جاڭا حابارلار

شي جينپيڭ ب م ۇ - نىڭ باس حاتشىسى گۋتتەرەسپەن كەزدەستى

    كەلۋ قاينارى: شينجياڭ گازەتى    2018-04-10 18:54:14  

 شينحۋا اگەنتتىگىنىڭ 4 - ايدىڭ 8 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 4 - ايدىڭ 8 - كۇنى حالىق سارايىندا ب م ۇ - نىڭ باس حاتشىسى گۋتتەرەسپەن كەزدەستى.
  شي جينپيڭ گۋتتەرەستىڭ جۇڭگوعا ساپارلاي كەلگەنىن جانە بو - اۋ ازيا تالقى مىنبەرىنىڭ 2018 - جىلعى ماجىلىسىنە قاتىناسۋعا كەلگەنىن قارسى الدى. شي جينپيڭ مىنالاردى اتاپ كورسەتتى: حالىقارالىق جاعدايدا سوڭعى جىلدارى جاڭا دامۋ جانە وزگەرىس جارىققا شىقتى. حالىقاراداعى الۋان ءتۇرلى ماسەلەلەردى جيناقتاپ كەلگەندە، جونگە سالۋ جۇيەسى مەن جونگە سالۋ قابىلەتى ماسەلەسىن ويداعىداي شەشۋگە تىرەلەدى. ءبىز جاھاندىق جونگە سالۋدى ۇزدىكسىز ىلگەرىلەتۋىمىز جانە كەمەلدەندىرۋىمىز، وسى سايىسقا ويداعىداي توتەپ بەرۋىمىز كەرەك. جۇڭگو ەكونوميكا، ساياسي، مادەني، قوعامدىق، رۋحاني وركەنيەت قۇرىلىسى سىندى «بەستى ءبىر تۇلعالاندىرۋ» جالپىلىق ورنالاستىرۋىن ءبىر تۇتاس ىلگەرىلەتۋدە، بۇل 5 جاق تا ادامزاتتىڭ تاعدىرلاس ورتاق تۇلعاسىن ورناتۋدىڭ ماڭىزدى مازمۇنى بولىپ تابىلادى. ءبىز تالپىناتىن دامۋ ساپالى دامۋ بولۋى ءتيىس، ونىڭ ولشەمى − حالىقتى وزەك ەتۋ. ەل ءىشىن جونگە سالۋ بولسىن، ياكي جاھاندىق جونگە سالۋ بولسىن، بارلىعى حالىقتىڭ تابىسىن ماقسات ەتۋى، حالىققا ۇزدىكسىز سەنىم جانە تۇراقتى ءۇمىت بەرىپ وتىرۋى كەرەك. العا باسۋدىڭ قوزعاۋشى كۇشىن رەفورما بارىسىندا ىزدەۋ، جاڭالىق اشۋ بارىسىندا تابۋ كەرەك. ج ك پ 19 - قۇرىلتايى مەن جۇڭگونىڭ جاڭا اياقتاعان مەملەكەتتىك ەكى ماجىلىسىندە رەفورما، ەسىك اشۋ، جاڭالىق اشۋ تۇگەلدەي كىندىك سوزگە اينالدى. ءبىز بارلىق ءىستى حالىقتى باقىتقا كەنەلتۋ، ۇلتتىڭ گۇلدەنۋىن كوزدەۋ، دۇنيە جۇزىنە ۇلكەن ورتاقتىق كوزدەۋ ءۇشىن ىستەيمىز. جۇڭگونىڭ «ءبىر بەلدەۋ، ءبىر جولدى» دارىپتەۋدەگى جانە ىلگەرىلەتۋدەگى ماقساتى دا ءار ەلدىڭ دامۋ ستراتەگيالارىن ۇشتاستىرۋ، بىرگە داميتىن بەتالىس قالىپتاستىرۋ، جارقىن بولاشاققا دەگەن سەنىمدى نىعايتۋ.
  شي جينپيڭ مىنالاردى باسا دارىپتەدى: ب م ۇ - نىڭ ءوز رولىن اتقارۋىن قولداۋ، ب م ۇ - نىڭ بەدەلى مەن ورنىن قورعاۋ − جۇڭگو ديپلوماتياسىنداعى ماڭىزدى ساياساتتاردىڭ ءبىرى. ءبىز ءىرى ەلدەر مەن شاعىن ەلدەردىڭ جاپپاي تەڭدىگىن دارىپتەيمىز، سونىمەن بىرگە، ءىرى ەلدەر ءتيىستى جاۋاپكەرشىلىگىن ارقالاۋى كەرەك دەپ ەسەپتەيمىز. كوپ جاقتىلىقتىڭ ءمانى − ءار ەلدىڭ كەڭەسۋى مەن ىنتىماقتاسۋىن كوزدەۋ، مۇندا ەڭ الدىمەن ءىرى ەلدەردىڭ ىنتىماقتاستىعى بولۋ كەرەك. جۇڭگو ءارقاشان الەمدىك بەيبىتشىلىكتى قولدايدى، جاھاندىق دامۋعا ۇلەس قوسادى، حالىقارالىق ءتارتىپتى قورعايدى. ءبىز دۇنيە جۇزىمەن جۇڭگونىڭ دامۋ ورايى مەن تاجىريبەسىن ءبولىسۋدى قالايمىز، ءبىراق ءوزى جولىمىزدى، ۇلگىمىزدى، نازاريامىزدى استە باسقالارعا تىقپالامايمىز.
  گۋتتەرەس شي جينپيڭدى جۇڭگونىڭ مەملەكەت ءتوراعاسى بولىپ سايلانعاندىعىن تاعى ءبىر مارتە قۇتتىقتاپ، مۇنىڭ جۇڭگو ءۇشىن تاريحي مانگە يە ەكەندىگىن القادى. گۋتتەرەس بىلاي دەدى: جۇڭگونىڭ رەفورما جاساپ، ەسىك اشقانىنىڭ 40 جىلدىعىن ەسكە ءتۇسىرۋ قارساڭىندا جۇڭگوعا ساپارلاي كەلگەنىمە جانە بو - اۋ ازيا تالقى مىنبەرىنىڭ جىلدىق ماجىلىسىنە قاتىناساتىنىما ايرىقشا قۋانىشتىمىن. جۇڭگو كوپ جاقتىلىقتىڭ ەڭ ماڭىزدى تىرەگىنە جانە الەمدىك بەيبىتشىلىك پەن دامۋدى جەبەۋدە كەم بولسا بولمايتىن، سەنىم ارتۋعا بولاتىن ماڭىزدى كۇشكە اينالدى. ب م ۇ - نىڭ جۇڭگومەن ىنتىماقتاستىعى الەم ءۇشىن وتە ماڭىزدى. مەن ءتوراعا شي جينپيڭنىڭ ادامزاتتىڭ تاعدىرلاس ورتاق تۇلعاسىن ورناتۋ جونىندەگى دارىپتەمەسىن قۋاتتايمىن، جۇڭگونىڭ «ءبىر بەلدەۋ، ءبىر جول» ىنتىماقتاستىعى سياقتى بارلىق مەملەكەتتەردىڭ بىرگە گۇلدەنۋىن كوزدەيتىن ماڭىزدى دارىپتەمەسىن قولدايمىن. بۇل دارىپتەمەنىڭ حالىقارالىق قوعامعا ەڭ ۇلكەن پايدا جەتكىزەتىنىنە سەنەمىن.
  ەكى جاق ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە پىكىر الماستىردى. گۋتتەرەس جۇڭگونىڭ تىلدەسۋ ارقىلى چاۋشيان تۇبەگىن يادروسىزداندىرۋدى ىلگەرىلەتۋدە ماڭىزدى رول اتقارعانىنا العىس ايتتى.


بەرىپ كەت ورامالىڭدى

دوستار

الىستاعى اق ەركە