باس بەتجاڭالىقتارادەبيەت-كوركەمونەروقۋ-اعارتۋمادەنيەتەلەس
كوز ايىم ساتتەرەكران الەمىتاڭداپ تىڭداڭىزقازاق رەداكسياسىارناۋلى تاقىرىپايماق-وبىلىس
جاڭا حابارلار

كوكىرەگىڭ كەڭ بولسىن

    كەلۋ قاينارى: شينجياڭ حالىق راديو ىستانسياسى    2017-07-12 21:40:33  
تاعدىر تالكەگى ونى جاستايىنان قىرىنا الىپ، اتا - انانىڭ ىستىق قۇشاعىنان، جىلى مەيىرىنەن ايىرىپ، جەتىمدىكتىڭ تاۋقىمەتىن تارتتىردى. ول ەسەيىپ وڭ - سولىن پارىقتاعانعا دەيىن تۇپ - تۋرا ءۇش ءۇيدىڭ اسىراۋىندا بولدى.
ءبىرىنشى ۇيدەگىلەر ونى بەس جاسىنان سەگىز جاسىنا دەيىن ءۇش جىل باعىپ، كەيىن وزدەرى ءبىر ۇلدى بولعاننان سوڭ ونى باسقالارعا بەرمەكشى بولادى. ءبىراق ول بۇعان قوسىلمايدى. قوسىلماعانىمەن نە شارا؟ وگەي اتا - انا وگەيلىگىن ىستەتىپ، ونى كوگالا قويداي ەتىپ ساباپ قۋىپ شىعادى. ول امالسىز بۇل وتباسىنان قاراسىن وشىرەدى.
ەكىنشى رەت باعىپ العان وتباسى ونى بەس جىل باعادى. ءدال ونءۇش جاسقا كەلگەن شاعىندا بۇلار دا ونى بۇرىنعىداي باسقالارعا بەرىپ، تۋىستارىنىڭ ۇلىن باعىپ الماقشى بولادى. ويتكەنى ءۇش قايناسا دا سورپاسى قوسىلمايتىن اسىراندى بالاعا قاراعاندا، بال جالاسقان تۋىسقانىنىڭ بالاسىن باعىپ الۋدى ءجون سانايدى. ول سوندا دا ولاردان ايرىلعىسى كەلمەيدى. ءجۇزىن جاس جۋىپ: «اكە - شەشە، مەنى قۋماڭىزدارشى، مەن ءسوز ۇعىپ، جاقسى بالا بولامىن. جۇمىس ىستەپ، اقشا تاۋىپ، ءوزىمدى اسىرايمىن، تەك مەنى قۋا كورمەڭىزدەرشى» دەپ قانشا جالىنىپ - جالبارىنسا دا اقىرى بۇل ۇيدەن كەتىپ تاعى ءبىر بوساعانى اتتايدى.
ءۇشىنشى رەت باعىپ العاندار ءبىر جىلدان كەيىن ونى وقىتۋعا اقشاسىن قيماي، ۇيدەن تاعى قۋىپ شىعادى. تاستاندى بولۋعا ەتى ۇيرەنىپ كەتكەن ول ەندى جالىنۋدان ءۇمىتىن ءبىر جولاتا ءۇزدى. تەك تار قاپاستان قۇتىلىپ ەركىن سامعاعىسى كەلدى. ون ءتورت جاسقا ەندى عانا تولعان ول وسىلايشا كوشە سەرگەلدەڭىنە اينالدى. كوشەدەگى قوقىر - قوقسىققا توگىلگەن تاماقتاردى تەرىپ جەپ، ءبىر كۇنىن امان - ەسەن وتكىزۋ ءۇشىن تىربىندى. كەيىن باسقا دا ءوزى سياقتى كوشە سەرگەلدەڭدەرىمەن بىرگە گۇل ساتىپ، اياق كيىم مايلاپ، قوقىر - قوقسىق تەرىپ، جانىن جالداپ كۇن كورەدى. ۇيقىسى كەلسە دۇكەندەردىڭ ەسىك الدىنداعى قۋىستارعا جاتا سالادى. ەرتەسى تاڭەرتەڭ دۇكەن قوجايىنى اياعىمەن تەۋىپ وياتاتىن...
التى جىلعى سەرگەلدەڭ تۇرمىستى باسىنان وتكەرگەن ول ءبىر قۇرىلىس سەرىكتەستىگىنە سەمەنت يلەيتىن جۇمىسشى بولىپ ىستەيدى. وسى جۇمىسىن ىستەي ءجۇرىپ تاپقان ماردىمسىز اقشاسىمەن كەشكى مەكتەپتەرگە قاتىناسىپ، ءبىلىم ۇيرەنىپ، وزدىگىنەن ۇيرەنۋ ەمتيحانىنان ءوتىپ، ديپلوم العان جىلى جيىرما ەكى جاسقا شىعادى. سونىمەن ءبىر بەلدى سەرىكتەستىكتىڭ تيجارات ءبولىمىنىڭ مەڭگەرۋشىسى بولادى. كەيىن جەكە سەرىكتەستىك اشىپ، قالتاسى قامپيىپ، استىندا كولىگى، كەڭ ساراي ءۇيى بار قوجايىنعا اينالىپ، بارلىعىنا قولى جەتەدى.
قازىر ەشتەڭەدەن دە كەندە ەمەس، تەك تۋىستىق مەيىر عانا كەم. ول ءارى - ءسارى بولماي بۇرىن ءوزىن باققان ءۇش بىردەي اكە - شەشەسىن قاسىنا اكەلىپ الىپ، ولارمەن بىرگە تۇرادى ءارى ولاردى اكە - شەشە دەپ شاقىرادى.
ونىڭ كومەكشىسى، ياعني كەزىندەگى سەرگەلدەڭ كۇندەردى بىرگە وتكىزگەن دوسى: «بۇل قايتكەنىڭ؟ ولار ساعان بۇرىن قالاي قاراپ ەدى، ەندى ولاردى باقيعا اتتانعانشا باعىپ - قاقپاقپىسىڭ؟ مەيىرىمسىزدىكپەن تاستاندى ەتكەن، اياۋسىز قورلاعان ىستەرىن تۇگەلىمەن ۇمىتىپ كەتكەنسىڭ بە؟»،-دەدى وعان اياۋشىلىق ءبىلدىرىپ. ول: «سولاي، مەن بارلىعىن الدەقاشان كوڭىل ەكرانىمنان ءبىر جولاتا وشىرگەنمىن. ونى ەستە ساقتاۋىمنىڭ نە قاجەتى؟ قازىرگە دەيىن تارتقان تاقسىرەتىمنىڭ ءوزى دە جەتكىلىكتى. وتكەن ىستەردى قوڭىرسىتقىم كەلمەيدى»،-دەپ تەرەڭ ءبىر تىنىستاپ الىپ، «مەن تەك ولاردىڭ بۇرىن مەنى اسىراپ العانىن، قارنىمدى تويدىرىپ، جايلى جاتار ورىن بەرگەنىن عانا بىلەمىن. سوندىقتان اشتىقتان، ءۇسىپ ولۋدەن امان قالدىم. ەگەر ولار بولماسا، مەنىڭ بۇگىنگى كۇنىم دە بولماس ەدى»،-دەدى تەبىرەنىسپەن.
ەگەر ۇنەمى باسقالاردىڭ تەرىسكەي جاعىن عانا كورىپ، كەمشىلىگىمەن ەسەپتەسىپ، كۇنگەي جاعىن ەستەن شىعارىپ، بار جاقسىلىعىن ۇمىتاتىن بولساق، ءىشى تار، تەك ءوزى ءۇشىن عانا وبىرلاناتىن اشكوزگە اينالامىز. مۇنداي ادامدار نە ىستەسە دە ماندىمايدى، تابىسقا جەتە دە المايدى. ال باسقالاردىڭ جاقسى جاعىن كورە بىلگەن، ەكشەي بىلگەن ادام ناعىز تابىسقا جەتۋشى، ءتىپتى، ءدانىشپان سانالماق.
ءان الەمى

جول توسىلىپ قالدى

تۇلپارىم