باس بەتجاڭالىقتارادەبيەت-كوركەمونەروقۋ-اعارتۋمادەنيەتەلەس
كوز ايىم ساتتەرەكران الەمىتاڭداپ تىڭداڭىزقازاق رەداكسياسىارناۋلى تاقىرىپايماق-وبىلىس
جاڭا حابارلار

ءوزىڭ وزگەرسەڭ، ءومىرىڭ دە وزگەرەدى

    كەلۋ قاينارى: شينجياڭ حالىق راديو ىستانسياسى    2017-07-13 20:47:40  
1. جانىڭ نەنى قالايدى؟ شىن ويلانىپ كوردىڭ بە؟ ەڭ ماڭىزدى ءارى ەڭ كۇردەلىسى وسى.
بۇل تۋرالى كوپ نارسە ايتۋعا بولار ەدى. توق ەتەرىن عانا ايتايىق، شىن ءلاززات الاتىن ىسپەن عانا شۇعىلدان، سوندا باقىتىڭ شىنايى بولماق. ينتەرنەت دامىعالى ءبارى وڭتايلاندى ەمەس پە؟ جاساعان ءار ءىسىڭدى ەلگە ايتۋعا مۇمكىندىك ەسەلەندى. سەنىڭ شابىتپەن ىستەگەن ءار زاتىڭا باعا بەرۋشى تابىلادى. جانىپ تۇسەتىن ءىسىڭ بولسا، بۇل سەنىڭ وزگەگە ۇناۋىڭنىڭ كىلتى بولماق. ءوز جولىڭدى تابۋىڭ ـــ بۇل مارافون، ول جىلدار بويى جالعاسا بەرۋى ىقتيمال.
2. شەتەل ءتىلىن ۇيرەنۋ قاجەت، الەمدى تانۋدا كەرەمەت كوكجيەكتەردى اشادى. وقۋ، جەتىلۋ ءۇشىن، جۇمىستا جەتىستىككە جەتۋدە ارمانداعان بەلەستەرگە شىعارادى.
3. كىتاپ وقى. ءوزىڭنىڭ كاسىبىڭە بايلانىستى قىزىقتىراتىن ادەبيەتتى مەڭگەر. وعان قوسا تاريح، كوركەم ادەبيەت، پسيحولوگيا، جاراتىلىستانۋ، ءومىر باياندىق حيكايالاردى كوپ وقى. وقۋعا ۋاقىت جوق دەسەڭ، اۋديوسىن تىڭدا. اپتاسىنا ءبىر كىتاپ، سوندا جىلىنا 50 كىتاپ. سونىڭ ءبارى ءومىردى وزگەرتۋگە كەرپىش بولىپ قالانادى.
4. دەمالىس كۇندەرىڭدى ماعىنالى ەتىپ وتكىز. مۇراجايعا، كورمەگە بار. سپورتپەن شۇعىلدان. قالانىڭ سىرتىنا شىق. تۋىستارىڭا قىدىر. تىم بولماعاندا، ءتاۋىر فيلم كور. الەممەن قاتىناس شەگىن كەڭەيت. ءبارىن كورىپ، بارلىق جەرگە بارىپ كەلگەن سوڭ، دوستارىڭمەن كەزدەسىپ، كورگەن - بىلگەنىڭدى ورتاعا سال. كورگەنىڭنىڭ ءبارىن جۇرەكتەن وتكىزسەڭ، ءاربىر بەيمالىم قۇبىلىس پەن ۇعىمداردى تۇسىنە باستايسىڭ.
5. ماقسات قوي. قاعازعا جاز، بولماسا كۇندەلىككە. ماقسات تاپساڭ، وعان جەتۋ - جەتپەۋ مۇمكىن بە دەگەندى بىلەسىڭ. ماقساتىڭ بولماسا، وندا جەتىستىك تە كەلمەيدى.
6. پەرنەتاقتادا كوزدى جۇمىپ باسۋدى ۇيرەن. 21 - عاسىردا مۇنى بىلمەۋ ۇيات. ۋاقىت ـــ ادام قولىنداعى ەڭ ۇلى قازىنا. تەز ويلاعانداي، تەز تەرە ءبىلۋدى يگەرۋىڭ كەرەك. كەرەك ءارىپ قايدا دەگەندى ويلاما، نە جازاتىنىڭدى ويلا.
7. ۋاقىتتى اۋىزدىقتا. جۇمىسىڭدى سەنسىز جاسالاتىنداي ۇيىمداستىرا ءبىل. شەشىمدى جىلدام قابىلدا. تەز ارەكەت قىل. ەشتەڭەنى ەرتەڭگە قالدىرما. ءىستىڭ ءبارىن تىندىر. ءالى كۇنگە دەيىن بىتپەگەن، مازاڭدى الىپ تۇرعان ۇزاق مەرزىمدى ءىستىڭ ءبارىن قاعازعا ءتىز. شىنىمەن ماڭىزى بار - جوعىن باعامدا. قالعان ءىستى تەز ءبىتىر. كەرەك ەمەسىن ءوشىر. جەڭىلدىك جانىڭا جاي تاپتىرادى.
8. كومپيۋتەرلىك ويىننان باس تارت. سول سياقتى الەۋمەتتىك جەلىدە ماقساتسىز ءبىر نارسەمەن شۇعىلدانۋدى دوعار. ينتەرنەتتى كەزە بەرمە. كەرەك جەردە عانا بول. ۋاقىتىڭدى قادىرلە.
9. جاڭالىق وقۋدى قىسقارت. ءماندى نارسەنى اينالاڭنىڭ ءبارى ايتىپ جەتكىزەدى. باسقاسى سەن ءۇشىن ماڭىزدى ەمەستىگىن تەز تۇسىنەسىڭ.
10. ەرتە تۇرىپ داعدىلان. تاڭعى ۋاقىتتا ادام كوپ نارسەگە ۇلگىرەدى. كەشكە تامان شارشايدى. دۇكەن ارالاۋ كوپ ۋاقىتتى جەيدى. ادامعا كۇنىنە 7 ساعات ۇيقى جەتكىلىكتى. جاقسى تاماقتانۋ مەن دەنە جاتتىعۋى قالىپتى بولسا، ادام تەز تىنىعادى.
11. جانىڭدا اشىق، تاربيەلى، اقىلدى، جەتىستىككە جەتكەن ادامدار كوپ بولسىن. اينالامىزدان ءبارىن ۇيرەنەمىز. ءوزىڭ سيلايتىن ادامدارمەن كوپ ۋاقىت وتكىز. كەرتارتپا، شارشاڭقى، توزىپ جۇرگەن ادامدارمەن بايلانىستى ازايت. ءوزىڭ دەڭگەيىنە جەتكىڭ كەلەتىن ادامدارمەن جاقىن ارالاس.
12. ءار ءساتتى، ءار ادامدى جاڭا نارسە ءبىلۋ ءۇشىن پايدالان. كەز كەلگەن سالانىڭ مايىن ىشكەن مايتالمانمەن جولىعۋدىڭ ءساتى تۇسسە، ونىڭ جۇمىسىنىڭ ءمانى نەدە، ونىڭ ماقساتى نە ەكەنىن بىلۋگە تىرىس. دۇرىس سۇراق قويۋدى ۇيرەن.
13. ساياحاتتا. اقشام جوق دەپ سەبەپ ىزدەمە. دەمالىستىڭ قىزىعى ونىڭ ساپاسىنا بايلانىستى ەمەس. ارزان جەرلەرگە بارىپ تا كوپ قىزىققا باتۋعا بولادى. ساياحاتتىڭ ءبىر جاقسىسى ويلاۋ كوكجيەگىن كەڭەيتەدى. ءبىر ۇيدەن كىرىپ، ءبىر ۇيدەن شىعىپ، ەشتەڭەنىڭ قادىرىنە جەتە الماعانىڭدى تۇسىنەسىڭ. الدەقايدا سابىرلى، كورەگەن، ءتوزىمدى بولا باستايسىڭ.
14. فوتو اپپارات ساتىپ ال. ءومىردىڭ قىزىقتى، سۇلۋ ساتتەرىن ءتۇسىرۋدى ادەت قىل. ءتۇسىرىپ ۇيرەنگەندە ساياحاتتارىڭنان كەرەمەت ەستەلىكتەر اكەلەسىڭ. سۋرەت سالۋعا دا بولادى. ومىرگە وزگەشە قاراۋعا ۇيرەتەتىن نارسەمەن اينالىس.
15. سپورتپەن شۇعىلدان. يوگا، تاۋعا شىعۋ، ۆەلوسيپەد، تورنيك، فۋتبول، جۇگىرۋ، ءجۇزۋ سياقتى قاراپايىم نارسەلەر بار، ادامنىڭ ەڭ جاقىن دوستارى وسىلار. ليفت دەگەندى ۇمىت، تەك جاياۋ ءجۇر. ءوزىڭدى وزگەرتۋگە قۇلشىنساڭ وسىدان باستا.
16. وزگەشە نارسەلەردى جاسا. ەشقاشان بارىپ كورمەگەن جەرگە بار. جۇمىسقا باسقا جولمەن شىق. ءوزىڭ تۇك تۇسىنبەگەن نارسەنىڭ بايىبىنا جەتۋگە بارىڭدى سال. ومىرگە دەگەن كوزقاراسىڭدى وزگەرت. ۇيدەگى جيھازدىڭ ورنىن الماستىر. سىرتقى الپەتىڭدى وزگەرت.
17. ەسكى - قۇسقىدان تەز قۇتىل. ءبىر جىلدان بەرى كيمەگەن ەسكى كيىمدەردى بىرەۋگە بەر. شىنىمەن ۇنايتىن، كيەتىن كيىمدەردى عانا قالدىر. جاڭا زات العاندا ەسكىسىن تاستاپ وتىر. زاتىڭ از بولعان سايىن شاڭ دا از، باس تا اۋىرمايدى.
18. العانىڭنان بەرەرىڭ باسىم بولسىن. بىلگەنىڭمەن، تاجىريبەڭمەن، ويلارىڭمەن ءبولىس. تەك الا بەرمەي، بولىسە جۇرەتىن ادام وزىنە تەك جاقسىلىق تارتىپ تۇرادى.
19. ءومىردى قالاي كورسەڭ، سول كۇيى قابىلدا. وزگەنى مىنەۋدەن تيىل.
20. وتكەن شاقتا بولعان دۇنيەنىڭ ءبارىن ۇمىت. سەنىڭ كەلەشەگىڭە ونىڭ ەش قاتىسى جوق. وتكەن شاقتان تاجىريبە، ءبىلىم، ساباق عانا الىپ كەتە الاسىڭ. جاقسى قارىم - قاتىناس پەن جاعىمدى ەستەلىكتەر عانا قالسىن.
21. قورىقپا. ادام المايتىن اسۋ جوق. كۇدىكتىڭ ءبارى سانادا عانا بار. سارباز بولۋ شارت ەمەس، تەك ماقساتتى كورسەڭ بولعانى. كەدەرگىنىڭ ءبارىن اتتاپ، اينالىپ وتەسىڭ. قايتسەڭ دە دەگەنىڭە جەتەتىنىڭە سەن. جەڭىلۋىم مۇمكىن دەگەن كۇمان مۇلدە بولماسىن.وسىندا تىزىلگەننىڭ ءبىر - ەكەۋىن تاڭداپ الىپ، سونى جۇزەگە اسىرساڭ، سونىڭ ءوزى جەتىستىك. سوندا ايناعا قاراۋعا ۇيالمايتىن كۇيگە جەتەسىڭ. ءوزىڭدى بىلە تۇسەسىڭ. ال الەم ساعان تامسانا قارايتىن بولادى. سەن سياقتى بولۋعا تىرىسادى.
ءان الەمى

جول توسىلىپ قالدى

تۇلپارىم