جاڭا حابارلار

شي جينپيڭ ناميبيانىڭ زۇڭتۇڭى گەينگوبپەن كەڭەس وتكىزدى

    كەلۋ قاينارى: شينجياڭ گازەتى    2018-03-31 20:53:42  

ەكى ەلدىڭ باسشىلارى جۇڭگو مەن ناميبيانىڭ جالپى بەتتىك ستراتەگيالىق ىنتىماقتاستىق سەرىكتەستىك قاتىناس ورناتۋىن ءبىر اۋىزدان ۇيعاردى

 شينحۋا اگەنتتىگىنىڭ 3 - ايدىڭ 29 - كۇنى بەيجيڭنەن بەرگەن حابارى (تىلشىلەر تان جيڭجيڭ، سۇي ۋىن - ي). مەملەكەت ءتوراعاسى شي جينپيڭ 3 - ايدىڭ 29 - كۇنى حالىق سارايىندا ناميبيانىڭ زۇڭتۇڭى گەينگوبپەن كەڭەس وتكىزدى. ەكى ەلدىڭ باسشىلارى جۇڭگو مەن ناميبيانىڭ جالپى بەتتىك ستراتەگيالىق ىنتىماقتاستىق سەرىكتەستىك قاتىناس ورناتۋىن ءبىر اۋىزدان ۇيعاردى.
  شي جينپيڭ مىنانى اتاپ كورسەتتى: جۇڭگو مەن ناميبيا ەلدەرىنىڭ، ەكى ەل پارتيالارىنىڭ ءداستۇرلى دوستىعى تەرەڭگە تامىر تارتقان، يمپەرياليزمگە، وتارشىلدىققا قارسى كۇرەستە تىزە قوسا شايقاس جاساپ، مەملەكەت قۇرىلىسىندا ءبىر - ءبىرىن قولداپ، دوستىق ىنتىماقتاستىقتى ۇزدىكسىز بەكەمدەدى، بۇل تاراپتاردىڭ ايرىقشا قاستەرلەۋىنە تاتيدى. قازىر جۇڭگونىڭ دا، ناميبيانىڭ دا دامۋى تىڭ ساتىعا قادام تاستادى، دامۋ ستراتەگياسى ءوزارا ۇيلەسەدى، بيلىك جۇرگىزۋ ۇستانىمىندا دا كوپتەگەن ۇقساستىق بار، ەكونوميكالىق ىنتىماقتاستىق باسىمدىعىمەن دە ءبىر - ءبىرىن تولىقتايدى. جان - جاقتىلى دوس رەتىندە، جۇڭگو ناميبيامەن بىرگە قۇلشىنىپ، جۇڭگو مەن ناميبيا قاتىناسىنىڭ ورنىقتى، بەلسەنە دامۋىن ۇزدىكسىز ىلگەرىلەتىپ، ەكى ەل حالقىن يگىلىككە كەنەلدىرۋدى قالايدى.
  شي جينپيڭ مىنانى باسا دارىپتەدى: جۇڭگو مەن ناميبيا جالپى بەتتىك ستراتەگيالىق ىنتىماقتاستىق سەرىكتەستىك قاتىناستىڭ جاڭا باستاماسىندا تۇرىپ، جوعارى جىكتەگىلەردىڭ بارىس - كەلىسىن جانە ءار دارەجەلىلەردىڭ دوستىق قارىم - قاتىناسى مەن ىنتىماقتاستىعىن كۇشەيتىپ، ساياسيداعى ءوزارا سەنىمدىلىكتى ۇزدىكسىز نىعايتىپ، ءبىر - ءبىرىنىڭ وزەكتى مۇددەسىنە جانە قاداعالاي نازار اۋداراتىن ىستەرىنە ساياتىن كەلەلى ماسەلەلەردە ءبىر - ءبىرىن قولداۋ كەرەك. الدىمەن ويلاستىرىلاتىن سالالار مەن ءتۇيىندى نىسانداردى مىقتاپ يگەرىپ، ءوز باسىمدىعىنا ۇشتاستىرىپ، كومەسكى مۇمكىندىكتەردى ىسكە قوسىپ، ەكى ەلدىڭ ءوزارا تيىمدىلىك جەتكىزەتىن، تەڭ يگىلىككە كەنەلەتىن ىنتىماقتاستىعىن ۇزدىكسىز تەرەڭدەتۋ كەرەك. جۇڭگو ناميبيانىڭ «ءبىر بەلدەۋ، ءبىر جول» قۇرىلىسىنا بەلسەنە ات سالىسۋىن قارسى الادى، ناميبيامەن بىرگە ورايدى مىقتاپ يگەرىپ، ساياسات جاعىنداعى تىلدەسۋدى جانە جوبالاردى توعىستىرۋدى كۇشەيتىپ، ءتۇيىندى سالالارداعى ىنتىماقتاستىقتى ىلگەرىلەتۋدى قالايدى. گۋمانيتارلىق اۋىس - كۇيىستى نىعايتىپ، ەكى ەل دوستىعىنىڭ قوعامدىق نەگىزى مەن حالىق قالاۋى نەگىزىن بەكەمدەۋ كەرەك. جۇڭگو ناميبيامەن بىرگە جابايى حايۋاناتتاردى قورعاۋ ىنتىماقتاستىعىن كۇشەيتىپ، جابايى حايۋاناتتاردان جاسالعان بۇيىمدار اتكەزشىلىگى سياقتى زاڭعا قايشى ارەكەتتەردى باتىل تيۋدى قالايدى. حالىقارالىق، وڭىرلىك ىستەردەگى تىلدەسۋدى، سايكەستىكتى كۇشەيتىپ، افريكا مەن وركەندەپ كەلە جاتقان ەلدەردىڭ ورتاق مۇددەسىن اناعۇرلىم ويداعىداي قورعايدى.
  گەينگوب الدىمەن ناميبيا ۇكىمەتى مەن حالقى اتىنان شي جينپيڭنىڭ جۇڭگونىڭ مەملەكەت ءتوراعاسى بولىپ سايلانعاندىعىن تاعى ءبىر مارتە قۇتتىقتادى، شي جينپيڭدى ۇيتقى ەتكەن جۇڭگونىڭ پارتياسى مەن ۇكىمەتىنىڭ باسشىلىعىندا جۇڭگونىڭ ەكونوميكالىق، قوعامدىق دامۋ جاقتارىندا وراسان زور تابىسقا قول جەتكىزگەنىن قۇتتىقتادى، جۇڭگونىڭ ەرتەرەك باي، قۇدىرەتتى، دەموكراتيالى، وركەنيەتتى، جاراسىمدى، كورىكتى سوتسياليستىك وسىزاماندانعان قۇدىرەتتى ەل بولۋىن تىلەدى. گەينگوب بىلاي دەدى: افريكامەن ەڭ تاماشا دوس ەل − جۇڭگودا ساپاردا بولعانىما قاباعات قۋاندىم. ناميبيا مەن جۇڭگونىڭ دوستىعى ۇزاقتان جالعاسىپ كەلەدى، ناميبيا جۇڭگومەن قارىم - قاتىناسىنا ەرەكشە ءمان بەرەدى، ەكى ەل قاتىناسىنىڭ ورەسىن وسىرۋگە، جۇڭگومەن نەگىزدىك قۇرىلعىلار، باياندى دامۋ، ادام كۇشى بايلىعى، تەحنيكا، كەدەيلىكتى ازايتۋ، گۋمانيتارلىق سياقتى سالالارداعى اۋىس - كۇيىس پەن ىنتىماقتاستىقتى كۇشەيتۋگە، كەلەلى ىنتىماقتاستىق نىساندارىن تياناقتاندىرىپ، ءوزارا تيىمدىلىك جەتكىزۋدى، تەڭ يگىلىككە كەنەلۋدى ىسكە اسىرۋعا پەيىل. جۇڭگو ەشقاشان افريكانى وتارلاعان ەمەس، افريكانى ەشقاشان تالان - تاراجىعا سالعان ەمەس، افريكاداعى ورتا، شاعىن ەلدەرگە ەجەلدەن تەپە - تەڭ مامىلەدە بولىپ كەلەدى. جۇڭگو تاريحتا ءبىزدىڭ ادىلەتتى ىستەرىمىزدى قولداعان، بۇگىنگى تاڭدا ءبىزدىڭ دامۋىمىزعا كومەك كورسەتىپ وتىر. جۇڭگو عانا افريكانىڭ ناعىز ىزگى نيەتتى سەرىگى جانە دوسى. افريكا حالقى جۇڭگونى قيسىنسىز جازعىراتىن جالعان سوزدەرگە قارسى تۇرادى. ناميبيا جۇڭگو مەن افريكا ىنتىماقتاستىق مىنبەرى اياسىنداعى سەلبەستىكتى بەلسەنە قولدايدى، جۇڭگو مەن افريكانىڭ حالىقارالىق ىستەردەگى سايكەستىگىن كۇشەيتۋدى قولدايدى.

  شي جينپيڭ مىنانى اتاپ كورسەتتى: جۇڭگو مەن افريكا قۋانىش - جۇبانىشى ءبىر تاعدىرلاس ورتاق تۇلعا جانە سەلبەسە وتىرىپ، تەڭ يگىلىككە كەنەلەتىن مۇددەلەس ورتاق تۇلعا، جۇڭگو مەن افريكانىڭ قاتىناسى وڭتۇستىك پەن وڭتۇستىك ىنتىماقتاستىعىنىڭ ۇلگىسى. جۇڭگو بايي قويماعان جىلداردا جۇڭگونىڭ ءتوراعا ماۋ زىدۇڭ سياقتى اعا بۋىن باسشىلارى قيىنشىلىقتى قالايدا جەڭىپ، افريكاعا كومەكتەسەتىندىكتەرىن بىلدىرگەن بولاتىن. بۇگىنگى تاڭدا، جۇڭگو دامىدى، ءبىز مەيلى سۇيىسپەنشىلىك جاعىندا، الدە كۇش - قۋات جاعىندا بولسىن، افريكاعا اناعۇرلىم كوپ كومەك كورسەتۋىمىز كەرەك. جۇڭگو دۇرىس بورىش - مۇددە كوزقاراسىنا جانە افريكاعا شىنايى دا ناقتى مامىلەدە بولاتىن ساياسات ۇستانىمىنا ۇزدىكسىز تاباندى بولىپ، جۇڭگونىڭ دامۋىن افريكانىڭ دامۋىن دەمەۋمەن تىعىز بىرلەستىرىپ، سەلبەسىپ تەڭ يگىلىككە كەنەلۋدى ىسكە اسىرادى، اسىرەسە، افريكا ەلدەرىنىڭ جۇڭگو مەن افريكانىڭ ىنتىماقتاستىعىنان پايدالانىپ، باياندى دامۋ قابىلەتىن ءوز كۇشىنە سۇيەنىپ وسىرۋىنە مۇمكىندىك جاسايدى. جۇڭگو مەن افريكانىڭ تىزە قوسا قۇلشىنىپ، جۇڭگو مەن افريكانىڭ اناعۇرلىم تىعىز تاعدىرلاس ورتاق تۇلعاسىن قۇرىپ، جۇڭگو مەن افريكا قاتىناسىنىڭ دامۋىنا ۇزدىكسىز جاڭا قوزعاۋشى كۇش بەرەتىندىگىنە سەنەمىن.

  كەڭەستەن كەيىن، ەكى ەلدىڭ باسشىلارى نەگىزدىك قۇرىلعىلار، قارجى قۇراۋ، تەكسەرۋ، كارانتيندەۋ سياقتى سالالارداعى ەكى جاقتى ىنتىماقتاستىق حۇجاتتارىنا قول قويۋعا بىرگە كۋا بولدى.
  كەڭەستەن ىلگەرى، شي جينپيڭ حالىق سارايىنىڭ سولتۇستىك زالىندا گەينگوبتى قارسى الۋ سالتىن وتكىزدى. ءتوراعا شي جينپيڭنىڭ حانىمى پىڭ لييۋان، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىعى جي بيڭشۋان، مەملەكەتتىك كەڭەستىڭ مۇشەسى، قوسىمشا سىرتقى ىستەر مينيسترى ۋاڭ ي، مەملەكەتتىك ساياسي كەڭەستىڭ ورىنباسار ءتوراعالارى ما بياۋ، حى ليفىڭ، ت.ب قارسى الۋ سالتىنا قاتىناستى.


بەرىپ كەت ورامالىڭدى

دوستار

الىستاعى اق ەركە