ، ءوزارا قامقورشى بولىپ، ءبىر - بىرىنە كومەكتەسىپ، جاڭا مەكەندى اناعۇرلىم كوركەيتۋ ءۇشىن ءبىر جاعادان باس، ءبىر جەڭنەن قول شىعارۋ كەرەك.
  شي جينپيڭ قىستاقتىڭ حالىققا قولايلى قىزمەت كورسەتۋ ۇيىنە كىرىپ، شۇيجياچۇڭ قىستاعىنىڭ پارتيا ۇيىمى قۇرىلىسى مەن حالىققا قولايلى قىزمەت كورسەتۋ جاعدايىمەن ەگجەي - تەگجەيلى تانىسىپ، قىستاق كادرلارىنىڭ يۇيگۋ اۋەنىمەن جازىلعان «قىستاق پارتيا مۇشەلەرى كەلىسىمىن» شىرقاعانىن ىقىلاسپەن تىڭداپ، مازمۇنى جاقسى، تىلگە جەڭىل ەكەن دەپ ماقتادى. ول تاعى قىستاقتىڭ ەلەكتروندىق ساۋدادان قىزمەت كورسەتۋ پۋنكتىنە بارىپ، سۋ قويماسى رايونىنداعى ەرەكشە ونىمدەر كورمەسىن كورىپ، قىستاق تۇرعىندارىنىڭ وزەنگە، توسپاعا جاناي ورنالاسقان باسىمدىقتان پايدالانىپ، ەرەكشە عۇرىپ - ادەتتىك كاسىپ سالاسىن دامىتۋى، ەرەكشە كاسىپ سالاسى ارقىلى شارۋاشىلىق قۇرۋعا، جۇمىسقا ورنالاسۋعا جەتەكتەۋ سياقتى جاعدايلارمەن تانىستى. ول مىنالاردى باسا دارىپتەدى: اۋىل - قىستاقتى كوركەيتۋ − «دايىن اسقا تىك قاسىق» ەمەس، ول بىرەۋدەن تىلەپ الاتىن، بىرەۋ اكەپ بەرە سالاتىن نارسە ەمەس، ول بارشا شارۋالاردىڭ كۇرەسىمەن كەلەدى. قىستاق پارتيا ياچەيكاسى شارۋالاردىڭ بايۋىنا كومەكتەسىپ، اۋىل - قىستاقتىڭ ورنىقتىلىعىن ساقتايتىن، اۋىل - قىستاقتى كوركەيتۋدى ىلگەرىلەتەتىن پارمەندى شايقاس قامالى بولۋى كەرەك.
  باس شۋجي كەلدى دەگەندى ەستىگەن قىستاق تۇرعىندارى تۇس - تۇستان الاڭعا جينالىپ، جابال باس شۋجيگە امانداسىپ، ول كىسىمەن تالاسا - تارماسا قول الىستى. شي جينپيڭ جينالعاندارعا قول بۇلعاپ، ىززەت ءبىلدىرىپ، قىستاق تۇرعىندارىنىڭ تۇرمىستارىنىڭ كۇننەن - كۇنگە جاقسارا بەرۋىن تىلەدى.
  4 - ايدىڭ 26 - كۇنى تۇستەن بۇرىن شي جينپيڭ ىلگەرىندى - كەيىندى دۇڭحۋ جاڭا تەحنولوگيالىق كاسىپ سالالارىن اشۋ رايونىنداعى فىڭحو عىلىم - تەحنيكالىق توبى مەن ۋحان شينشين ينتەگرالدى تىزبەك جاساۋ شەكتى سەرىكتەستىگىنە كەلىپ، كاسىپورىننىڭ جاڭالىق اشۋ، دامۋ جاعدايلارىن تەكسەردى. دۇڭحۋ جاڭا تەحنولوگيالىق كاسىپ سالالارىن اشۋ رايونى مەملەكەت دارەجەلى تۇڭعىش توپتاعى جوعارى، جاڭا تەحنيكا اشۋ رايوندارىنىڭ ءبىرى، 2016 - جىلى جۇڭگو (حۋبەي) ەركىن ساۋدا سىناق رايونى ۋحان اۋماعى بولۋعا رۇقسات العان. دۇنيە ءجۇزى بويىنشا ەڭ ۇلكەن وپتيكالىق حابارلاسۋ تەحنولوگيالارىن زەرتتەۋ - اشۋ، ءوندىرۋ بازاسى سانالاتىن بۇل جەردە «جۇڭگو وپتيكالىق اڭعارى» دەپ اتالعان. فىڭحو عىلىم - تەحنيكالىق توبىندا شي جينپيڭ ۋحان قالاسىنىڭ جاڭا - كونە قوزعاۋشى ەنەرگيانى اۋىستىرۋ، دامىتۋ جاعدايىنان جاساعان مالىمەتىن تىڭداپ، كاسىپورىننىڭ دەربەس جاڭالىق اشۋ جەمىستەرىنىڭ كورمەسىن كوزدەن كەشىرىپ، كاسىپورىننىڭ كاسىپ قۇرىلىمىن ساپالىلاندىرۋ، رەتتەۋ جانە پارتيا قۇرىلىسى قىزمەتىن كۇشەيتۋ سياقتى جاعدايلارىمەن تانىستى. كورمە زالىندا فىڭحو عىلىم - تەحنيكالىق توبىنىڭ جانە چاڭفي وپتيكالىق كابەل شەكتى سەرىكتەستىگى زەرتتەپ جاساعان چيپ، وپتيكالىق كابەل سياقتى جوعارى عىلىم - تەحنيكالىق ونىمدەر قويىلىپتى. شي جينپيڭ ەكسپوناتتاردى كورە ءجۇرىپ، ونىمدەردىڭ رولى، قاسيەتى، ەلىمىزدە ءوندىرۋدىڭ ۇلەسى، حالىقارالىق كاسىپ سالاسىنداعى ورنى سياقتى جاعدايلارمەن تانىستى. فىڭحو عىلىم - تەحنيكالىق توبىنىڭ «ەرەكشە ۇلكەن سيىمدىلىق، ەرەكشە ۇزىن قاشىقتىق، ەرەكشە ۇلكەن جىلدامدىق» وپتيكالىق حابارلاسۋ سالاسىندا زەرتتەۋ جۇمىستارى مەن ءوندىرىسى الەمنىڭ جەتەكشى ورنىندا ەكەنىن، ونىڭ ءبىر تال وپتيكالىق كابەلىمەن 6 ميلليارد 750 ميلليون ادام ءبىر ۋاقىتتا سويلەسە الاتىنىن ەستىگەن باس شۋجي باسىن يزەپ، القاۋ ءبىلدىردى. ول كاسىپورىن جاۋاپتىسىنا شىن ىقىلاسپەن بىلاي دەدى: جاڭا دامۋ ۇستانىمىندا جاڭالىق اشۋ ءبىرىنشى ورىندا تۇرادى. ەلىمىز دۇنيە جۇزىلىك ەكىنشى ءىرى ەكونوميكالىق تۇلعاعا اينالدى، بۇرىنعى، باستىسى، بايلىق فاكتورلارىن ۇيۋگە سۇيەنىپ ەكونوميكانىڭ ءوسۋىن ىلگەرىلەتەتىن ءتاسىل ەندى ىسكە جارامايدى، سوندىقتان، ءسوز جوق، جاڭالىق اشۋعا سۇيەنۋىمىز كەرەك. دەربەس زياتكەرلىك مەنشىك ۇقىعىنا يە وزەكتى تەحنولوگيالار − كاسىپورىننىڭ «جان تامىرى». كاسىپورىن، ءسوز جوق، وزەكتى تەحنولوگيادا ۇزدىكسىز سەرپىلىس جاساۋى، دەربەس زياتكەرلىك مەنشىك ۇقىعىنا يە اناعۇرلىم كوپ شەشۋشى تەحنولوگيالاردى يگەرۋى، كاسىپ سالاسىنىڭ دامۋىنداعى ىرىقتىلىقتى مەڭگەرۋى كەرەك. مەملەكەت سىزدەردىڭ بۇل جاعىنداعى اياق الىستارىڭىزدى تەزدەتۋدى قاجەت ەتەدى. ول كاسىپورىننان پارتيا قۇرىلىسى قىزمەتىن كۇشەيتۋدى، پارتيا قۇرىلىسى ارقىلى كاسىپورىننىڭ جاڭالىق اشۋىن، دامۋىن جەبەۋدى تالاپ ەتتى.
ۋحان شينشين ينتەگرالدى تىزبەك جاساۋ شەكتى سەرىكتەستىگىندە شي جينپيڭ مەملەكەتتىڭ ساقتاۋ قۇرىلعىلارى بازاسى نىسانىنىڭ جاعدايى جونىندەگى مالىمەتتى تىڭدادى، سونداي - اق ءوندىرىس سەحىنا بارىپ، ەل ءىشى بويىنشا وزىق ينتەگرالدى تىزبەك ءوندىرىس جەلىسىن كوزدەن كەشىردى. اتالعان سەرىكتەستىكتى تۇعىر ەتىپ قۇرىلعان چاڭجياڭ ساقتاۋ قۇرىلعىلارى عىلىم - تەحنيكالىق شەكتى سەرىكتەستىگى مەملەكەتتىڭ ساقتاۋ قۇرىلعىلارى بازاسى نىسانىن جۇرگىزەتىن سۋبيەكتى سانالادى، ول ەلىمىزدىڭ ساقتاۋ قۇرىلعىلارىن قارىشتاپ دامىتۋ، الەمدىك بىرەگەي دەڭگەيگە جەتۋ جانە ودان وزۋ سياقتى ماڭىزدى بورىش ارقالاعان. ءوندىرىس سەحىندا باس شۋجي ينتەگرالدى تىزبەك ءوندىرىس جەلىسىن ەگجەي - تەگجەيلى كوزدەن كەشىرىپ، چيپتەردى تۇتاس بارىستا زەردەلى جاساۋ جانە ونىڭ ەلىمىز وندىرگەن ونىمگە اينالدىرۋ ءۇردىسىن تەزدەتۋ جاعدايى جونىندەگى تانىستىرۋدى تىڭدادى. ول مىنالاردى باسا دارىپتەدى: جابدىق جاساۋ كاسىبىنىڭ چيپتەرى ادامنىڭ جۇرەگى ءتارىزدى. جۇرەك قاۋقارسىز بولسا، قانشالىق ءداۋ تۇلعا دا ءالسىز ەسەپتەلەدى. چيپ تەحنولوگياسىندا ماڭىزدى سەرپىلىس جاساۋدى جەدەل جۇزەگە اسىرىپ، الەمدىك جارتىلاي وتكىزگىش ساقتاۋ قۇرىلعىلارىنىڭ عىلىم - تەحنيكالىق شىڭىنا شىعۋعا بەل بايلاۋ كەرەك. «قوس 100 جىلدىق» كۇرەس نىساناسى قۇر ايقاي - سۇرەنمەن وڭاي - وسپاق جۇزەگە اسا سالاتىن شارۋا ەمەس. بۇرىن بولماعان ورايلار تۇر، سونىمەن قاتار، بۇرىن بولماعان سىن - سىناقتار كۇتىپ تۇر. ءار ادام جاۋاپكەرشىلىك سەزىمدى، بورىش سەزىمدى كۇشەيتۋى، وز قىزمەت ورىندارىندا جۇڭحۋا ۇلتىنىڭ ۇلى گۇلدەنۋى ءۇشىن اناعۇرلىم كەسەك ۇلەس قوسۋى كەرەك.
  تۇسكە تاياعان ساتتە، شي جينپيڭ ۋحان قالاسى چيڭشان رايونى گۇڭرىنسۇن كوشەسى چيڭحىجۇي الەۋمەتتىك اۋماعىنا كەلىپ، لاشىقتى اۋماق نىسانى قۇرىلىسىنىڭ جانە تۇرعىندار تۇرمىسىنىڭ جاعدايىن تەكسەردى. چيڭشان رايونى وتكەن عاسىردىڭ 50 - جىلدارىندا مەملەكەتتىڭ «1 - بەسجىلدىق» ءتۇيىندى ينجەنەرياسى ۋحان بولات - تەمىر توبى ءۇشىن قۇرىلعان رايون، كەيىن بىرتىندەپ اۋىر حيميا - ونەركاسىپ شوعىرلانعان رايون، بايىرعى ونەركاسىپ بازاسى بولىپ دامىعان، سوڭعى جىلدارى رايون كاسىپ سالاسىن تۇرلەندىرۋ، جاڭارتۋ جانە ەكولوگيالىق ورتانى قورعاۋدى بەلسەنە ىلگەرىلەتۋدە. شي جينپيڭ كولىكپەن چيڭشاننىڭ وزەن قايراڭىنان ءوتتى. چاڭجياڭ وزەنىنىڭ سۋ ايدىنى كوسىلە تولقىپ، جاعالاۋ جاسىل جەلەك جامىلىپتى، ەكولوگيالىق ورتاسى جانعا جايلى ەكەن. شي جينپيڭ وزەن قايراڭى ەكولوگياسىن كەشەندى وڭاۋ قىزمەتىن تۇراقتاندىردى. الەۋمەتتىك رايوننىڭ پارتيا مۇشەلەرىنە، بۇقاراعا قىزمەت كورسەتۋ ورتالىعىندا شي جينپيڭ ۋحان قالاسىنىڭ لاشىقتى اۋماقتى وزگەرتۋدىڭ جالپى جاعدايى جونىندەگى تانىستىرۋىن تىڭداپ، شاعىن كورمە سارايىن ارالاپ، لاشىقتى اۋماقتىڭ قالپىنا كەلتىرىلگەن بەينەسىن جانە كونە زاتتار كورمەسىن كوزدەن كەشىردى. جەرگىلىكتى جاۋاپتى جولداس بىلاي دەپ تانىستىردى: بۇل جەر بۇرىن ورتا جۇڭگوداعى ەڭ ۇلكەن بايىرعى ونەركاسىپ باقشاسىنىڭ لاشىقتى اۋماعى ەدى، وزگەرتۋ جۇمىستارىنان كەيىن، بۇل جەردە ءزاۋلىم سارايلار تالاسا بوي سوزعان، ورتاسى كورىكتى، قۇرىلعىلارى كەمەلدەنگەن، تۇرمىسقا قولايلى وسىزاماندانعان تۇرعىلىقتى شاعىن اۋماققا اينالىپ، 40 مىڭنان استام بۇقارانىڭ قونىس شارت - جاعدايى كورنەكتى جاقساردى. باس شۋجي مۇنى ەستىپ قاباعات قۋاندى. ول مىنالاردى اتاپ كورسەتتى: لاشىقتى اۋماق وزگەرتۋ ءىسى ميلليون بۇقارانىڭ الاڭسىز تىرشىلىك ەتۋىنە سايادى. ءبىزدىڭ قالالارىمىزدىڭ ءبىر جاعى بيىك عيماراتتار، ەندى ءبىر جاعى لاس، رەتسىز، ناشار لاشىقتى اۋماق بولىپ تۇرسا بولمايدى. قازىر بۇكىل ەلدەگى لاشىقتى اۋماقتاردى وزگەرتۋ مىندەتى ءالى دە اۋىر. بۇقاراعا پايدالى ءىس بولسا، ءبىز ونى تىندىرۋعا قۇلشىنۋىمىز، ونى جاقسى تىندىرۋعا بارىمىزدى سالۋىمىز كەرەك.
  الەۋمەتتىك اۋماقتىڭ قوعامدىق ۇيىمدار ينكۋباتورى كەڭسەسىندە شي جينپيڭ الەۋمەتتىك اۋماقتاعى قايىرىمدىلىق ۇيىمدارىن جەتىلدىرۋ جانە ولاردىڭ جۇمىس جۇرگىزۋ جاعدايىمەن ەگجەي - تەگجەيلى تانىستى. قايىرىمدىلىق ۇيىمدارىنىڭ الەۋمەتتىك اۋماقتاعى قارتتار مەن مۇمكىندىگى شەكتەۋلى ادامدار ءۇشىن اس - سۋ جەتكىزۋ قىزمەتىن ۇسىنىپ، ولاردىڭ تۇرمىس قيىنشىلىقتارىن شەشەتىنىن ەستىگەن باس شۋجي ولاردىڭ ۇلكەن يگىلىكتى ءىس ىستەپتى دەپ القادى. قاعاز قيما ماتەريالدىق ەمەس مۇرانى جالعاستىرۋشى ما ميڭيۋە باس شۋجيگە ونەردى جالعاستىرۋ جاعدايىن تانىستىردى، باس شۋجي ونىڭ قاعاز قيما ونەرىنە مۇراگەرلىك ەتۋشىلەردىڭ بولۋىن ءۇمىت ەتتى. ىلە - شالا باس شۋجي مۇگەدەكتەر ارباشاسىندا وتىرعان قىز دۋ چىڭچىڭنىڭ الدىنا بارىپ، ونىڭ سوقىرلارعا كينو ايتىپ بەرۋ قىزمەتىنىڭ جاعدايى جونىندەگى تانىستىرۋىن تىڭداپ، بۇل ەرەكشە ءماندى قىزمەت ەكەن دەپ ماداقتادى.
  بۇقارانىڭ ءىس ءبىتىرۋ زالىندا شي جينپيڭ قىزمەتكەرلەرمەن جانە ءىس بىتىرۋگە كەلگەن تۇرعىندارمەن شىن ىقىلاستى اڭگىمەلەستى. كوپشىلىك باس شۋجيگە وزدەرىنىڭ كورگەندەرىن، ويعا العاندارىن، ارماندارىن تولىق بايانداپ، پارتيانىڭ جاقسى ساياساتىنا العىس جاۋدىردى. شي جينپيڭ مىنانى باسا دارىپتەدى: الەۋمەتتىك اۋماق − نەگىزگى ساتىنىڭ نەگىزى. نەگىز بەكەمدەلگەندە، مەملەكەت عيماراتى ورنىقتى بولادى. كومپارتيا − حالىققا قىزمەت ەتەتىن ساياسي پارتيا، حالىققا قىزمەت ەتۋ ىستەرىندە ۇساق ءىس بولمايدى، بۇقارانىڭ ۇلكەندى - كىشىلى ىستەرىن جاقسى ىستەۋىمىز كەرەك. رەفورما جاساپ، جاڭالىق اشىپ، نەگىزگى ساتىنى جونگە سالۋدى كەمەلدەندىرىپ، الەۋمەتتىك اۋماقتاردىڭ قىزمەت كورسەتۋ قابىلەتى قۇرىلىسىن كۇشەيتىپ، بۇقاراعا ويداعىداي تىڭعىلىقتى، ەگجەي - تەگجەيلى قىزمەت كورسەتۋ كەرەك. نەگىزگى ساتى پارتيا ۇيىمدارى الەۋمەتتىك اۋماقتاردى جونگە سالۋ قىزمەت جاۋاپكەرلىگىن ۇستىنە الىپ، پارتيانىڭ حالىققا تيىمدىلىك جاساۋ ساياساتتارىن ويداعىداي ۇگىتتەپ، الەۋمەتتىك اۋماقتاعى تۇرعىندار مەن ءىسورىندارىن ويداعىداي ۇيىمداستىرىپ، الەۋمەتتىك اۋماقتى بىرگە قۇراتىن، بىرگە جونگە سالاتىن، تەڭ يگىلىكتەنەتىن جونگە سالۋ جۇلگەسىن قالىپتاستىرۋ كەرەك.
  الەۋمەتتىك اۋماقتان اتتانعان كەزدە، جول بويىندا ءيىن تىرەسىپ تۇرعان بۇقارانىڭ شاتىرلاعان شاپالاق ءۇنى مەن سالتانات ءۇنى توعىسىپ جاتتى. شي جينپيڭ كوپشىلىكپەن ىستىق ىقىلاسپەن قول بۇلعاپ قوشتاستى.
  4 - ايدىڭ 28 - كۇنى تۇستەن كەيىن شي جينپيڭ حۋبەي ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداپ، حۋبەي ولكەسىنىڭ ءار سالا قىزمەتىندە قول جەتكىزگەن جەتىستىكتەرىن تۇراقتاندىرىپ، حۋبەي ولكەسىنىڭ پارتيا ورتالىق كوميتەتىنىڭ شەشىمدەرى مەن ورنالاستىرۋلارىن جاپپاي تياناقتاندىرىپ، شىنايى يگەرىپ، ناقتاپ كىرىسىپ، جۇمىستى زەر سالا ىستەپ، سان سالالى ىستەردىڭ دامۋىن كۇش سالا ىلگەرىلەتىپ، جاپپاي دوڭگەلەك داۋلەتتى قوعام ورناتۋدىڭ شەشۋشى جەڭىسىنە جەتىپ، جاڭا داۋىردەگى جۇڭگوشا سوتسياليزمنىڭ ۇلى جەڭىسىنە قول جەتكىزۋدىڭ جاڭا جورىعىندا ۇزدىكسىز تىڭ ناتيجە جاراتۋىن ءۇمىت ەتتى.
  شي جينپيڭ مىنانى باسا دارىپتەدى: جوعارى ساپالى دامۋدى ىلگەرىلەتۋ − ەكونوميكا قىزمەتىن جاقسى ىستەۋدىڭ ءتۇبىرلى تالابى. جوعارى ساپالى دامۋ دەپ وتىرعانىمىز جاڭا دامۋ ۇستانىمىن، ەكونوميكالىق دامۋدىڭ «بار، جوقتان» «جاقسى، جامانعا» قاراي ويىسقانىن بەينەلەيتىن دامۋ. قامداۋ جاعىنداعى قۇرىلىمدىق رەفورمانى تەرەڭدەتۋدە «قيراتۋ» مەن «تىكتەۋگە» تەڭ كۇش شىعارىپ، ءداستۇرلى شارۋاشىلىقتى جاڭالاۋدى، دارەجەسىن جوعارىلاتۋدى جەدەلدەتىپ، جاڭادان گۇلدەنگەن شارۋاشىلىقتاردىڭ دامۋ اياق الىسىن تەزدەتىپ، ەكونوميكانىڭ دامۋىنداعى جاڭا قوزعاۋشى ەنەرگياسىن كۇشەيتۋ كەرەك. قامداۋ جۇيەسىنىڭ ساپاسىن جوعارىلاتىپ، قامداۋ جۇيەسىنىڭ قاجەتسىنۋگە سايكەسۋىن كۇشەيتىپ، جۇڭگو ساپاسىن جۇڭگو قارقىنىمەن ۇقساس دۇنيەگە ايگىلەۋ كەرەك. دامۋدى جاڭالىق اشا جەبەۋگە باسا ءمان بەرىپ، جاڭالىق اشۋ سىندى وسى تەتىكتى مىقتى يگەرىپ، جاڭالىق اشۋ جۇيەسى مەن جاڭالىق اشۋ قابىلەتى قۇرىلىسىن كۇشەيتىپ، عىلىم - تەحنيكالىق جاڭالىقتار مەن ەكونوميكالىق، قوعامدىق دامۋدى ىشكەرىلەي توعىستىرىپ، جاڭالىق اشا جەبەۋگە اناعۇرلىم كوپ سۇيەنەتىن، باسىمدىعىن اناعۇرلىم كوپ ساۋلەلەندىرەتىن جەتەكشىلىك دامۋدى قالىپتاستىرۋ كەرەك. ەكولوگيالىق ورتانى قورعاۋدى كۇشەيتىپ، تۇنىق سۋ، جاسىل تاۋدىڭ ءوزى باعالى بايلىق ۇستانىمىن بەرىك ورناتىپ، تاۋ، وزەن، ورمان، ەگىستىك جەر، كول، جايلىم جۇيەسىن جونگە سالۋدى ءبىر تۇتاس جوسپارلاپ، اۋانىڭ، سۋدىڭ، توپىراقتىڭ لاستانۋىنان ساقتانۋ جانە ونى جونگە سالۋدى كۇشەيتىپ، حۋبەيدىڭ اسپانىنىڭ اناعۇرلىم اشىق، جەرىنىڭ اناعۇرلىم جاسىل، سۋىنىڭ اناعۇرلىم تۇنىق بولۋىنا مۇمكىندىك جاساۋ كەرەك.
  شي جينپيڭ مىنانى اتاپ كورسەتتى: اۋىل - قىستاقتاردى كوركەيتۋ ستراتەگياسىن اتقارۋ − جاڭا داۋىردە «اۋىل - قىستاق، اۋىل شارۋاشىلىعى، شارۋالار» قىزمەتىن ويداعىداي ىستەۋدىڭ نەگىزگى تۇتقاسى. نازاردى شارۋاشىلىقتىڭ شالقۋىنا، ەكولوگيالىق ورتانىڭ جانعا جايلى، اۋىل سالتىنىڭ وركەنيەتتى، جونگە سالۋدىڭ ءونىمدى، تۇرمىستىڭ باياشاتتى بولۋىنا شوعىرلاندىرىپ، اۋىل - قىستاق شارۋاشىلىعىن، دارىندىلاردى، مادەنيەتتى، ەكولوگيانى، ۇيىمدى گۇلدەندىرۋدى ىلگەرىلەتۋگە كۇش سالىپ، وسى زامانعى اۋىل شارۋاشىلىعى كاسىبى جۇيەسىن، ءوندىرىس جۇيەسىن، تيجارات جۇيەسىن قۇرۋدى جەدەلدەتىپ، ۇكىمەتتىڭ جەتەكشىلىك ەتۋى مەن شارۋالاردىڭ نەگىزگى تۇلعالىق ورنىن جاندى ۇشتاستىرىپ، شارۋالاردىڭ ەركىنە تولىق قۇرمەت ەتىپ، شارۋالاردىڭ ىشكى ومىرشەڭدىك كۇشىن تاسقىنداتىپ، قالىڭ شارۋالاردى وزدەرىنىڭ قاجىرلى ەڭبەگىمەن اۋىل - قىستاقتى كوركەيتۋگە تاربيەلەۋ جانە جەتەلەۋ كەرەك.
  شي جينپيڭ مىنانى باسا دارىپتەدى: حالىق تۇرمىسى − ەڭ ۇلكەن ساياسي. حالىق ەڭ كوڭىل بولەتىن، ەڭ تىكە، ەڭ رەال مۇددە ماسەلەسىن مىقتى يگەرىپ، حالىق بۇقاراسىنىڭ كىشى - گىرىم ىستەرىن ءوزىمىزدىڭ ءىرى ىسىمىزگە بالاپ، حالىق بۇقاراسى كوڭىل بولەتىن ىستەردەن باستاپ ىستەپ، حالىق ريزا بولاتىن ىستەردەن باستاپ مىقتى يگەرىپ، جۇمىسقا ورنالاستىرۋعا قىزمەت كورسەتۋدى كۇشەيتىپ، قيىنشىلىعى بار بۇقاراعا كومەكتەسۋ، سۇيەمەلدەۋ، قۇتقارۋ قىزمەتىنە وسكەلەڭ ءمان بەرىپ، كوپ ساتىلى قوعامدىق قامتاماسىزداندىرۋ جۇيەسىن ورناتۋدى جەدەلدەتىپ، الەۋمەتتىك اۋماقتاردى جونگە سالۋ جۇيەسى قۇرىلىسىن كۇشەيتىپ، كەدەيلەردى دالمە - ءدال سۇيەمەلدەۋ مەن كەدەيلىكتەن دالمە - ءدال قۇتىلدىرۋدان جازباي، حالىق تۇرمىسىن قامتاماسىز ەتۋدەگى دالمە - دالدىك پەن جۇيەلىلىكتى ىلگەرىلەتۋ كەرەك.
  شي جينپيڭ مىنانى باسا دارىپتەدى: كەزەكتە فورماشىلدىق، بيۋروكراتتىق ءالى دە كورنەكتى بولىپ وتىر، ونىڭ ۇستىنە جاڭا بەينەلەرى بەلەڭ بەردى. فورماشىلدىقتان، بيۋروكراتتىقتان ساقتانۋدى ستيل قۇرىلىسىن كۇشەيتۋدەگى ماڭىزدى مىندەت رەتىندە قاراپ، شىنايى يگەرىپ، ناقتى ىستەۋ ستيلىن كۇش سالا ساۋلەلەندىرىپ، قىزمەتتى ىلگەرىلەتۋدە شىنايى، قاتاڭ بولىپ، ماسەلەنى شەشۋدە قاۋىرت قيمىلداپ، ناقتى ناتيجە جاراتىپ، قيىن ماسەلەلەرگە ءدوپ كەلگەندە جۇرەكتىلىكپەن يگەرىپ، جۇرەكتىلىكپەن باسقارىپ، باتىلدىقپەن جاۋاپكەرلىك ارقالاۋ كەرەك. تەكسەرىپ - زەرتتەۋدى ىشكەرىلەي ورىستەتىپ، جاعدايدى انىقتاپ، كىناراتتاردى تاۋىپ، كوڭىلدە سان بولىپ، ءۇستىرت شەشىم جاساماي، ناقتى جاعدايدى انىقتاۋعا، ناقتى ءادىس قولدانۋعا، ناقتى ىستەۋگە، ناقتى ونىمدىلىككە قول جەتكىزۋگە شىنايى كۇش شىعارۋ كەرەك.
  ديڭ شۋەشياڭ، ليۋ حى، حى ليفىڭ جانە ورتالىقتاعى قاتىستى تاراۋلارداعى جاۋاپتى جولداستار قىزمەت تەكسەرۋدە بىرگە بولدى.


بەرىپ كەت ورامالىڭدى

دوستار

الىستاعى اق ەركە